ஸ்ரீ நாராயண குருவுக்கும் மகாத்மா காந்திக்கும் இடையிலான வரலாற்று சிறப்புமிக்க உரையாடலின் நூற்றாண்டு விழாவில் பிரதமர் மோடி கலந்துகொண்டார். இந்தச் சந்திப்பு சுதந்திரப் போராட்டத்திற்கு புதிய திசை கொடுத்தது என்றார்.
ஸ்ரீ நாராயண குருவுக்கும் மகாத்மா காந்திக்கும் இடையிலான வரலாற்று சிறப்புமிக்க உரையாடலின் நூற்றாண்டு விழா நிகழ்வில் பிரதமர் நரேந்திர மோடி இன்று (செவ்வாய்க்கிழமை) கலந்துகொண்டு பேசினார். இந்தச் சந்திப்பு நமது சுதந்திரப் போராட்டத்திற்கு ஒரு புதிய திசையைக் கொடுத்தது மட்டுமல்லாமல், சுதந்திர இந்தியாவின் கனவிற்கும் ஒரு உறுதியான அர்த்தத்தைக் கொடுத்தது என்று பிரதமர் மோடி தெரிவித்துள்ளார்.
புதுடெல்லியில் உள்ள விக்யான் பவனில் நடைபெற்ற நூற்றாண்டு விழாவில் உரையாற்றிய பிரதமர் மோடி, "நமது நாட்டின் வரலாற்றில் ஒரு முக்கிய சம்பவத்தை நினைவுகூர இந்த வளாகம் சாட்சியாகிறது; நமது சுதந்திரப் போராட்டத்திற்கு ஒரு புதிய திசையைக் காட்டியது மட்டுமல்லாமல், சுதந்திரத்தின் இலக்கிற்கும், சுதந்திர இந்தியாவின் கனவிற்கும் ஒரு உறுதியான அர்த்தத்தைக் கொடுத்த ஒரு வரலாற்று சம்பவம் இது. 100 ஆண்டுகளுக்கு முன்பு ஸ்ரீ நாராயண குருவும் மகாத்மா காந்தியும் சந்தித்தது இன்றும் ஊக்கமளிப்பதாகவும், பொருத்தமானதாகவும் உள்ளது" என்று கூறினார்.
ஒரு நூற்றாண்டுக்குப் பிறகும், அந்தச் சந்திப்பு சமூக நல்லிணக்கத்திற்கும், வளர்ந்த இந்தியாவை நோக்கிய நமது கூட்டு இலக்குகளுக்கும் ஆற்றல் ஆதாரமாகத் தொடர்ந்து செயல்படுகிறது என்று பிரதமர் தெரிவித்தார்.
Related Articles
நாராயண குரு - வழிகாட்டு ஒளி:
"ஸ்ரீ நாராயண குருவின் லட்சியங்கள் மனிதகுலம் முழுவதற்கும் ஒரு சிறந்த பொக்கிஷமாகும். தேசத்திற்கும் சமூகத்திற்கும் சேவை செய்வதற்கான உறுதியுடன் செயல்படுபவர்களுக்கு, ஸ்ரீ நாராயண குரு ஒரு வழிகாட்டும் ஒளியாக இருக்கிறார்," என்று அவர் மேலும் கூறினார்.
"இந்தியா ஒரு சிறப்பு வாய்ந்தது, ஏனெனில் நமது நாடு கஷ்டங்களின் சுழலில் சிக்கிக் கொள்ளும் போதெல்லாம், நாட்டின் ஏதோ ஒரு மூலையில் ஒரு சிறந்த ஆளுமை பிறந்து, சமூகத்திற்கு ஒரு புதிய திசையைக் காட்டுகிறார்" என்று பிரதமர் மோடி குறிப்பிட்டார். அவர்களில் சிலர் சமூகத்தின் ஆன்மீக மேம்பாட்டிற்காக உழைக்கிறார்கள் என்றும், மற்றவர்கள் சமூகத் துறையில் சமூக சீர்திருத்தங்களை விரைவுபடுத்துகிறார்கள் என்றும் அவர் மேலும் தெரிவித்தார்.
உலகளாவிய நிகழ்வுகளில் இந்தியாவின் தலைமைத்துவத்தை எடுத்துக்காட்டிய பிரதமர் மோடி, "சமீபத்தில், உலக யோகா தினத்தை கொண்டாடினோம். இந்த முறை யோகா தினத்தின் கருப்பொருள் -- ஒரு பூமி, ஒரு ஆரோக்கியம், அதாவது ஒரு கிரகம், ஒரு ஆரோக்கியம்! இதற்கு முன்பும், உலக நலனுக்காக 'ஒரு உலகம் ஒரு ஆரோக்கியம்' போன்ற முயற்சிகளை இந்தியா முன்னெடுத்தது. இன்று, இந்தியா நிலையான வளர்ச்சியை நோக்கி 'ஒரு சூரியன், ஒரு உலகம், ஒரு கட்டம்' (One Sun, One World, One Grid) போன்ற உலகளாவிய இயக்கங்களுக்கு தலைமை தாங்குகிறது. 2023 இல், இந்தியா G20 உச்சிமாநாட்டிற்கு தலைமை தாங்கியபோது, கருப்பொருள் -- ஒரு பூமி, ஒரு குடும்பம், ஒரு எதிர்காலம்" என்று எடுத்துரைத்தார்.
வசுதைவ குடும்பகம்:
"வசுதைவ குடும்பகம், அதாவது உலகம் ஒரு குடும்பம் என்ற கருத்து இந்த முயற்சிகளுடன் பின்னிப்பிணைந்துள்ளது," என்று அவர் மேலும் கூறினார்.
பிரதமர் நரேந்திர மோடி மற்றும் பிற பிரமுகர்கள் புதுடெல்லியில் ஸ்ரீ நாராயண குரு மற்றும் மகாத்மா காந்தி இடையேயான வரலாற்று உரையாடலின் நூற்றாண்டு விழாவில் 'குரு ஸ்மரணம்' நிகழ்த்தினர். இந்த கொண்டாட்டத்திற்கு ஸ்ரீ நாராயண தர்ம சங்கம் டிரஸ்ட் ஏற்பாடு செய்தது.
ஸ்ரீ நாராயண குரு மற்றும் மகாத்மா காந்தி இடையேயான வரலாற்று சிறப்புமிக்க உரையாடல் 1925ஆம் ஆண்டு மார்ச் 12ஆம் தேதி நடந்தது. மகாத்மா காந்தி சிவகிரி மடத்திற்கு வந்தபோது இந்தச் சந்திப்பு நடந்தது. வைக்கம் சத்தியாகிரகம், மத மாற்றங்கள், அகிம்சை, தீண்டாமை ஒழிப்பு, தாழ்த்தப்பட்டவர்களின் மேம்பாடு உள்ளிட்ட பல விஷயங்கள் குறித்து இருவரும் கலந்துரையாடினர்.