கொள்ளையர்களை அடித்து விரட்டிய வீரத் தம்பதிக்கு "வீர தீர விருது" !! - முதல்வர் வழங்குகிறார்..
நெல்லையில் கொள்ளையர்களை அடித்து விரட்டிய வயதான தம்பதிக்கு மாநில அரசின் வீரதீர செயல்களுக்கான விருது வழங்கப் பட இருப்பதாக தகவல் வெளியாகியுள்ளது .
நெல்லை மாவட்டம் அம்பாசமுத்திரம் அருகே உள்ள கல்யாணிபுரத்தை சேர்ந்தவர் சண்முகவேல் (68 ).இவரது மனைவி செந்தாமரை (65 ). சண்முகவேல் அங்குள்ள நூற்பாலை ஒன்றில் வேலை பார்த்து ஓய்வு பெற்றுள்ளார் . இவர்களுக்கு இரண்டு மகன்கள் , ஒரு மகள் .அனைவருக்கும் திருமணம் ஆகி வெளியூரில் வசித்து வருகின்றனர்.
இந்த நிலையில் நேற்று முன்தினம் இரவு சண்முகவேல் வீட்டின் முன்பு அமர்ந்து செய்தித்தாள் வாசித்து கொண்டிருந்தார் . அப்போது பின் பக்கமாக வந்த கொள்ளையன் ஒருவன் அவர் கழுத்தில் துண்டை கட்டி இறுக்கியுள்ளான் . இதனால் அதிர்ச்சி அடைந்த சண்முகவேல் கூச்சல் போட்டுள்ளார் . சத்தம் கேட்டு வெளியே வந்த செந்தாமரை கொள்ளையனை கையில் கிடைத்த பொருள்களை கொண்டு எறிந்து தாக்கி உள்ளார் . உடனே மற்றொரு கொள்ளையன் வந்து செந்தாமரையை தாக்கியுள்ளான். அதற்குள் சுதாரித்து எழுந்த சண்முகவேல் இரு கொள்ளையர்களை நாற்காலியை கொண்டு அடித்து விரட்டினார் . எனினும் செந்தாமரை கழுத்தில் இருந்த 4 சங்கிலியை கொள்ளயர்கள் திருடி சென்றனர் .கொள்ளையர்களோடு சண்டையிட்டதில் செந்தாமரைக்கு கையில் சிறிய காயம் ஏற்பட்டது .
தகவல் அறிந்து வந்த காவல்துறையினர் வீட்டில் இருக்கும் கண்காணிப்பு கேமராவை ஆய்வு செய்ததில் வயதான தம்பதியர்கள் இருவரும் துணிச்சலுடன் சண்டையிடும் காட்சிகள் பதிவாகி இருந்தது . இருவரையும் காவல்துறையினர் வெகுவாக பாராட்டினர். அதில் பதிவாகி இருக்கும் காட்சிகளை வைத்து கொள்ளையர்களை பிடிக்க கடையம் காவல்துறையினர் தனிப்படை அமைத்து உள்ளனர் .
வயதான தம்பதியினர் துணிச்சலுடன் கொள்ளையர்களை எதிர்த்து சண்டையிடும் காணொளி சமூக வலைத்தளங்களில் வைரலாக பரவி வருகிறது . இந்தி நடிகர் அமிதாப் பச்சன் , கிரிக்கெட் வீரர் ஹர்பஜன் சிங் ஆகியோர் அந்த தம்பதியினரை பாராட்டி ட்வீட் செய்திருந்தனர் ..
இந்த நிலையில் துணிச்சலுடன் செயல்பட்ட அவர்களை பாராட்டி மாநில அரசின் வீரதீர செயல்களுக்கான விருது வழங்கப்பட இருப்பதாக தலைமை செயலக வட்டாரங்கள் கூறுகின்றன . நெல்லை மாவட்ட ஆட்சியர் இந்த விருதிற்கு பரிந்துரைத்துள்ளதாக தெரிவிக்கின்றனர் . அம்பாசமுத்திரம் தாசில்தார் அந்த தம்பதியை சென்னை அழைத்து வர உள்ளதாக தகவல் வந்துள்ளது .
சேனலை கிளிக் செய்து பின்தொடரவும்
