E20 பெட்ரோல் போட்டால் மைலேஜ் குறையுமா? முதல் முறையாக மத்திய அரசு சொன்ன முக்கிய விளக்கம்!
பெட்ரோல் பங்குகளில் E20 பெட்ரோல் அதிகமாகக் கிடைக்கத் தொடங்கிய பிறகு, வாகன ஓட்டிகளிடம் ஒரு கேள்வி தொடர்ந்து எழுகிறது. "E20 போட்டால் மைலேஜ் குறையுமா?" இந்த சந்தேகத்திற்கு தற்போது மத்திய அரசே விளக்கம் அளித்துள்ளது.
E20 பெட்ரோல்
நாடு முழுவதும் E20 பெட்ரோல் பயன்பாடு படிப்படியாக அதிகரித்து வரும் நிலையில், இந்த எரிபொருள் குறித்து வாகன ஓட்டிகளிடம் பல்வேறு கேள்விகள் எழுகின்றன. குறிப்பாக, "E20 பயன்படுத்தினால் மைலேஜ் குறையுமா?", "ஏன் இதன் விலை குறையவில்லையா?" மற்றும் "இன்ஜினுக்கு பாதிப்பு உண்டா?" போன்ற சந்தேகங்களுக்கு மத்திய பெட்ரோலிய மற்றும் இயற்கை எரிவாயு அமைச்சகம் விளக்கம் அளித்துள்ளது. அமைச்சகத்தின் தகவலின்படி, 20 சதவீத எத்தனால் கலந்த E20 பெட்ரோலை பயன்படுத்தும் போது, சில வாகனங்களில் 3 முதல் 5 சதவீதம் வரை மைலேஜ் குறைய வாய்ப்பு உள்ளது. எத்தனாலின் ஆற்றல் அடர்த்தி (Energy Density) பெட்ரோலை விட சற்று குறைவாக இருப்பதே இதற்குக் காரணம் என விளக்கப்பட்டுள்ளது.
E20 மைலேஜ்
இருப்பினும், இந்த மைலேஜ் குறைவு அனைத்து வாகனங்களிலும் ஒரே அளவில் இருக்கும் என்று அரசு கூறவில்லை. ஆனால், மைலேஜை மட்டும் அடிப்படையாக வைத்து E20 பெட்ரோலை மதிப்பிடக் கூடாது என்று அமைச்சகம் வலியுறுத்தியுள்ளது. E20-க்கு ஆக்டேன் ரேட்டிங் அதிகம் இருப்பதால், இன்ஜினில் ஏற்படும் நாக்கிங் (Engine Knocking) குறைய உதவுகிறது. இதன் மூலம் இன்ஜின் சுத்தமாக இயங்கவும், சில சூழல்களில் ஓட்டும் அனுபவம் மேம்படவும் வாய்ப்பு இருப்பதாக தெரிவிக்கப்பட்டுள்ளது. மேலும், E20 பெட்ரோலின் முக்கிய நோக்கங்களில் ஒன்று கார்பன் உமிழ்வைக் குறைப்பது.
E20 நன்மைகள்
அமைச்சகத்தின் விளக்கப்படி, இந்த எரிபொருளைப் பயன்படுத்துவதன் மூலம் கார்பன் புகை வெளியேற்றம் சுமார் 40 சதவீதம் வரை குறையக்கூடும். இதன் மூலம் காற்று மாசுபாட்டைக் கட்டுப்படுத்தவும், பசுமை இல்ல வாயு உமிழ்வைக் குறைக்கவும் தேசிய இலக்குகளுக்கும் ஆதரவாக இருக்கும் என்று அரசு கூறுகிறது. பலரிடம் இருக்கும் மற்றொரு கேள்வி, "E20 பெட்ரோல் ஏன் சாதாரண பெட்ரோலை விட மலிவாக இல்லையா?" என்பதாகும். இதற்கு அமைச்சகம் அளித்த விளக்கத்தில், எத்தனால் தயாரிக்க தேவையான விவசாயப் பொருட்களுக்கு விவசாயிகளுக்கு நியாயமான விலை வழங்கப்படும் என்று கூறப்பட்டுள்ளது.
எத்தனால் பெட்ரோல்
உதாரணமாக, மக்காச்சோளத்தில் இருந்து தயாரிக்கப்படும் ஒரு லிட்டர் எத்தனாலுக்கு அரசு ரூ.71.86 என்ற கொள்முதல் விலையை நிர்ணயித்துள்ளது. அதனுடன் போக்குவரத்து, சேமிப்பு மற்றும் வரிகள் போன்ற செலவுகளும் சேர்வதால், தற்போது E20 பெட்ரோல் விலை குறைவாக இல்லை. அதே நேரத்தில், சந்தையில் கச்சா எண்ணெய் விலை ஒரு பேரலுக்கு 120 முதல் 130 அமெரிக்க டாலர் வரை உயர்ந்தால், E20 பெட்ரோலின் பொருளாதார பலன் தெளிவாகத் தெரியும் என்று சர்வதேச அமைச்சகம் தெரிவித்துள்ளது.
மத்திய அரசு விளக்கம்
இதன் மூலம் இறக்குமதி செய்யும் கச்சா எண்ணெய் மீதான இந்தியாவின் சார்பு ஓரளவு குறையக்கூடும் என்றும் கூறப்பட்டுள்ளது. மேலும், E20 திட்டம் திடீரென அறிமுகப்படுத்தப்பட்ட திட்டம் அல்ல என்றும் மத்திய அரசு விளக்கியுள்ளது. 2001-ஆம் ஆண்டு தொடங்கப்பட்ட முன்னோட்டத் திட்டம், பல ஆண்டுகளாக வாகன உற்பத்தியாளர்கள், எண்ணெய் நிறுவனங்கள் மற்றும் சோதனை அமைப்புகளுடன் ஆலோசனை நடத்தப்பட்ட பிறகே படிப்படியாக விரிவுபடுத்தப்பட்டதாக அமைச்சகம் தெரிவித்துள்ளது. எனவே, E20 பெட்ரோலைப் பயன்படுத்தும்போது சில வாகனங்களில் மைலேஜ் சற்று குறையக்கூடும் என்பதை அரசு ஏற்றுக்கொண்டாலும், சுற்றுச்சூழல் பாதுகாப்பு, இன்ஜின் செயல்திறன் மற்றும் நீண்டகால எரிபொருள் பாதுகாப்பு போன்ற அம்சங்களைக் கருத்தில் கொண்டு இந்த எரிபொருளை மதிப்பிட வேண்டும் என்று வலியுறுத்தியுள்ளது.
