தமிழ், தெலுங்கு, கன்னடம், உள்ளிட்ட பன்மொழி படங்களில் குணச்சித்திர வேடத்திலும், வில்லனாகவும் நடித்த பிரபலமானவர் சாயாஜி ஷிண்டே. தமிழில் இவர் முண்டாசுக் கவிஞன், பாரதியாரின் வாழ்க்கை வரலாறு திரைப்படத்தில் பாரதியாராக நடித்து மிகவும் பிரபலமானார். பாரதியாரின் வாழ்வியலையும் அவரது கதாபாத்திரத்தையும் தத்ரூபமாக கண் முன் நிறுத்திய பெருமை இவரையே சேரும்.
65 வயதாகும் சாயாஜி ஷிண்டேவுக்கு, இன்று காலை அவர் வீட்டில் இருக்கும் போது திடீர் என கடுமையான நெஞ்சுவலி ஏற்பட்டதை தொடர்ந்து, உடனடியாக அவரது குடும்பத்தினர், சாயாஜி ஷிண்டேவை ஹுடாஹுட்டி அருகே உள்ள தனியார் மருத்துவமனை ஒன்றில் அனுமதித்தனர். அவரை பரிசோதித்த மருத்துவர்கள், இதயத்திற்கு செல்லும் ரத்தம் குழாய்களில் அடைப்பு இருப்பதை கண்டுபிடித்தனர். இதன் பின்னர் ஆஞ்சியோபிளாஸ்டி செய்துள்ளனர். மேலும் அவரது உடல்நிலை சீராக உள்ளது என்று மருத்துவர் கூறியுள்ளனர்.