Tender Coconut Halwa : இளநீர் குடித்துவிட்டு வழுக்கையைத் தூக்கிப் போடாதீங்க! அதைப் பயன்படுத்தி மென்மையான, சுவையான அல்வா செய்யலாம். வீட்டிலேயே எளிதாகத் தயாரிக்கும் முறை இதோ!
வெயில் காலத்தில் தாகம் தீர்க்க இளநீர் குடிப்பது பலருக்கும் பிடித்தமான ஒன்று. இளநீரைக் குடித்துவிட்டு, உள்ளே இருக்கும் வழுக்கையைப் பலரும் அப்படியே தூக்கிப் போட்டுவிடுவார்கள். ஆனால், அந்த மென்மையான வழுக்கையைப் பயன்படுத்தி சுவையான அல்வா செய்யலாம் என்பது உங்களுக்குத் தெரியுமா? வழக்கமாக கோதுமை, மக்காச்சோளம் உள்ளிட்ட பொருட்களை வைத்து அல்வா செய்வோம். ஆனால், இளநீர் வழுக்கை மற்றும் இளநீரைப் பயன்படுத்தியும் வித்தியாசமான சுவையில் அல்வா தயாரிக்க முடியும். இதை வீட்டிலேயே எப்படிச் செய்வது என்று பார்ப்போம்.
முதலில் இரண்டு இளநீர்களில் உள்ள வழுக்கையைத் தனியாக எடுத்துக்கொள்ளவும். அதில் இருக்கும் கடினமான ஓடுகள் அல்லது தேவையற்ற பகுதிகளை நீக்கிவிடவும். பின்னர் வழுக்கையைச் சிறிய துண்டுகளாக நறுக்கிக்கொள்ளவும். இதில் பாதி அளவு வழுக்கையை மிக்ஸியில் போட்டு, சிறிதளவு இளநீர் சேர்த்து மென்மையான விழுதாக அரைத்துக்கொள்ளவும். மீதமுள்ள வழுக்கையைச் சிறிய துண்டுகளாக நறுக்கி வைத்துக்கொள்ளவும். இதனால் அல்வாவில் வழுக்கையின் மென்மையான சுவையுடன் சிறிய துண்டுகளையும் உணர முடியும்.
ஒரு பாத்திரத்தில் சோள மாவை எடுத்துக்கொள்ளவும். அதில் சிறிது இளநீர் சேர்த்து கட்டிகள் இல்லாமல் நன்றாகக் கரைத்துக்கொள்ளவும். மீதமுள்ள இளநீரையும் சேர்த்துக் கலக்கவும். அடுப்பில் கனமான பாத்திரத்தை வைத்து சர்க்கரையுடன் சிறிதளவு தண்ணீர் சேர்த்து சூடாக்கவும். சர்க்கரை கரைந்ததும் தயாரித்து வைத்துள்ள சோள மாவுக் கலவையை மெதுவாக ஊற்றவும். இந்தக் கட்டத்தில் தொடர்ந்து கிளறிக்கொண்டே இருக்க வேண்டும். இல்லையெனில் கட்டிகள் உருவாகலாம். கலவை கெட்டியாகத் தொடங்கியதும் அரைத்த இளநீர் வழுக்கையைச் சேர்த்து நன்றாகக் கலக்கவும்.
இப்போது அடுப்பை மிதமான தீயில் வைத்து கலவையைத் தொடர்ந்து கிளறவும். கலவை கண்ணாடி போன்ற பளபளப்பான தோற்றத்தைப் பெறத் தொடங்கும். அப்போது நெய்யைச் சிறிது சிறிதாகச் சேர்த்து கிளறிக்கொண்டே இருக்கவும். பின்னர் ஏலக்காய்த்தூள், ஒரு சிட்டிகை உப்பு சேர்க்கவும். மீதமுள்ள நறுக்கிய இளநீர் வழுக்கையையும் சேர்த்து மெதுவாகக் கலக்கவும். கலவை பாத்திரத்தின் ஓரங்களில் ஒட்டாமல் திரண்டு வரத் தொடங்கும்போது அல்வா பதத்தை அடைந்துவிட்டது என்று தெரிந்துகொள்ளலாம். அதிக நேரம் அடுப்பில் வைத்தால் அல்வா மிகவும் இறுக்கமாக மாறிவிடலாம். எனவே, மென்மையான பதம் கிடைத்ததும் அடுப்பை அணைக்கவும்.
ஒரு சிறிய கடாயில் சிறிதளவு நெய் ஊற்றி முந்திரியைப் பொன்னிறமாக வறுக்கவும். தயாரித்த அல்வாவில் இதைச் சேர்த்துக் கலக்கவும். பின்னர் நெய் தடவிய தட்டில் அல்வாவைக் கொட்டி சமமாகப் பரப்பவும். சிறிது நேரம் ஆறியதும் துண்டுகளாக வெட்டி பரிமாறலாம். மென்மையான இளநீர் வழுக்கையின் சுவையும், நெய் மற்றும் ஏலக்காயின் மணமும் சேர்ந்து இந்த அல்வாவுக்கு வித்தியாசமான சுவையைக் கொடுக்கும்.
சமையல் குறிப்பு : அல்வா தயாரிக்கும்போது தொடர்ந்து கிளறுவது மிகவும் முக்கியம். சோள மாவைக் கரைக்கும்போது கட்டிகள் இல்லாமல் பார்த்துக்கொள்ளவும். மேலும், இளநீர் வழுக்கையின் அளவு மற்றும் நீர்ச்சத்தைப் பொறுத்து கலவையின் பதம் மாறலாம். எனவே, இறுதியில் தேவையான பதம் கிடைத்ததும் அடுப்பை அணைத்துவிடுங்கள்.
