சீன ஓபன் சூப்பர் சீரிஸ் பாட்மிண்டன் போட்டியின் முதல் சுற்றிலேயே இந்தியாவின் சாய்னா நெவால் அதிர்ச்சித் தோல்வி கண்டார்.
சீனாவின் புஜெள நகரில் நடைபெற்று வரும் இந்தப் போட்டியில் சாய்னா 16-21,
21-19, 14-21 என்ற செட் கணக்கில் தாய்லாந்தின் போர்ட்னிப்பிடம் தோல்வி கண்டார்.
ஒலிம்பிக் போட்டியின்போது சாய்னாவின் முழங்காலில் காயம் ஏற்பட்டது.
அதைத் தொடர்ந்து அறுவை சிகிச்சை செய்து கொண்ட சாய்னா, காயத்திலிருந்து மீண்ட பிறகு பங்கேற்ற முதல் போட்டியிலேயே அதிர்ச்சித் தோல்வி கண்டுள்ளார்.
போட்டித் தரவரிசையில் 7-ஆவது இடத்தில் இருக்கும் மற்றொரு இந்திய வீராங்கனையான பி.வி.சிந்து 21-12, 21-16 என்ற நேர் செட்களில் சீன தைபேவின் சியா ஷின் லீயை தோற்கடித்தார். அடுத்த சுற்றில் அமெரிக்காவின் பெய்வான் ஜங்கை சந்திக்கிறார் சிந்து.
ஆடவர் ஒற்றையர் முதல் சுற்றில் இந்தியாவின் அஜய் ஜெயராம் 21-19, 20-22, 21-17 என்ற செட் கணக்கில் சீனாவின் ஜூ சியூனை வீழ்த்தினார்.
மற்றொரு இந்திய வீரரான எச்.எஸ்.பிரணாய் 21-13, 21-13 என்ற நேர் செட்களில் ஹாங்காங்கின் லாங் ஆங்கஸை தோற்கடித்து 2-ஆவது சுற்றுக்கு முன்னேறினார்.
