Captain : ஷக்தி செளந்தர் ராஜன் இயக்கத்தில் ஆர்யா, ஐஸ்வர்யா லட்சுமி, சிம்ரன் நடிப்பில் பிரம்மாண்டமாக உருவாகி உள்ள கேப்டன் படத்தின் டிரெய்லர் வெளியாகி உள்ளது.
இயக்குனர் வெங்கட் பிரபுவிடம் உதவி இயக்குனராக பணியாற்றியவர் ஷக்தி செளந்தர் ராஜன். இவர் கடந்த 2010-ம் ஆண்டு பிரசன்னா நடிப்பில் வெளியான நாணயம் படத்தின் மூலம் இயக்குனராக அறிமுகமானார். இதையடுத்து சிபிராஜ் நடித்த நாய்கள் ஜாக்கிரதை படத்தை இயக்கிய அவர், அப்படத்தில் நாய்க்கும் மனிதனுக்கும் இடையேயான அன்பை நேர்த்தியாக வெளிப்படுத்தி வெற்றி கண்டார்.
இதையடுத்து ஜெயம் ரவியை வைத்து மிருதன் என்கிற ஜாம்பி படத்தை இயக்கினார். அதுவரை ஹாலிவுட்டில் மட்டுமே ஜாம்பி படங்களை பார்த்து வந்த ரசிகர்களுக்கு இது ஒரு புது அனுபவமாக இருந்தது. தமிழில் வெளியான முதல் ஜாம்பி படம் இதுவாகும். இதையடுத்து டிக் டிக் டிக் படத்தை இயக்குனார் ஷக்தி. விண்வெளியை மையமாக வைத்து அவர் இப்படத்தை இயக்கி இருந்தார்.
இதையடுத்து டெடி என்கிற படத்தை இயக்கினார். இப்படத்தில் ஆர்யா நாயகனாக நடித்திருந்தார். இதில் கிராபிக்ஸ் முறையில் டெடி கதாபாத்திரம் ஒன்றும் இடம்பெற்று இருந்தது. அதைப்பார்த்த ரசிகர்கள் அது தத்ரூபமாக இருந்ததாக பாராட்டுக்களையும் தெரிவித்தனர். குழந்தைகள் மத்தியில் இப்படம் மிகபெரிய அளவில் பாப்புலர் ஆனது.
இதையும் படியுங்கள்... கம்பேக் கொடுக்க ரெடியான ரஜினி - நெல்சன் காம்போ.. மாஸான போஸ்டருடன் முக்கிய அப்டேட்டை வெளியிட்ட ஜெயிலர் படக்குழு
இவ்வாறு தொடர்ந்து ஹாலிவுட் தரத்திலான படங்களை தமிழில் கொடுத்து வரும் இயக்குனர் ஷக்தி செளந்தர் ராஜன், தற்போது அதே பாணியில் இயக்கியுள்ள படம் தான் கேப்டன். ஹாலிவுட்டின் பிரிடேட்டர் பட பாணியில் ஏலியன்களை வைத்து ஒரு வித்தியாசமான படமாக இதனை உருவாக்கி உள்ளார் ஷக்தி. இதில் நடிகர் ஆர்யா ராணுவ அதிகாரியாக நடித்திருக்கிறார்.
இந்நிலையில், கேப்டன் படத்தின் அதிகாரப்பூர்வ டிரெய்லர் இன்று வெளியிட்டுள்ளது. இதைப் பார்த்த ரசிகர்கள், ஹாலிவுட் ரேஞ்சில் இருப்பதாக பாராட்டி வருகின்றனர். கேப்டன் திரைப்படம் வருகிற செப்டம்பர் 8-ந் தேதி திரையரங்குகளில் ரிலீசாக உள்ளது. இப்படத்தை உதயநிதியின் ரெட் ஜெயண்ட் மூவீஸ் நிறுவனம் வெளியிடுகிறது.
இதையும் படியுங்கள்... Captain Trailer : ஏலியனா...? இருக்கலாம்... - அசத்தும் கேப்டன் டிரெய்லர்!