அமெரிக்க நிறுவனங்கள் இந்தியர்களை வேலைக்கு அமர்த்துவதை நிறுத்த வேண்டும் என்று டிரம்ப் வலியுறுத்தியுள்ளார். இது அமெரிக்கர்களுக்கு வேலைவாய்ப்பை அதிகரிக்கும் என்று அவர் கூறுகிறார்.
இனி இந்தியர்களை வேலைக்கு எடுக்கக் கூடாது. அமெரிக்கர்களுக்கு முன்னுரிமை கொடுக்க வேண்டும் என்று கூகுள் மற்றும் மைக்ரோசாப்ட் போன்ற தகவல் தொழில்நுட்ப நிறுவனங்களுக்கு அமெரிக்க அதிபர் டிரம்ப் மிரட்டல் விடுத்துள்ளார்.
மிரட்டும் அமெரிக்க அதிபர்
உலகம் முழுவதும் உள்ள முன்னணி தொழில்நுட்ப வளர்ச்சியில் முக்கிய பங்காற்றி வரும் இந்தியர்கள், கூகுள், மைக்ரோசாப்ட் போன்ற முன்னணி அமெரிக்க நிறுவனங்களில் முக்கிய நிலைகளை பிடித்துள்ளனர். ஆனால், தற்போதைய உலக அரசியல் சூழ்நிலையில், வெளிநாட்டு பணியாளர்களுக்கு எதிரான எண்ணங்கள் மீண்டும் தலைதூக்கத் தொடங்கியுள்ளது. குறிப்பாக, முன்னாள் அமெரிக்க அதிபர் டொனால்ட் டிரம்ப் வெளியிட்டுள்ள புதிய பேச்சு, இந்தியர்களை வேலையில் நியமிப்பதை குறைத்து, அமெரிக்கர்களுக்கு முன்னுரிமை வழங்க வேண்டும் என்ற வாதத்துடன் வருகிறது. இது தொழில்நுட்ப உலகத்தில் பெரும் விவாதத்தையும், எதிர்பாராத சிக்கல்களையும் ஏற்படுத்தி இருக்கிறது.
Related Articles
இந்தியர்களுக்கு முன்னுரிமை
வாஷிங்டனில் நடைபெற்ற செயற்கை நுண்ணறிவு (AI) மாநாட்டில் பங்கேற்ற முன்னாள் அமெரிக்க அதிபர் டொனால்ட் டிரம்ப், உலகின் முன்னணி டெக் நிறுவனங்களை கடுமையாக விமர்சித்துள்ளார். கூகுள், மைக்ரோசாப்ட், ஆப்பிள் போன்ற நிறுவனங்கள், அமெரிக்க வரம்புகளுக்குப் புறம் வேலைவாய்ப்புகளை உருவாக்கி, வெளிநாட்டு ஊழியர்களை நியமித்து வருவகார அவர் கடுமையாக குறை கூறினார்.இந்த நிறுவனங்கள் அமெரிக்காவில் உருவாகி, நம்முடைய வாய்ப்புகளை எடுத்துக்கொள்கின்றன என்றும் இந்தியா, சீனா, அயர்லாந்து போன்ற நாடுகளிலுக்கு பெரும்பாலான வேலைவாய்ப்புகள், தொழிற்சாலைகள், லாபங்கள் செல்வதாகவும் என அவர் கூறினார்.
ஐடி உலகத்தில் சாதிக்கும் இந்தியர்கள்
டிரம்பின் இந்த பேச்சு, அந்நாட்டில் நிலவும் ‘அமெரிக்க வேலைகள் அமெரிக்கர்களுக்கே’ என்ற வாதத்துக்கு வலுவூட்டியது. கடந்த காலங்களில் H1-B விசா முறைக்கு எதிராக எடுத்த நடவடிக்கைகள் மற்றும் இந்தியர் வேலை வாய்ப்புகளை குறைக்கும் திட்டங்களும் அவரது ஆட்சிக் காலத்தை புரிந்து கொள்வதற்கான முக்கிய அம்சங்களாக இருந்தன. இந்தியர்கள், குறிப்பாக தொழில்நுட்ப துறையில், அமெரிக்காவின் வளர்ச்சிக்கு பங்களித்துக் கொண்டிருப்பது சரியானதுதான். கூகுளில் சுந்தர் பிச்சை, மைக்ரோசாப்டில் சத்திய நாதெல்லா போன்ற இந்தியர்கள் CEO நிலை வரை உயர்ந்திருப்பது இதற்கான சான்று. இருப்பினும், டிரம்ப் பேச்சு வெளிநாட்டு பணியாளர்களின் எதிர்காலத்தை சந்தேகத்துக்குள்ளாக்குகிறது.
அமெரிக்காவில் வேலையில்லா திண்டாட்டம்
அத்துடன், அமெரிக்காவுக்குள் தொழிலாளர்களுக்கான வாய்ப்புகள் குறைவாக இருப்பதன் பின்னணியிலும் இந்த கருத்து வருகின்றது. அமெரிக்காவில் பல இளைஞர்கள் தொழில்நுட்ப துறையில் நுழைவதற்கான வாய்ப்புகள் குறைந்து வருவதாகவும், வேலை வாய்ப்புகள் வெளிநாடுகளுக்கு போவதைத் தடுக்கவே இத்தகைய நடவடிக்கைகள் தேவை என்பதையும் அவர் வலியுறுத்துகிறார். அதோடு, “வெளிநாடுகளில் முதலீடு செய்வதைவிட, உள்நாட்டிலேயே தொழில் வளர்ச்சி ஏற்படுத்தவேண்டும்” என்ற அவரது கருத்து, நாடுகடந்த முதலீடுகளுக்கு ஒரு எதிரொலியாகும். இது தொழில்நுட்ப நிறுவனங்களை சிக்கலான நிலைக்கு கொண்டு செல்லக்கூடும்.
கலக்கத்தில் ஐடி ஊழியர்கள்
டிரம்பின் இந்த கடுமையான எச்சரிக்கை, தொழில்நுட்ப உலகில் பெரும் அதிர்வலை ஏற்படுத்தியுள்ளது. வெளிநாட்டு பணியாளர்கள் மீதான தாக்கம் எப்போது, எப்படி நிகழும் என்பது இன்னும் தெளிவாகவில்லை. ஆனால், இந்த வகை அரசியல் கருத்துகள், உலகளாவிய வேலைவாய்ப்பின் திசையை மாற்றக்கூடிய சக்தி பெற்றவை என்பதை மறுக்க முடியாது. குறிப்பாக இந்திய தொழில்நுட்ப நிபுணர்களுக்கு இது ஒரு விழிப்புணர்வாகவும், எதிர்கால திட்டமிடலுக்கு காரணமாகவும் அமையக்கூடும்.