Maruti Suzuki eVitara: பாதுகாப்பில் பக்கா மாஸ்! ஜப்பான் NCAP சோதனையில் சாதனை படைத்த மாருதி இ-விட்டாரா!

Maruti Suzuki eVitara: இந்தியாவில் தயாரித்த மாருதி சுஸுகி இ-விட்டாரா கார், ஜப்பான் NCAP கிராஷ் டெஸ்டில் 4 ஸ்டார் ரேட்டிங் வாங்கியுள்ளது. இது தொடர்பான முழு விவரங்களை பார்க்கலாம்.

Image Credit : Maruti

ஜப்பானில் கெத்து காட்டிய இந்தியாவின் மாருதி இ-விட்டாரா

இந்தியாவில் தயாரிக்கப்பட்டு உலக நாடுகளுக்கு ஏற்றுமதி செய்யப்படும் மாருதி சுஸுகி இ-விட்டாரா கார், ஜப்பானில் நடைபெற்ற பாதுகாப்பு சோதனையில் 4 ஸ்டார் ரேட்டிங் பெற்றுள்ளது. ஜப்பானின் புதிய கார் பாதுகாப்பு மதிப்பீட்டுத் திட்டத்தின் கீழ் நடத்தப்பட்ட கிராஷ் டெஸ்டில்தான் இந்த எலக்ட்ரிக் SUV இந்த சாதனையைப் படைத்துள்ளது.

ஆஸ்திரேலியாவில் நடைபெற்ற ANCAP கிராஷ் டெஸ்டிலும் இ-விட்டாராவுக்கு 4 ஸ்டார் தான் கிடைத்தது. எனினும், இந்தியாவில் நடைபெற்ற பாரத் NCAP சோதனையில் இம்காருக்கு 5 ஸ்டார் பாதுகாப்பு ரேட்டிங் கிடைத்தது குறிப்பிடத்தக்கது. ஒரு முறை முழுமையாக சார்ஜ் செய்தால் 543 கிலோமீட்டர் வரை பயணிக்கக் கூடிய இந்த இ-விட்டாராவின் இந்திய விலை ரூ.16.19 லட்சத்தில் தொடங்கி ரூ.20.21 லட்சம் வரை நிர்ணயிக்கப்பட்டுள்ளது.

Image Credit : Google

NCAP கிராஷ் டெஸ்டில் சூப்பர் பெர்ஃபார்மன்ஸ்

காரின் கட்டமைப்பு பாதுகாப்பு மட்டுமல்லாமல், விபத்துகளைத் தவிர்க்க உதவும் தொழில்நுட்பங்கள் மற்றும் விபத்து எச்சரிக்கை சிஸ்டம் போன்றவையும் ஜப்பான் NCAP சோதனையில் பரிசோதிக்கப்படுகின்றன. இந்தத் சோதனையில், விபத்துகளைத் தடுக்கும் சிஸ்டத்திற்கு இ-விட்டாரா 'A' கிரேடும், மோதல் ஏற்படும்போது வழங்கும் பாதுகாப்பிற்கு 'B' கிரேடும் பெற்றுள்ளது.

மேலும், விபத்து நடந்தால் தானாகவே தகவல் அனுப்பும் சிஸ்டம் அட்வான்ஸ்டு டைப் II பிரிவில் சேர்க்கப்பட்டுள்ளது. ஜப்பானில் கிடைத்த 4 ஸ்டார் ரேட்டிங்கையும், இந்தியாவில் கிடைத்த 5 ஸ்டார் ரேட்டிங்கையும் நேரடியாக ஒப்பிட முடியாது; ஏனெனில், இரண்டு நாடுகளின் சோதனை முறைகளும் மதிப்பீட்டு அளவுகோல்களும் வெவ்வேறானவை.

Image Credit : Google

கிராஷ் டெஸ்டில் பயணிகளின் பாதுகாப்பு எப்படி?

நேருக்கு நேர் மோதும் சோதனை: டிரைவர் பாதுகாப்புக்கு இ-விட்டாரா 5-க்கு 5 ரேட்டிங் பெற்றுள்ளது.

பின் சீட் பயணிகள் மற்றும் முன்பக்க மோதல் சோதனை: லெவல் 4 ரேட்டிங் கிடைத்துள்ளது.

பக்கவாட்டு மோதல் சோதனை: இந்த எலக்ட்ரிக் SUV லெவல் 5 ரேட்டிங்கைத் தட்டியுள்ளது.

பின்புற மோதல் பாதுகாப்பு: பின்னால் இருந்து மோதும் போது டிரைவர் மற்றும் முன் சீட் பயணிகளின் கழுத்து பாதுகாப்புக்கு லெவல் 5 ஸ்டார் ரேட்டிங் கிடைத்துள்ளது.

பாதசாரிகள் பாதுகாப்பு சோதனை: முடிவுகள் சற்று மாறுபட்டுள்ளன. தலை பாதுகாப்புக்கு லெவல் 3 ரேட்டிங்கும், கால் பாதுகாப்புக்கு லெவல் 5 ரேட்டிங்கும் கிடைத்துள்ளது.

சீட் பெல்ட் ரிமைண்டர் சிஸ்டம்

விபத்து அபாயத்தைக் குறைக்கும் பல தொழில்நுட்பங்களிலும் இ-விட்டாரா சிறப்பான செயல்பாட்டை வெளிப்படுத்தியுள்ளது. பகல் மற்றும் இரவு வேளைகளில் இயங்கும் ஆட்டோமேட்டிக் எமர்ஜென்சி பிரேக்கிங் சிஸ்டம், பாதசாரிகளைக் கண்டறியும் தொழில்நுட்பம், சைக்கிள் ஓட்டுபவர்களை அடையாளம் காணும் சிஸ்டம் ஆகியவற்றுக்கு லெவல் 5 ரேட்டிங் கிடைத்துள்ளது. மேலும், லேன் டிபார்ச்சர் வார்னிங், லேன் மாறுவதைத் தடுத்து நிறுத்தூம் தொழில்நுட்பம், பிரகாசமான ஹெட்லைட்டுகள் மற்றும் எதிர்பாராமல் ஆக்சிலரேட்டரை மிதித்தால் வேகத்தைக் கட்டுப்படுத்தும் சிஸ்டம் ஆகியவற்றுக்கும் லெவல் 5 ரேட்டிங் கிடைத்துள்ளதாக அறிக்கைகள் தெரிவிக்கின்றன.

Image Credit : Google

மாருதி இ-விட்டாராவின் விலை மற்றும் சிறப்பம்சங்கள்

இந்தியாவில் டெல்டா, ஜீட்டா, ஆல்ஃபா ஆகிய மூன்று வேரியண்ட்களில் மாருதி சுஸுகி இ-விட்டாரா விற்பனைக்குக் கிடைக்கிறது. பேட்டரி செலவையும் சேர்த்து இதன் விலை ரூ.16.19 லட்சத்தில் தொடங்கி ரூ.20.21 லட்சம் வரை உள்ளது. இதில் 49 kWh மற்றும் 61 kWh என இரண்டு பேட்டரி ஆப்ஷன்கள் வழங்கப்பட்டுள்ளன. நிறுவனத்தின் தரவுகளின்படி, ஒருமுறை முழுமையாக சார்ஜ் செய்தால் அதிகபட்சமாக 543 கிலோமீட்டர் வரை பயணிக்கலாம். எனினும், நிஜ பயன்பாட்டில் ஓட்டுநர் இயக்கும் விதம், சாலையின் தட்பவெப்பநிலை, வானிலை மற்றும் ஏசி பயன்பாடு ஆகியவற்றைப் பொறுத்து மைலேஜ் மாறுபட வாய்ப்புள்ளது.

இந்தியாவில் தயாரித்து உலக சந்தைக்கு

இந்தியாவில் தயாரிக்கப்படும் இ-விட்டாராவை சுஸுகி நிறுவனம் வெளிநாடுகளுக்கும் ஏற்றுமதி செய்து வருகிறது. ஜப்பான் பாதுகாப்பு சோதனையில் கிடைத்துள்ள இந்த வெற்றி, உலகளாவிய சந்தையில் காருக்கு மேலும் நல்ல வரவேற்பைப் பெற்றுத் தர உதவியாக இருக்கும். 543 கி.மீ ரேஞ்ச், பல்வேறு பேட்டரி ஆப்ஷன்கள் மற்றும் நவீன பாதுகாப்பு தொழில்நுட்பங்கள் ஆகியவை இ-விட்டாராவின் முக்கிய சிறப்பம்சங்களாகும். இந்தியாவில் 5 ஸ்டார், ஜப்பான் மற்றும் ஆஸ்திரேலியாவில் 4 ஸ்டார் என இந்த காரின் பாதுகாப்பு அம்சங்கள் தற்போது பெரும் பேசுபொருளாக மாறியுள்ளன.