India in Group-A category Commonwealth Games Sindhu Saina Srikanth Participation ...
காமன்வெல்த் விளையாட்டுப் போட்டியில் பாட்மிண்டனில் குரூப்-ஏ பிரிவில் தேர்வாகி உள்ள இந்திய அணியில் பி.வி.சிந்து, சாய்னா நெவால், ஸ்ரீகாந்த் ஆகியோர் பங்கேற்கின்றனர்.
காமன்வெல்த் விளையாட்டுப் போட்டிகள் ஆஸ்திரேலியாவின் கோல்டு கோஸ்ட் நகரில் ஏப்ரல் 4-ஆம் தேதி தொடங்கி, 15-ஆம் தேதி வரை நடைபெறவுள்ளது.
இதில் பாட்மிண்டன் போட்டியில் கலப்பு அணிகள் பிரிவு ஆட்டங்கள் ஏப்ரல் 5-ஆம் தேதி தொடங்குகிறது.
இதில் உலகின் 3-ஆம் நிலை வீரரான ஸ்ரீகாந்த், 11-ஆம் நிலை வீரரான ஹெச்.எஸ்.பிரணாய் ஆடவர் ஒற்றையர் பிரிவில் பங்கேற்கிறார். மகளிர் ஒற்றையர் பிரிவில் சிந்து, சாய்னா களமிறங்குகின்றனர்.
ஆடவர் இரட்டையர் பிரிவில் சாத்விக்சாய்ராஜ் - சிரக் ஷெட்டி இணை முதல் முறையாக காமன்வெல்த் போட்டியில் விளையாடுகிறது.
கலப்பு இரட்டையர் பிரிவில் பிரணவ் ஜெர்ரி சோப்ரா - சிக்கி ரெட்டி இணை பலப்பரீட்சை நடத்துகிறது.
மகளிர் இரட்டையரில் சிக்கி ரெட்டி - அஸ்வினி பொன்னப்பா களமிறங்குகின்றனர். இந்தப் போட்டியில் இந்திய அணி இடம் பெற்றுள்ள 'குரூப்-ஏ'வில் பாகிஸ்தான், இலங்கை, ஸ்காட்லாந்து ஆகிய அணிகள் உள்ளன.
கலப்பு அணிகள் பிரிவு முடிவுகள் ஏப்ரல் 9-ஆம் தேதி வெளியான பிறகு, அனைத்து வீரர், வீராங்கனைகளும் தங்களது பிரிவில் தனிநபர் போட்டிகளில் ஏப்ரல் 10-ஆம் தேதி முதல் கலந்து கொள்கின்றனர். அவற்றின் இறுதி ஆட்டங்கள் 14 மற்றும் 15-ஆம் தேதிகளில் நடைபெறுகிறது.
