Asianet News Tamil

#INDvsENG அக்ஸர் படேலிடம் மண்டியிட்டு சரணடைந்த இங்கிலாந்து..! வெறும் 112 ரன்களுக்கு பொட்டளம்

3வது டெஸ்ட் போட்டியின் முதல் இன்னிங்ஸில் அக்ஸர் படேல் மற்றும் அஷ்வினின் சுழலை சமாளிக்க முடியாமல் வெறும் 112 ரன்களுக்கு சுருண்டது இங்கிலாந்து அணி.
 

england all out for 112 runs in first innings of pink ball test and axar patel got 6 wickets for india
Author
Ahmedabad, First Published Feb 24, 2021, 6:38 PM IST
  • Facebook
  • Twitter
  • Whatsapp

இந்தியா இங்கிலாந்து இடையேயான 3வது டெஸ்ட் போட்டி பகலிரவு போட்டியாக அகமதாபாத் நரேந்திர மோடி ஸ்டேடியத்தில் இன்று தொடங்கி நடந்துவருகிறது. 2.30 மணிக்கு போட்டி தொடங்கியது.

டாஸ் வென்று முதலில் பேட்டிங் ஆடிவரும் இங்கிலாந்து அணியின் தொடக்க வீரர் டோமினிக் சிப்ளி, 3வது ஓவரிலேயே ரன்னே அடிக்காமல் இஷாந்த் சர்மாவின் பந்தில் டக் அவுட்டாகி வெளியேறினார்.

இதையடுத்து, 3ம் வரிசையில் இறங்கிய பேர்ஸ்டோவும் டக் அவுட்டானார். 7வது ஓவரை தனது முதல் ஓவராக வீசிய அக்ஸர் படேல், அந்த ஓவரின் முதல் பந்திலேயே பேர்ஸ்டோவை வீழ்த்த, இங்கிலாந்து கேப்டன் ஜோ ரூட்டை 17 ரன்னில் அஷ்வின் எல்பிடபிள்யூ ஆக்கி அனுப்பினார்.

ஒருமுனையில் விக்கெட்டுகள் சரிந்தாலும் மறுமுனையில் பவுண்டரிகளாக விளாசி அரைசதம் அடித்த க்ராவ்லி, 84 பந்தில் 10 பவுண்டரிகளுடன் 53 ரன்கள் அடித்திருந்த நிலையில், அக்ஸர் படேலின் சுழலில் அவரும் எல்பிடபிள்யூ ஆகி வெளியேறினார். அக்ஸர் படேலின் எந்த பந்து திரும்புகிறது, எந்த பந்து நேராக வருகிறது என்பதை கணிக்கமுடியாமல் ஆட்டமிழந்தார் க்ராவ்லி. 

80 ரன்களுக்கே 4 விக்கெட்டுகளை இழந்துவிட்ட இங்கிலாந்து அணி, முதல் செசன் முடிவில், 4 விக்கெட் இழப்பிற்கு 81 ரன்கள் அடித்திருந்த நிலையில், 2வது செசனின் முதல் ஓவரிலேயே போப்பை அஷ்வின் ஒரு ரன்னில் வீழ்த்த, ஆர்ச்சரை 11 ரன்னில் அக்ஸர் படேல் கிளீன் போல்டாக்க, ஜாக் லீச்சை 3 ரன்னில் அஷ்வின் வீழ்த்தினார்.

அருமையாக வீசிக்கொண்டிருந்த அக்ஸர் படேலின் பந்தில் பெரிய ஷாட்டுக்கு போன ஸ்டூவர்ட் பிராட், பும்ராவிடம் கேட்ச் கொடுத்து வெளியேற, மறுமுனையில் நிலைத்து நின்று இந்திய சுழற்பந்துவீச்சை சமாளித்து ஆடிய பென் ஃபோக்ஸிற்கு ஸ்லோ டெலிவரி வீசி கிளீன் போல்டாக்கினார் அக்ஸர் படேல்.

இதையடுத்து முதல் நாளான இன்றைய ஆட்டத்தின் 2வது செசனிலேயே வெறும் 112 ரன்களுக்கே முதல் இன்னிங்ஸில் சுருண்டது இங்கிலாந்து அணி. இந்திய அணி சார்பில் அபாரமாக வீசிய அக்ஸர் படேல் அதிகபட்சமாக 6 விக்கெட்டுகளையும், அஷ்வின் 3 விக்கெட்டுகளையும் இஷாந்த் சர்மா ஒரு விக்கெட்டையும் வீழ்த்தினார். இதையடுத்து முதல் இன்னிங்ஸை தொடங்கி ஆடிவருகிறது இந்திய அணி.
 

Follow Us:
Download App:
  • android
  • ios