ஸ்கோடா ஸ்லாவியா விலை உயர்வு.. ஆனால் ஒரு வேரியண்டுக்கு மாற்றமே இல்லை

இந்த விலை உயர்வு குறித்து கடந்த டிசம்பரிலேயே நிறுவனம் அறிவித்திருந்த நிலையில், புதிய விலைகள் ஜனவரி 1 முதல் அமலுக்கு வந்துள்ளன. இதனைப் பற்றிய முழு விபரங்களை பார்க்கலாம்.

Image Credit : Google

ஸ்கோடா ஸ்லாவியா விலை

ஸ்கோடா இந்தியா தனது பிரீமியம் செடான் காரான ஸ்கோடா ஸ்லாவியாவின் விலையை உயர்த்தியுள்ளது. இந்த விலை உயர்வு குறித்து கடந்த டிசம்பரிலேயே நிறுவனம் அறிவித்திருந்த நிலையில், புதிய விலைகள் ஜனவரி 1 முதல் அமலுக்கு வந்துள்ளன. தற்போது அனைத்து வேரியண்டுகளின் புதுப்பிக்கப்பட்ட விலைகளும் வெளியிடப்பட்டுள்ளன. அதிகபட்சமாக 2.09 சதவீதம் அல்லது ரூ.33,690 வரை விலை உயர்த்தப்பட்டுள்ளது. 

இருப்பினும், அடிப்படை 'கிளாசிக்' வேரியண்டின் எக்ஸ்-ஷோரூம் விலையில் எந்த மாற்றமும் செய்யப்படவில்லை. அது இப்போது ரூ.9,99,900 என்ற விலையில் கிடைக்கிறது. இதேபோல், மொத்தம் மூன்று வேரியண்டுகளுக்கு விலை உயர்வு செய்யப்படவில்லை என்பது குறிப்பிடத்தக்கது. இதற்கிடையில், ஸ்கோடா ஸ்லாவியா ஃபேஸ்லிஃப்ட் மாடலின் முதல் மறைக்கப்படாத படம் வெளியாகி ஆட்டோ ரசிகர்களிடையே கவனம் பெற்றுள்ளது. 

இந்த டீசரை வெளியிட்டது ஸ்கோடா இந்தியா அல்ல; ஸ்கோடா நேபாளம். இந்தியாவில் தயாரிக்கப்பட்டாலும், ஸ்லாவியா ஃபேஸ்லிஃப்ட் இந்தியாவிற்கு முன்பாக நேபாளத்தில் அறிமுகமாகிறது. இந்தியா 2.0 முக்கிய திட்டத்தின் வாகனங்களில் ஒன்றான இந்த செடான், MQB A0 IN பிளாட்ஃபார்மில் கட்டமைக்கப்பட்டுள்ளது. இதே மாடல் நேபாளம், வியட்நாம் உள்ளிட்ட நாடுகளுக்கும் ஏற்றுமதி செய்யப்படுகிறது.

Image Credit : Google

ஸ்லாவியா ஃபேஸ்லிஃப்ட்

வெளியிடப்பட்ட படங்கள், ஸ்லாவியா ஃபேஸ்லிஃப்ட் வெறும் அப்டேட் அல்ல; கிட்டத்தட்ட புதிய தலைமுறை காரைப் போலவே மாற்றம் பெற்றுள்ளதாக தெரிகிறது. கதவுகள் மற்றும் அதைச் சுற்றியுள்ள ஷீட் மெட்டல் முழுமையாக மறுவடிவமைக்கப்பட்டுள்ளது. புதிய LED டெயில்லைட் சிக்னேச்சர், ஸ்டைலான டர்ன் இன்டிகேட்டர்கள், பெரிய ‘SKODA’ எழுத்துக்கள், மாற்றியமைக்கப்பட்ட பின்புற பம்பர் மற்றும் புதிய அலாய் வீல் டிசைன்கள் போன்றவை இதன் தோற்றத்தை மேலும் ஸ்போர்ட்டியாக்குகின்றன.

முன்பக்க வடிவமைப்பு இன்னும் முழுமையாக வெளிவராத நிலையில், அதிக ஆக்ரோஷமான தோற்றம் எதிர்பார்க்கப்படுகிறது. பனோரமிக் சன்ரூஃப் அல்லது 360 டிகிரி கேமரா போன்ற அம்சங்கள் இதில் இல்லாததாகத் தெரிகிறது. ஆனால், லெவல்-2 ADAS சேர்க்கப்படலாம் என்ற எதிர்பார்ப்பு உள்ளது. இன்ஜின் தேர்வுகளில் மாற்றமின்றி, தற்போதைய 1.0L TSI மற்றும் 1.5L TSI பெட்ரோல் இன்ஜின்களே தொடர வாய்ப்புள்ளது. இந்த ஃபேஸ்லிஃப்ட் மாடல் மகாராஷ்டிராவின் சத்ரபதி சம்பாஜி நகரில் உள்ள ஸ்கோடாவின் ஆலையில் தயாரிக்கப்படுவது குறிப்பிடத்தக்கது.