டாடா மோட்டார்ஸ் தனது ஹாரியர் மற்றும் சஃபாரி எஸ்யூவிகளின் புதிய பெட்ரோல் பதிப்புகளை சோதித்துள்ளது. இந்த சக்திவாய்ந்த மற்றும் அதிக மைலேஜ் தரும் மாடல்கள் விரைவில் சந்தைக்கு வரும் என எதிர்பார்க்கப்படுகிறது.
இந்திய வாகன சந்தையில் மீண்டும் கவனத்தை ஈர்த்துள்ளது டாடா மோட்டார்ஸ். அதன் பிரபலமான எஸ்யூவிகளான டாடா ஹாரியர் மற்றும் டாடா சஃபாரி ஆகியவற்றின் புதிய பெட்ரோல் பதிப்புகள் சோதனை நிலையில் வெளியாகி, ஆட்டோமொபைல் வட்டாரத்தில் பேசுபொருளாகியுள்ளது. இந்த இரண்டு மாடல்களிலும் நிறுவனம் “ஹைபீரியன்” என அழைக்கப்படும் 1.5-லிட்டர் டர்போசார்ஜ்டு பெட்ரோல் இன்ஜினை பயன்படுத்தியுள்ளது. அதிகாரப்பூர்வ அறிமுகத்திற்கு முன்பே, இந்த இன்ஜினின் செயல்திறன் பலரை ஆச்சரியப்படுத்தியுள்ளது.
சமீபத்தில் வெளியான அதிகாரப்பூர்வ வீடியோவில், இந்த புதிய ஹாரியர் மற்றும் சஃபாரி மாடல்கள் மத்தியப் பிரதேசத்தின் இந்தூரில் அமைந்துள்ள NATRAX மையத்தில் சோதனை செய்யப்படுவது காட்டப்பட்டுள்ளது. கட்டுப்படுத்தப்பட்ட சூழலில் நடைபெற்ற இந்த சோதனையின் நோக்கம், புதிய பெட்ரோல் இன்ஜினின் வேகம், சக்தி மற்றும் மைலேஜை மதிப்பிடுவதாகும். இதில் சிவப்பு நிற ஹாரியர் மற்றும் ‘ரெட் டார்க் எடிஷன்’ சஃபாரி டிராக்கில் அதிவேகமாக பாய்ந்த காட்சிகள் இடம்பெற்றுள்ளன.
வேகத்தின் விஷயத்தில், சோதனையின் போது டாடா சஃபாரி மணிக்கு 216 கிலோமீட்டர் என்ற உச்ச வேகத்தை எட்டியுள்ளது. இதன் மூலம், பெட்ரோல் எஸ்யூவி என்றாலும் சக்தியில் எந்த சமரசமும் இல்லை என்பதை டாடா நிரூபித்துள்ளது. இது நெடுஞ்சாலை பயணங்களிலும் ஓவர்டேக் சூழ்நிலைகளிலும் நம்பிக்கையை அளிக்கும் அம்சமாக பார்க்கப்படுகிறது.
Related Articles
மைலேஜ் விஷயத்தில் டாடா மோட்டார்ஸ் இன்னும் பெரிய சாதனையை பதிவு செய்துள்ளது. டாடா ஹாரியர் ஒரு லிட்டருக்கு 25.9 கிலோமீட்டர் என்ற சான்றளிக்கப்பட்ட மைலேஜை பெற்றுள்ளது. இந்த சாதனை இந்தியா புக் ஆஃப் ரெக்கார்ட்ஸில் பதிவு செய்யப்பட்டுள்ளது. மேனுவல் டிரான்ஸ்மிஷன் கொண்ட பெட்ரோல் எஸ்யூவிகளில் இதுவே இதுவரை கிடைத்துள்ள அதிகபட்ச மைலேஜ் என தெரியவந்துள்ளது. சஃபாரியும் ஒரு லிட்டருக்கு சுமார் 25 கிலோமீட்டர் மைலேஜை பதிவு செய்துள்ளது.
தொழில்நுட்ப ரீதியாக, இந்த இரண்டு கார்களிலும் உள்ள 1.5-லிட்டர், 4-சிலிண்டர் டர்போ பெட்ரோல் இன்ஜின் 170 ஹெச்.பி பவரையும், 280 என்.எம் டார்க்கையும் வழங்குகிறது. வாடிக்கையாளர்களுக்கு 6-ஸ்பீடு மேனுவல் மற்றும் 6-ஸ்பீடு டார்க் கன்வெர்ட்டர் ஆட்டோமேட்டிக் என இரண்டு டிரான்ஸ்மிஷன் தேர்வுகள் வழங்கப்படவுள்ளன. இதே ஹைபீரியன் இன்ஜினுடன் கூடிய Tata Sierra மாடலும் சோதனை செய்யப்பட்டது, 12 மணி நேர ஓட்டத்தில் 29.9 கிமீ மைலேஜும், 222 கிமீ உச்ச வேகமும் பதிவு செய்யப்பட்டது.
இந்த புதிய பெட்ரோல் ஹாரியர் மற்றும் சஃபாரி மாடல்களின் அதிகாரப்பூர்வ விலைகள் அடுத்த மாதம் அறிவிக்கப்படலாம் என எதிர்பார்க்கப்படுகிறது. அதிக மைலேஜ், சக்திவாய்ந்த இன்ஜின் மற்றும் டாடாவின் நம்பகத்தன்மை ஆகியவற்றால், இந்த பெட்ரோல் எஸ்யூவிகள் சந்தையில் உள்ள போட்டி மேலும் தீவிரப்படுத்தும் என்பதில் சந்தேகமில்லை.
