நடிகர் விஜய், தமிழக வெற்றிக் கழகம் சார்பில் முதல் முறையாக சட்டமன்றத் தேர்தலில் போட்டியிட்டார். வாக்கு எண்ணிக்கை நடைபெற்று வரும் நிலையில், பிரச்சாரத்தின் போது ஏற்பட்ட விபத்துகள் மற்றும் தற்போதைய சூழல் காரணமாக அவரது இல்லத்திற்கு பலத்த போலீஸ் பாதுகாப்பு போடப்பட்டுள்ளது. ரசிகர்கள் வாகனங்களை பின்தொடர வேண்டாம் என காவல்துறை எச்சரித்துள்ளது.
தமிழகத்தில் ஏப்ரல் 23ஆம் தேதி நடைபெற்ற சட்டமன்றத் தேர்தலுக்குப் பிறகு, இன்று வாக்கு எண்ணிக்கை நடைபெற்று வருகிறது. இந்த சூழலில், நடிகரும் தமிழக வெற்றிக் கழகத் தலைவருமான விஜய் போட்டியிட்டதால், அவரது நகர்வுகள் மீது ரசிகர்கள் அதிக கவனம் செலுத்தி வருகின்றனர்.
முதல் தேர்தல்: இரண்டு தொகுதிகளில் போட்டி
இந்தத் தேர்தல் விஜய்க்கு அரசியல் அறிமுகமாக அமைந்துள்ளது. அவர் பெரம்பூர் மற்றும் திருச்சி கிழக்கு ஆகிய இரு முக்கிய தொகுதிகளில் களம் கண்டுள்ளார். தமிழகம் முழுவதும் அவரது கட்சியான TVK சார்பில் பல வேட்பாளர்கள் போட்டியிட்டதால், இந்த தேர்தல் அதிக பரபரப்பை ஏற்படுத்தியுள்ளது.
Related Articles
பிரச்சாரத்தில் ஏற்பட்ட விபத்துகள்
விஜய் பிரச்சாரத்தின் போது ரசிகர்கள் கூட்டம் அதிகரித்தது. குறிப்பாக கரூரில் நடந்த நிகழ்வில் ஏற்பட்ட கூட்ட நெரிசலில் 41 பேர் உயிரிழந்தது பெரும் அதிர்ச்சியை ஏற்படுத்தியது. மேலும், பல இடங்களில் அவரது வாகனத்தை பின்தொடர்ந்த ரசிகர்கள் விபத்துகளில் சிக்கிய சம்பவங்களும் பதிவாகின.
பாதுகாப்பு நடவடிக்கைகள் தீவிரம்
வாக்கு எண்ணிக்கை நடைபெறும் நிலையில், விஜய் இல்லம் செல்லும் வழியில் கபாலீஸ்வரர் நகர் பகுதியில் காவல்துறையினர் கடும் கட்டுப்பாடுகளை விதித்துள்ளனர். அந்த பகுதியில் பேரிகேட்கள் அமைத்து வாகனங்களின் நுழைவை தற்காலிகமாக கட்டுப்படுத்தியுள்ளனர்.
ரசிகர்களுக்கு நேரடி அறிவுரை
"விஜய் வெளியே செல்லும் போது அவரது வாகனத்தை யாரும் பின்தொடர வேண்டாம். விதிமுறைகளை மீறினால் வாகனங்கள் பறிமுதல் செய்யப்படும்" என்று காவல்துறை எச்சரித்துள்ளது. இருசக்கர வாகனங்களில் ஆபத்தான பயணம் தவிர்க்கவும், அதிக கூட்டம் கூடாமல் இருக்கவும் அறிவுறுத்தப்பட்டுள்ளது. அக்கரை முதல் நீலாங்கரை வரை 300க்கும் மேற்பட்ட போலீசார் பாதுகாப்பு பணியில் ஈடுபட்டுள்ளனர்.
