கர்நாடகா ஸ்டைல் அசத்தல் அக்கி ரொட்டி...சைட் டிஷ் கூட வேணாம்

கர்நாடகாவின் பிரபலமான உணவுகளில் அக்கி ரொட்டியும் ஒன்று. அரிசி மாவை பயன்படுத்தி செய்யப்படும் இது மிக சிறந்த பிரேக் ஃபாஸ்ட். ஆரோக்கியமான அக்கி ரொட்டியை வீட்டில் இருக்கும் குறைவான பொருட்களை வைத்தே சட்டென ஈஸியாக செய்து விடலாம்.

"அக்கி" என்றால் கன்னடத்தில் அரிசி என்று பொருள். அரிசி மாவு, காய்கறிகள் மற்றும் மசாலாப் பொருட்களைப் பயன்படுத்தி தயாரிக்கப்படும் இந்த அக்கி ரொட்டி சுவையான மற்றும் ஆரோக்கியமான பிரேக் ஃபாஸ்ட்.

அக்கி (அரிசி) ரொட்டி செய்வதற்கு தேவையான பொருட்கள்:

அரிசி மாவு - 2 கப்

வெங்காயம் - 1

துருவிய கேரட் - 1/2 கப்

பச்சை மிளகாய் - 2

கொத்தமல்லி தழை - 2 தேக்கரண்டி

கறிவேப்பிலை - ஒரு கொத்து

சீரகம் - 1 தேக்கரண்டி

உப்பு - தேவையான அளவு

எண்ணெய் - தேவையான அளவு

தண்ணீர் - தேவையான அளவு

அக்கி (அரிசி) ரொட்டி செய்முறை:

ஒரு பெரிய பாத்திரத்தில் அரிசி மாவை எடுத்துக் கொள்ளவும். அதனுடன் பொடியாக நறுக்கிய வெங்காயம், துருவிய கேரட், நறுக்கிய பச்சை மிளகாய், கொத்தமல்லி தழை, கறிவேப்பிலை, சீரகம் மற்றும் தேவையான அளவு உப்பு சேர்த்து நன்றாகக் கலக்கவும்.

வெங்காயத்தில் இருந்து ஈரப்பதம் வெளிவரும் வரை நன்கு பிசையவும். சிறிது சிறிதாக தண்ணீர் சேர்த்து மென்மையான மாவாகப் பிசைந்து கொள்ளவும். மாவு சப்பாத்தி மாவை விட சற்று தளர்வாக இருக்க வேண்டும்.

அடுப்பில் ஒரு தோசைக்கல்லை வைத்து சூடாக்கவும். பிசைந்த மாவில் இருந்து சிறிய உருண்டைகளாக எடுத்து, வாழை இலை அல்லது ஈரமான துணியின் மீது வைத்து மெல்லியதாகத் தட்டி அதன் நடுவில் சிறிய துளைகள் இட்டு சூடான தோசைக்கல்லில் போடவும். சுற்றிலும் சிறிது எண்ணெய் ஊற்றி, மிதமான தீயில் இருபுறமும் பொன்னிறமாக வேகும் வரை சுடவும். சுவையான அரிசி ரொட்டி தயார்.

பரிமாறுதல்:

அரிசி ரொட்டிக்குத் தொட்டுக்கொள்ள தேங்காய் சட்னி, வெங்காய சட்னி, தக்காளி சட்னி, அல்லது காரமான எந்தவிதமான சட்னியும் மிகவும் பொருத்தமாக இருக்கும்.

சிலர் இதனை தயிர் மற்றும் ஊறுகாயுடன் சாப்பிடவும் விரும்புவார்கள்.

அசைவ உணவுப் பிரியர்கள் கறி அல்லது குழம்புடன் சேர்த்து சாப்பிடலாம்.

காலை உணவாகவோ அல்லது இரவு உணவாகவோ இது ஒரு சிறந்த தேர்வாக இருக்கும்.

அரிசி ரொட்டியின் வகைகள்:

வெங்காயம், கேரட், பச்சை மிளகாய், கொத்தமல்லி, கறிவேப்பிலை போன்ற மசாலாப் பொருட்கள் அதிகமாக சேர்த்து மசாலா அரிசி ரொட்டயாக செய்யலாம்.

வெந்தயக் கீரையை மாவுடன் சேர்த்து வெந்தயக் கீரை அரிசி ரொட்டி செய்யலாம், இது மிகவும் சத்து நிறைந்தது.

முருங்கைக்கீரையை பயன்படுத்தி முருங்கைக்கீரை அரிசி ரொட்டி செய்யலாம்.

துருவிய தேங்காயை மாவுடன் சேர்த்து செய்தால் மென்மையான மற்றும் சுவையான தேங்காய் அரிசி ரொட்டி தயார்.

அரிசி மாவுடன், அவலை ஊறவைத்து அரைத்துச் சேர்த்தால் வித்தியாசமான அவல் அரிசி ரொட்டி தயார்.

அரிசி ரொட்டியின் நன்மைகள்:

கோதுமை ரொட்டியை விட குறைவான கலோரிகள் கொண்டது.

எளிதில் ஜீரணமாகும்.

காய்கறிகள் சேர்ப்பதால் கூடுதல் ஊட்டச்சத்துக்கள் கிடைக்கும்.

ஆற்றல் நிறைந்த காலை உணவாகவும், லேசான இரவு உணவாகவும் ஏற்றது.