சர்வதேச யோகா தினத்தில் பிரதமர் மோடி, யோகா உலக அமைதிக்கு வழிவகுக்கும் என்று கூறினார். 'ஒரு பூமி, ஒரு ஆரோக்கியம்' என்ற கருப்பொருளில் அனைவரும் யோகா செய்ய வேண்டும் என்றும் வலியுறுத்தினார்.
இன்று 11வது சர்வதேச யோகா தினம் உலகம் முழுவதும் கொண்டாடப்படுகிறது. விசாகப்பட்டினத்தில் நடந்த நிகழ்ச்சியில் பிரதமர் நரேந்திர மோடி கலந்துகொண்டு பேசினார்.
"இன்றைய உலகில் பல இடங்களில் சண்டைகளும், பிரச்சனைகளும் அதிகமாக உள்ளன. இப்படிப்பட்ட நேரத்தில், யோகா நமக்கு மன அமைதியைத் தருகிறது" என்று பிரதமர் மோடி கூறினார்.
அவர் மேலும் பேசுகையில், "யோகா என்றால் இணைப்பது என்று அர்த்தம். யோகா உலகம் முழுவதையும் இணைத்திருப்பது எனக்கு மிகவும் மகிழ்ச்சியாக உள்ளது" என்றார்.
Related Articles
'ஒரு பூமி, ஒரு ஆரோக்கியம்'
இந்த ஆண்டு யோகா தினத்தின் முக்கிய நோக்கம் 'ஒரு பூமிக்கு யோகா, ஒரு ஆரோக்கியத்திற்கு யோகா' என்பதாகும். அதாவது, பூமியில் உள்ள அனைவரின் ஆரோக்கியமும் ஒன்றோடொன்று தொடர்புடையது என்று மோடி விளக்கினார். நாம் உண்ணும் உணவு, குடிக்கும் நீர், நம்முடன் வாழும் விலங்குகள், தாவரங்கள் என எல்லாவற்றின் ஆரோக்கியமும் முக்கியம் என்றார். யோகா நமக்கு இந்தத் தொடர்பைப் புரிந்துகொள்ள உதவுகிறது எனவும் குறிப்பிட்டார்.
எல்லாருக்கும் யோகா!
யோகா, நாடு, மொழி, வயது என எந்த எல்லைகளும் இல்லாமல் அனைவருக்கும் உரியது என்று பிரதமர் மோடி தெரிவித்தார். பார்வையற்றவர்கள் பிரெய்ல் முறையில் யோகா கற்றுக்கொள்வதையும், விண்வெளியில் விஞ்ஞானிகள் யோகா செய்வதையும், கிராமங்களில் இளைஞர்கள் யோகா போட்டிகளில் பங்கேற்பதையும் கண்டு பெருமைப்படுவதாகக் கூறினார்.
11 ஆண்டுகளாக உலகைக் கவர்ந்த யோகா!
2014 ஆம் ஆண்டு ஐக்கிய நாடுகள் சபையில் இந்தியா யோகா தினத்தை கொண்டாட முன்மொழிந்தது. குறுகிய காலத்தில் 175 நாடுகள் அதை ஏற்றுக்கொண்டன. இது யோகாவின் உலகளாவிய சக்தியைக் காட்டுவதாக பிரதமர் மோடி தெரிவித்தார். சிட்னி ஓபரா ஹவுஸ் முதல் எவரெஸ்ட் சிகரம் வரை, கடலின் ஆழம் வரை "யோகா அனைவருக்கும் உரியது" என்ற செய்தி பரவியுள்ளது என்றும் அவர் கூறினார்.
