இறந்த பின்னர் ஆன்மாவுக்கு என்ன நடக்கும்? அது நம் வீட்டில் எத்தனை நாட்கள் தங்கி இருக்கும்? என்பது குறித்து கருட புராணம் சில தகவல்களை கூறுகிறது. அது குறித்து இந்த பதிவில் பார்க்கலாம்.
இறந்தவரின் ஆன்மா எத்தனை நாள் வீட்டில் இருக்கும்?
கருட புராணம் இந்து மதத்தின் முக்கியமான புராணங்களில் ஒன்றாகும். இது மரணம், ஆன்மாவின் பயணம், மறுபிறவி மற்றும் மோட்சம் பற்றிய விளக்கங்களை அளிக்கிறது. இந்த புராணம் பகவான் விஷ்ணு மற்றும் கருடன் இடையேயான உரையாடலாக அமைந்துள்ளது. மரணத்திற்குப் பிறகு ஆன்மாவின் பயணம் குறித்து கருட புராணம் பல முக்கியமான கருத்துகளை விளக்குகிறது. இந்த பதிவில் ஒருவர் இறந்த பிறகு அவரது ஆன்மா எத்தனை நாட்கள் வீட்டில் இருக்கும்? ஆன்மா எத்தனை நாட்களுக்குப் பிறகு மேலோகத்தை அடையும் என்பது குறித்து விரிவாகப் பார்க்கலாம்.
கருட புராணத்தின்படி ஒரு மனிதன் இறந்தவுடன் அவரது ஆன்மா உடலை விட்டு பிரிகிறது. ஆனால் அந்த ஆன்மா உடனடியாக எமலோகம் அல்லது பித்ருலோகத்திற்கு செல்வதில்லை. மாறாக தனது முன்னாள் வாழ்க்கையுடன் தொடர்புடைய இடங்களில், குறிப்பாக இறந்தவரின் வீட்டில் சில நாட்கள் தங்கி இருக்கும் என்று கருட புராணம் கூறுகிறது. கருட புராணத்தின் படி ஆன்மா பொதுவாக 13 நாட்கள் வரை இறந்தவரின் வீட்டிலோ அல்லது அவர்களது உறவினர்கள் மத்தியிலோ இருக்கும் என்று கருதப்படுகிறது. இந்த 13 நாட்கள் இறந்தவரின் ஆன்மாவிற்கு இந்த உலகத்தினுடைய பந்தத்தை மெதுவாக அறுக்க உதவுவதாகவும், மறு உலக பயணத்திற்கு தயாராக உதவுவதாகவும் கூறப்படுகிறது.
முதல் 10 நாட்கள் ஆன்மாவுக்கு என்ன நடக்கும்?
மரணத்திற்குப் பிறகு முதல் மூன்று நாட்கள் ஆன்மா தனது உடலை விட்டு பிரிந்தாலும், இந்த உலகத்துடனான தொடர்பை முழுமையாக துண்டிக்காது. ஆன்மா தனது உறவினர்கள் வீடு மற்றும் முன்பு வாழ்ந்த இடங்களுடன் தொடர்பு கொள்கிறது. இந்த காலத்தில் ஆன்மா தனது மரணத்தை முழுமையாக உணர்ந்து ஏற்றுக் கொள்ள மறுக்கிறது. இந்த காலகட்டத்தில் இறந்தவரின் குடும்பத்தினர் சில முக்கியமான சடங்குகளை செய்கின்றனர். பிண்ட தானம், அன்னதானம் ஆகியவை இதில் அடங்கும்.
Related Articles
நான்கு முதல் பத்து நாட்கள் வரை ஆன்மா மெல்ல மெல்ல உலகத்துடனான பற்றுக்களை விடுவதற்கு தயாராகிறது. இந்த நாட்களில் குடும்பத்தினர் செய்யும் சடங்குகள் ஆன்மாவிற்கு அமைதியையும், மறு உலக பயணத்திற்கு தேவையான ஆற்றலையும் அளிக்கின்றன. கருட புராணத்தின்படி இந்த நாட்களில் ஆன்மா தனது கர்ம வினைகளுக்கு ஏற்ப மறு உலகிற்கு செல்ல தயாராகிறது.
13 ஆம் நாள் முடிந்து யமலோக பயணம்
13 ஆம் நாள் மிகவும் முக்கியமானது. இந்த நாளில் ஆன்மா இந்த உலகத்தை விட்டு முழுமையாக எமலோகம் அல்லது பித்ருலோகத்திற்கு செல்கிறது. இந்த நாளில் நடைபெறும் சடங்கு ஆன்மாவை முழுமையாக பித்ருலோகத்திற்கு அனுப்புவதற்கு உதவுகிறது. இந்த நாளில் இறந்தவரின் குடும்பத்தினர் தர்ப்பணம், பிண்டதானம் ஆகியவை செய்வது வழக்கம். 13-வது நாளுக்குப் பிறகு எமதர்மராஜாவின் தூதர்கள் ஆன்மாவை அழைத்துச் செல்கின்றனர். இந்த பயணம் ஒரு வருடம் வரை நீடிக்கும் என்றும், ஆன்மா செல்லும் வழியில் 16 நகரங்களை கடக்க வேண்டும் என்றும் கருட புராணம் கூறுகிறது.
இந்த பயணத்தில் ஆன்மா வைதரணி என்கிற நதியை கடக்க வேண்டும். ஒருவர் வாழ்நாளில் செய்த நல்ல கர்மாக்களின் அடிப்படையில் இந்த நதியை கடப்பது எளிதாகவோ அல்லது கடினமாகவோ இருக்கும். பசு தானம் செய்தவர்கள் இந்த நதியை எளிதாக கடப்பார்கள் என்றும், பாவிகள் நதியை கடக்க முடியாமல் துன்பப்படுவார்கள் என்றும் ஒரு கருட புராணம் கூறுகிறது.
மேலோகம் சென்ற பிறகு என்ன நடக்கும்?
கருட புராணம் செய்த பாவங்களுக்கு ஏற்ற தண்டனைகளையும், புண்ணியங்களுக்கு ஏற்ற பலன்களையும் விவரிக்கிறது. யமதர்மராஜாவின் நீதிமன்றத்தில் ஆன்மாவானது அதன் கர்மாவிற்கு ஏற்ப தீர்ப்புகளை பெறுகிறது. குடும்பத்தினர் தொடர்ந்து செய்யும் சடங்குகள், தான தர்மங்கள் ஆகியவை இறந்தவரின் ஆன்மாவிற்கு நற்பலன்களை அளித்து அதன் பயணத்தை எளிதாக்குவதாக நம்பப்படுகிறது. சரியான சடங்குகள் மற்றும் நல்ல கர்மாக்களின் அடிப்படையில் ஆன்மா மோட்சம் அடைகிறது அல்லது மறுபிறவி அடைகிறது.
ஆன்மாவின் கர்ம வினைகளைப் பொறுத்து நல்ல கர்மங்கள் செய்தவர்கள் மேலோகங்களுக்கும், மற்றவர்கள் தங்கள் கர்மத்திற்கு ஏற்ப யமலோகத்தில் தண்டனை அனுபவிப்பதாகவும் கருட புராணம் கூறுகிறது. ஆனால் இந்து மதத்தின் பல பிரிவினர்கள் இந்த கூற்றை பொதுவாக ஏற்றுக் கொண்டாலும் வெவ்வேறு பிராந்தியங்களில் உள்ள மரபுகள் நம்பிக்கைகளில் சிறு வேறுபாடுகள் இருக்கலாம். தென்னிந்திய மரபுகளில் 13 நாட்கள் கவனமாக பின்பற்றப்படுகின்றன. இந்த நாட்களில் பல சடங்குகள் செய்யப்படுகின்றன. வட இந்திய மரபுகளில் 10 நாட்கள் 13 நாட்கள் அல்லது 16 நாட்கள் வரை சடங்குகள் நடைபெறுகின்றன.
இந்து மதத்தின் ஆழமான நம்பிக்கைகள்
சுருக்கமாக இறந்த பிறகு ஒரு ஆன்மா உடனடியாக உலகை விட்டு பிரிவதில்லை. சுமார் 13 நாட்கள் வரை அது குடும்பத்தினருடன் தங்கி இருக்கும், அந்த காலத்தில் செய்யப்படும் சடங்குகள் ஆன்மாவின் இறுதிப் பயணத்திற்கு மிகவும் அவசியம் என்று கருட புராணம் கூறுகிறது. இந்த நம்பிக்கைகள் இறப்புக்குப் பிறகு வாழ்க்கை பற்றிய இந்து மதத்தின் ஆழமான தத்துவங்களை உணர்த்துகின்றன.