டெல்லியை தோற்கடித்தது நார்த் ஈஸ்ட் யுனைடட் அணி…
இந்தியன் சூப்பர் லீக் (ஐஎஸ்எல்) கால்பந்து தொடரின் 52-ஆவது லீக் ஆட்டத்தில் நார்த் ஈஸ்ட் யுனைடெட் அணி 2-1 என்ற கோல் கணக்கில் டெல்லி டைனமோஸ் அணியைத் தோற்கடித்தது.
இதன்மூலம் 5-ஆவது வெற்றியைப் பெற்றுள்ள நார்த் ஈஸ்ட் அணி, அரையிறுதி வாய்ப்பை தக்கவைத்துக் கொண்டது. அதேநேரத்தில் இந்த ஆட்டத்தில் டிரா செய்தாலே அரையிறுதி வாய்ப்பை உறுதி செய்துவிடலாம் என்ற நிலையில் களமிறங்கிய டெல்லி அணிக்கு ஏமாற்றமே மிஞ்சியது.
குவாஹாட்டியில் புதன்கிழமை நடைபெற்ற இந்த ஆட்டத்தின் முதல் பாதியில் கோல் எதுவும் விழவில்லை. பின்னர் நடைபெற்ற 2-ஆவது பாதி ஆட்டத்தில் இரு அணிகளும் கோலடிப்பதில் தீவிரம் காட்ட, விறுவிறுப்பு ஏற்பட்டது.
60-ஆவது நிமிடத்தில் நார்த் ஈஸ்ட் அணி ஆட்டத்தின் முதல் கோலை அடித்தது. டிடியர் கோல் கம்பத்தை நோக்கி தூக்கியடித்த பந்தை கைப்பற்றிய சைதன்யா, டெல்லி பின்கள வீரர்கள் மற்றும் கோல் கீப்பரை வீழ்த்தி இந்த கோலை அடித்தார்.
இதன்பிறகு உத்வேகம் பெற்ற நார்த் ஈஸ்ட் அணி 70-ஆவது நிமிடத்தில் அடுத்த கோலை அடித்தது.
ராபர்ட் கொடுத்த பாஸை பெனால்டி பாக்ஸுக்கு வெளியில் வைத்து வாங்கிய ரொமாரிச், மிக வேகமாக முன்னேறிச் சென்று 10 "யார்ட்' தூரத்தில் இருந்து கோலடித்தார்.
கடைசி 10 நிமிடங்கள் கோலடிப்பதில் தீவிரம் காட்டிய டெல்லி அணி, கோல் கம்பத்தை நோக்கி 6 ஷாட்களை அடித்தது. ஆனால் ஒன்றுகூட கோலாகவில்லை. அதேநேரத்தில் நார்த் ஈஸ்ட் அணியும் தாக்குதல் ஆட்டத்தைக் கையாண்டது.
கடுமையாகப் போராடிய டெல்லி அணிக்கு "இஞ்சுரி' நேரத்தில் மார்செலோ மூலம் ஒரு கோல் கிடைத்தது. எனினும் தோல்வியைத் தவிர்க்க முடியவில்லை.
சேனலை கிளிக் செய்து பின்தொடரவும்
