முதல் ஆட்டத்தில் கனடாவிற்கு ஆட்டம் காட்டிய இந்தியா…
உலக ஜூனியர் ஹாக்கி போட்டியில் இந்தியா தனது முதல் ஆட்டத்தில் கனடாவை 4-0 என்ற கோல் கணக்கில் வெற்றி கண்டு ஆட்டம் காட்டியது.
இலக்னெளவில் உள்ள மேஜர் தயான்சந்த் செயற்கை இழை ஆடுகளத்தில் வியாழக்கிழமை நடைபெற்ற இந்த ஆட்டம், பனிப்பொழிவு காரணமாக 15 நிமிடங்கள் தாமதமாக தொடங்கியது.
இந்த ஆட்டத்தின் 35-ஆவது நிமிடத்தில் இந்தியாவுக்கான முதல் கோல் வாய்ப்பு கிடைத்தது. மன்தீப் சிங்கால் அந்த கோல் அடிக்கப்பட்டது. கனடா அணியின் தடுப்பாட்டத்தை தொடர்ந்து தகர்த்தாடிய இந்தியா, ஆட்டத்தின் 46-ஆவது நிமிடத்தில் 2-ஆவது கோல் வாய்ப்பை எட்டியது.
பின்னர் நடைபெற்ற ஆட்டத்தில் வருண் குமார் 60-ஆவது நிமிடத்திலும், அஜித் பாண்டே 66-ஆவது நிமிடத்திலும் என அடுத்தடுத்து கோல் அடித்தனர். இந்தியாவின் கோல் மழையில் மூழ்கிய கனடா, மீண்டு வருவதற்கோ, கோல் அடிப்பதற்கோ வாய்ப்பு கிடைக்கவில்லை. இறுதி வரையில் அதே நிலை தொடர்ந்ததால், இந்தியா 4-0 என்ற கோல் கணக்கில் வெற்றி பெற்றது.
கனடா அணியில் 13 பேர் இந்திய வம்சாவளி வீரர்கள் என்பது குறிப்பிடத்தக்கது.
சேனலை கிளிக் செய்து பின்தொடரவும்
