2021ம் ஆண்டின் சிறந்த டெஸ்ட் லெவனை தேர்வு செய்துள்ளது கிரிக்கெட் ஆஸ்திரேலியா.
2021ம் ஆண்டின் சிறந்த டெஸ்ட் லெவனை ஆஸ்திரேலிய கிரிக்கெட் வாரியமான கிரிக்கெட் ஆஸ்திரேலியா தேர்வு செய்துள்ளது.
2021ம் ஆண்டில் இந்தியாவிலும், இங்கிலாந்திலும் டெஸ்ட் கிரிக்கெட்டில் மிகச்சிறப்பாக ஆடி ஸ்கோர் செய்ததுடன், இந்திய அணியின் வெற்றிகளில் முக்கிய பங்காற்றிய ரோஹித் சர்மாவை தொடக்க வீரராக கிரிக்கெட் ஆஸ்திரேலியா தேர்வு செய்துள்ளது. குறிப்பாக இங்கிலாந்தில் நடந்த டெஸ்ட் தொடரில் மிகச்சிறப்பாக, முதிர்ச்சியான ஆட்டத்தை வெளிப்படுத்தினார் ரோஹித் சர்மா.
எனவே ரோஹித் சர்மாவையும், அவருடன் இலங்கையின் திமுத் கருணரத்னேவையும் தொடக்க வீரர்களாக தேர்வு செய்துள்ள கிரிக்கெட் ஆஸ்திரேலியா, கருணரத்னேவையே கேப்டனாகவும் நியமித்துள்ளது.
3ம் வரிசையில் ஆஸ்திரேலிய அணியின் நட்சத்திர இளம் வீரரான மார்னஸ் லபுஷேனை தேர்வு செய்துள்ளது. இங்கிலாந்துக்கு எதிராக நடந்துவரும் ஆஷஸ் டெஸ்ட் தொடரில் சிறப்பாக ஆடி டெஸ்ட் தரவரிசையில் ரூட்டை பின்னுக்குத்தள்ளி முதலிடத்தை பிடித்த லபுஷேனை 2021ம் ஆண்டின் சிறந்த டெஸ்ட் லெவனின் 3ம் வரிசை வீரராக தேர்வு செய்துள்ளது கிரிக்கெட் ஆஸ்திரேலியா.
ஐசிசி டெஸ்ட் தரவரிசையில் 2ம் இடத்தில் இருப்பவரும், இங்கிலாந்து அணிக்கு பேட்டிங்கில் தனி நபராக பங்களிப்பு செய்துவருபவருமான ஜோ ரூட்டை 4ம் வரிசையில் தேர்வு செய்துள்ளது கிரிக்கெட் ஆஸ்திரேலியா. ஐசிசி உலக டெஸ்ட் சாம்பியன்ஷிப்பை வென்ற நியூசிலாந்து அணியின் கேப்டனும் சமகால கிரிக்கெட்டின் தலைசிறந்த வீரர்களில் ஒருவருமான கேன் வில்லியம்சனை கிரிக்கெட் ஆஸ்திரேலியா தேர்வு செய்யவில்லை.
5ம் வரிசை வீரராக பாகிஸ்தானின் ஃபவாத் ஆலமையும், விக்கெட் கீப்பராக ரிஷப் பண்ட்டையும் தேர்வு செய்துள்ள கிரிக்கெட் ஆஸ்திரேலியா, ஸ்பின்னர்களாக இந்தியாவின் அஷ்வின் மற்றும் அக்ஸர் படேல் ஆகிய இருவரையும், ஃபாஸ்ட் பவுலர்களாக கைல் ஜாமிசன், ஹசன் அலி மற்றும் ஷாஹீன் அஃப்ரிடி ஆகிய மூவரையும் தேர்வு செய்துள்ளது கிரிக்கெட் ஆஸ்திரேலியா.
கிரிக்கெட் ஆஸ்திரேலியா தேர்வு செய்த 2021ம் ஆண்டின் சிறந்த டெஸ்ட் லெவன்:
ரோஹித் சர்மா, திமுத் கருணரத்னே (கேப்டன்), மார்னஸ் லபுஷேன், ஜோ ரூட், ஃபவாத் ஆலம், ரிஷப் பண்ட் (விக்கெட் கீப்பர்), ரவிச்சந்திரன் அஷ்வின், கைல் ஜாமிசன், அக்ஸர் படேல், ஹசன் அலி, ஷாஹீன் அஃப்ரிடி.
