Women World Cup Australia beaten the west indies by eight wickets
மகளிர் உலகக் கோப்பை கிரிக்கெட் போட்டியில் ஆஸ்திரேலிய அணி எட்டு விக்கெட் வித்தியாசத்தில் மேற்கிந்தியத் தீவுகளை துவம்சம் செய்தது.
மகளிர் உலகக் கோப்பை கிரிக்கெட் போட்டியின் நான்காவது ஆட்டம் இங்கிலாந்தின் டான்டனில் நேற்று நடைபெற்றது.
இந்த ஆட்டத்தில் முதலில் பேட் செய்த மேற்கிந்தியத் தீவுகள் அணி 47.5 ஓவர்களில் 204 ஓட்டங்களுக்கு மொத்த விக்கெட்டுகளையும் இழந்தது.
அந்த அணியில் அதிகபட்சமாக மேத்யூஸ் 46 ஓட்டங்களும், கேப்டன் டெய்லர் 45 ஓட்டங்களும், சி.என்.நேஷன் 39 ஓட்டங்களும் எடுத்தனர்.
ஆஸ்திரேலியத் தரப்பில் பெர்ரி மூன்று விக்கெட்டுகளையும், ஜொனாசென், பீம்ஸ் ஆகியோர் தலா இரண்டு விக்கெட்டுகளையும் வீழ்த்தி அசத்தினர்.
பின்னர் ஆடிய ஆஸ்திரேலிய அணியில் மூனே - போல்டான் இணை முதல் விக்கெட்டுக்கு 30.1 ஓவர்களில் 171 ஓட்டங்கள் குவித்து அதிரடி காட்டினர்.
மூனே 85 பந்துகளில் 1 சிக்ஸர், 7 பவுண்டரிகளுடன் 70 ஓட்டங்கள் குவித்து ஆட்டமிழந்தார்.
இதனையடுத்து வந்த கேப்டன் லேனிங் 12 ஓட்டங்களில் ஆட்டமிழந்தபோதும், போல்டான் சதமடித்தார்.
இறுதியில் ஆஸ்திரேலிய அணி 38.1 ஓவர்களில் இரண்டு விக்கெட் இழப்புக்கு 205 ஓட்டங்கள் எடுத்து வெற்றிப் பெற்றது.
போல்டான் 116 பந்துகளில் 14 பவுண்டரிகளுடன் 107 ஓட்டங்களும், பெர்ரி 5 ஓட்டங்களும் பெற்று ஆட்டமிழக்காமல் இருந்தனர்.
மேற்கிந்தியத் தீவுகள் தரப்பில் டெய்லர் இரண்டு விக்கெட்டுகளை வீழ்த்தினார்.
