ரஷ்யாவிடம் இருந்து எண்ணெய் வாங்குவதை இந்தியா குறைத்துள்ளதால், இந்தியா மீது விதிக்கப்பட்டிருந்த வரிகள் நீக்கப்படும் என்றும் அவர் குறிப்பிட்டுள்ளார். இந்த ஒப்பந்தம் இரு நாடுகளுக்கும் நன்மை பயக்கும் என எதிர்பார்க்கப்படுகிறது.
அமெரிக்க அதிபர் டொனால்ட் டிரம்ப் இந்தியா-அமெரிக்க உறவைப் பற்றிய முக்கிய அறிவிப்பை வெளியிட்டுள்ளார். "பிரதமர் நரேந்திர மோடியுடன் எங்களுக்கு மிகச் சிறந்த உறவு உள்ளது. விரைவில் இந்தியாவுடன் ஒரு புதிய வர்த்தக ஒப்பந்தம் ஏற்படும் என எதிர்பார்க்கப்படுகிறது" என அவர் தெரிவித்துள்ளார். இந்த புதிய ஒப்பந்தம், முந்தைய ஒப்பந்தத்தை விட முற்றிலும் வித்தியாசமானதாக இருக்கும் என்றும், அதன் பிறகு இந்தியா மீது விதிக்கப்பட்டிருந்த பெரும் வரிகளை நீக்குவோம் என்றும் டிரம்ப் தெரிவித்துள்ளார்.
இந்தியா பற்றி டிரம்ப்
இந்தியாவுக்கான புதிய அமெரிக்க தூதர் செர்ஜியோ கோர் பதவியேற்பு விழாவில் பேசிய டிரம்ப், “நாங்கள் ஒரு நியாயமான வர்த்தக ஒப்பந்தத்தை மேற்கொள்வோம். முந்தைய ஒப்பந்தம் நியாயமானதாக இல்லை. தற்போது ஒப்பந்தத்தின் இறுதிக்கட்டத்தில் உள்ளோம், இது இரு நாடுகளுக்கும் நன்மை பயக்கும்,” என்று கூறினார். மேலும், “இந்தியா தற்போது எங்களை விரும்பாமல் இருக்கலாம், ஆனால் எதிர்காலத்தில் அவர்கள் மீண்டும் எங்களை விரும்புவார்கள் என்று எண்ணுகிறேன்,” எனவும் டிரம்ப் தெரிவித்தார்.
Related Articles
வரிக் குறைப்பும் ரஷ்ய எண்ணெய் விவகாரமும்
இதுபற்றி டிரம்ப் மேலும் கூறியதாவது, “இந்தியா ரஷ்யாவிடமிருந்து எண்ணெய் வாங்கியதால் அதிக வரி விதிக்கப்பட்டது. ஆனால் தற்போது அவர்கள் ரஷ்ய எண்ணெய் வாங்குவதை குறைத்துள்ளனர். எனவே, இந்தியா மீது விதிக்கப்பட்ட வரியை நாங்கள் குறைப்போம்.” இதன் மூலம், இந்தியா மீதான பொருளாதார அழுத்தம் தளருமென எதிர்பார்க்கப்படுகிறது.
முக்கிய பொருளாதார கூட்டாளர்
இந்தோ-பசிபிக் பிராந்தியத்தில், அமெரிக்காவிற்கு இந்தியா ஒரு முக்கிய பொருளாதாரம் மற்றும் பாதுகாப்பு கூட்டாளி. இதன் மூலம், இரு நாடுகளின் பொருளாதார மற்றும் ராணுவ உறவு மேலும் வலுப்பெற வாய்ப்பு உள்ளது.
செர்ஜியோ கோர் புதிய தூதராக பதவியேற்பு
வாஷிங்டனில் நடைபெற்ற விழாவில், டிரம்பின் நம்பிக்கைக்குரிய செர்ஜியோ கோர், இந்தியாவுக்கான அமெரிக்க தூதராக செவ்வாய்க்கிழமை பதவியேற்றார். தற்போது வர்த்தக ஒப்பந்தம் தொடர்பான விவாதங்கள் நடந்து வரும் நிலையில், அவரது பதவியேற்பு முக்கியத்துவம் பெறுகிறது.
41 நாள் அரசு முடக்கம் முடிவு
வரலாற்றிலேயே நீண்ட 41 நாள் அரசு முடக்கம் விரைவில் முடிவுக்கு வரவுள்ளது. அரசு செலவின மசோதா குறித்து ஆளும் மற்றும் எதிர்க்கட்சிகளுக்கிடையே ஏற்பட்ட மோதலால் அக்டோபர் 1 முதல் அரசு முடக்கம் ஏற்பட்டது. இதனால் சுமார் 13 லட்சம் அரசு ஊழியர்கள் சம்பளமின்றி தவித்தனர். தற்போது ஜனநாயகக் கட்சியின் சில பிரதிநிதிகள் சமரசத்திற்கு வந்ததால், செனட் சபை மசோதாவுக்கு ஒப்புதல் அளித்துள்ளது. இதன் மூலம் நிர்வாகம் மீண்டும் இயல்பு நிலைக்கு திரும்பும் என எதிர்பார்க்கப்படுகிறது.