பாகிஸ்தானுக்கு எதிரான 2வது டி20 போட்டியிலும் 7 விக்கெட் வித்தியாசத்தில் வெற்றி பெற்ற ஆஃப்கானிஸ்தான் அணி, பாகிஸ்தானுக்கு எதிராக முதல் முறையாக டி20 தொடரை வென்று சாதனை படைத்தது.
ஆஃப்கானிஸ்தான் - பாகிஸ்தான் இடையேயான 3 டி20 போட்டிகள் கொண்ட தொடர் ஷார்ஜாவில் நடந்துவருகிறது. முதல் போட்டியில் ஆஃப்கானிஸ்தான் அணி முதல் முறையாக டி20 கிரிக்கெட்டில் பாகிஸ்தானை வீழ்த்தி 1-0 என முன்னிலை வகித்த நிலையில், 2வது டி20 போட்டியில் டாஸ் வென்ற பாகிஸ்தான் அணி பேட்டிங்கை தேர்வு செய்தது.
பாகிஸ்தான் அணி:
சயிம் அயுப், முகமது ஹாரிஸ், அப்துல்லா ஷாஃபிக், டயாப் தாஹிர், அசாம் கான் (விக்கெட் கீப்பர்), ஷதாப் கான் (கேப்டன்), முகமது நவாஸ், இமாத் வாசிம், நசீம் ஷா, ஜமான் கான், ஈசானுல்லா.
ஆஃப்கானிஸ்தான் அணி:
ரஹ்மானுல்லா குர்பாஸ் (விக்கெட் கீப்பர்), இப்ராஹிம் ஜட்ரான், உஸ்மான் கனி, நஜிபுல்லா ஜட்ரான், முகமது நபி, கரிம் ஜனத், அஸ்மதுல்லா ஓமர்ஸாய், ரஷீத் கான் (கேப்டன்), முஜீபுர் ரஹ்மான், ஃபஸல்ஹக் ஃபரூக்கி, நவீன் உல் ஹக்.
முதலில் பேட்டிங் ஆடிய பாகிஸ்தான் அணி பேட்டிங்கில் சொதப்பியது. இமாத் வாசிம் பொறுப்புடன் பேட்டிங் ஆடி அரைசதம் அடித்தார். 57 பந்தில் 65 ரன்கள் அடித்தார் இமாத் வாசிம். கேப்டன் ஷதாப் கானும் பொறுப்புடன் ஆடி 25 பந்தில் 32 ரன்கள் அடித்து இன்னிங்ஸை முடித்து கொடுத்தார். இவர்கள் இருவரைத்தவிர மற்ற அனைவருமே படுமோசமாக சொதப்பியதால் 20 ஓவரில் பாகிஸ்தான் அணி வெறும் 130 ரன்கள் மட்டுமே அடித்தது.
131 ரன்கள் என்ற இலக்கை விரட்டிய ஆஃப்கானிஸ்தான் அணியின் தொடக்க வீரர் உஸ்மான் கனி வெறும் 7 ரன்களுக்கு ஆட்டமிழந்தாலும், மற்றொரு தொடக்க வீரரான ரஹ்மானுல்லா குர்பாஸ் 44 ரன்கள் அடித்து கொடுத்தார். இப்ராஹிம் ஜட்ரான் நிதானமாக ஆடி 38 ரன்கள் அடித்தார். அதன்பின்னர் நஜிபுல்லா ஜட்ரான்(12 பந்தில் 23 ரன்கள்) மற்றும் முகமது நபி (9 பந்தில் 14 ரன்கள்) ஆகிய இருவரும் அடித்து ஆடி கடைசி ஓவரில் இலக்கை எட்டி ஆட்டத்தை முடித்து கொடுத்தனர்.
7 விக்கெட் வித்தியாசத்தில் இந்த போட்டியில் வெற்றி பெற்ற ஆஃப்கானிஸ்தான் அணி, முதல் முறையாக பாகிஸ்தானுக்கு எதிராக டி20 தொடரை வென்று சாதனை படைத்தது.
