இரண்டு நாள் பயணமாக அமெரிக்கா வந்தடைந்த பிரதமர் மோடி, அதிபர் டிரம்ப்புடன் இருதரப்பு பேச்சுவார்த்தை நடத்தினார். வர்த்தகம், பாதுகாப்பு மற்றும் தொழில்நுட்ப ஒத்துழைப்பு உள்ளிட்ட பல்வேறு விஷயங்கள் குறித்து விவாதிக்கப்பட்டது. அமெரிக்காவில் உள்ள இந்தியர்கள் மோடிக்கு உற்சாக வரவேற்பு அளித்தனர்.
Narendra Modi US Visit: பிரதமர் நரேந்திர மோடி இரண்டு நாள் பயணமாக அமெரிக்கா வந்தடைந்தார். வாஷிங்டன் டி.சி. விமான நிலையத்தில் அவர் தரையிறங்கினார். இந்தப் பயணத்தின்போது, அமெரிக்க அதிபர் டொனால்ட் டிரம்ப் (Donald Trump) உடன் இருதரப்புப் பேச்சுவார்த்தை நடத்தினார்.
இந்தியா-அமெரிக்கா உறவை மேம்படுத்துவது குறித்து இரு தலைவர்களும் விவாதித்தனர். வர்த்தகம், எரிசக்தி, பாதுகாப்பு, தொழில்நுட்பக் கூட்டுறவு மற்றும் மூலோபாய ஒத்துழைப்பு உள்ளிட்ட பல்வேறு விஷயங்கள் குறித்துப் பேசப்பட்டது.
வாஷிங்டன் வந்தடைந்த மோடி, டிரம்ப்பை சந்திக்க ஆவலாக உள்ளேன் என்றார்
இந்தியா-அமெரிக்கக் கூட்டாண்மையை வலுப்படுத்த அதிபர் டிரம்ப்பைச் சந்திக்க ஆவலாக உள்ளேன் என்று மோடி X-ல் பதிவிட்டார். "சிறிது நேரத்திற்கு முன்பு வாஷிங்டன் டி.சி. வந்தடைந்தேன். அதிபர் டொனால்ட் டிரம்ப்பைச் சந்தித்து, இந்தியா-அமெரிக்க கூட்டாண்மையை வலுப்படுத்த ஆவலாக உள்ளேன்" என்று அவர் எழுதினார்.
டொனால்ட் டிரம்பின் இரண்டாவது பதவிக் காலத்தில் நரேந்திர மோடியின் முதல் அமெரிக்கப் பயணம் இதுவாகும். இஸ்ரேல் பிரதமர் பெஞ்சமின் நெதன்யாகு, ஜப்பானின் ஷிகேரு இஷிபா மற்றும் ஜோர்டான் மன்னர் அப்துல்லா II ஆகியோருக்குப் பிறகு, டிரம்பின் இரண்டாவது பதவிக் காலத்தில் சந்திக்கும் நான்காவது உலகத் தலைவர் மோடி ஆவார்.
அமெரிக்காவில் உள்ள இந்தியர்கள் மோடிக்கு உற்சாக வரவேற்பு
"உலகின் மிகச் சிறப்பு வாய்ந்த ஹோட்டல்" என்று அழைக்கப்படும் பிளேர் ஹவுஸில் நரேந்திர மோடி தங்கியிருந்தார். அங்கு வந்த அவரை அமெரிக்காவில் வசிக்கும் இந்தியர்கள் உற்சாகமாக வரவேற்றனர். கைகளில் இந்திய தேசியக் கொடியையும் அமெரிக்கக் கொடியையும் ஏந்தியபடி ஏராளமானோர் அங்கு கூடியிருந்தனர். மோடி அவர்களைச் சந்தித்து வாழ்த்து தெரிவித்தார்.
துளசி கப்பார்டை சந்தித்தார் நரேந்திர மோடி
வாஷிங்டன் டி.சி.யில் அமெரிக்க தேசியப் புலனாய்வு இயக்குநர் துளசி கப்பார்டை பிரதமர் மோடி சந்தித்தார். அவர் நியமிக்கப்பட்ட சில மணி நேரங்களுக்குப் பிறகு இந்தச் சந்திப்பு நடைபெற்றது.
