கர்நாடகாவின் சடச்சான் ஸ்டேட் வங்கியில், இராணுவ சீருடையில் வந்த மூன்று மர்ம நபர்கள் துப்பாக்கி முனையில் ஊழியர்களை மிரட்டி, ரூ.20 கோடி மதிப்புள்ள தங்கம் மற்றும் ஒரு கோடி ரூபாய் பணத்தை கொள்ளையடித்தனர்.
கர்நாடகாவின் சடச்சான் நகரில் உள்ள இந்திய ஸ்டேட் வங்கி கிளையில், இராணுவ சீருடையில் வந்த மூன்று முகமூடி அணிந்த மர்ம நபர்கள், துப்பாக்கிகளை வைத்துக்கொண்டு ரூ.20 கோடி மதிப்புள்ள தங்கம் மற்றும் ஒரு கோடி ரூபாய் பணத்தை கொள்ளையடித்துச் சென்றனர்.
செவ்வாய்க்கிழமை மாலை நடந்த இந்த துணிகர கொள்ளை சம்பவம் குறித்து போலீசார் கூறியதாவது:
கொள்ளையர்கள் முதலில் வங்கி ஊழியர்களை மிரட்டி, மேலாளர் மற்றும் பிற ஊழியர்களின் கைகளை கட்டி, பின்னர் கழிப்பறையில் பூட்டினர். வங்கி ஊழியர்கள் மற்றும் வாடிக்கையாளர்களின் கைகளையும் கால்களையும் பிளாஸ்டிக் பைகளால் கட்டி, அவர்களை நகரவிடாமல் செய்தனர்.
Related Articles
கொள்ளையர்களில் ஒருவர், வங்கி மேலாளரிடம், "பணத்தை எடுத்து கொடு, இல்லையென்றால் உன்னைக் கொன்றுவிடுவேன்," என்று மிரட்டினார். பின்னர் மேலாளரை வங்கியின் பாதுகாப்பு பெட்டகங்களைத் திறக்கச் செய்து, அதிலிருந்த பணத்தையும் தங்க நகைகளையும் கொள்ளையடித்துள்ளனர்.
பின்னர் கொள்ளையர்கள் தங்களுடைய பைகளில் பணம் மற்றும் வாடிக்கையாளர்களின் தங்க நகைகளை எடுத்துக்கொண்டு தப்பிச் சென்றனர். இந்த சம்பவம் குறித்து தகவல் அறிந்த சடச்சான் காவல் நிலைய கண்காணிப்பாளர் லக்ஷ்மண் நிம்பார்கியும், உயர் அதிகாரிகளும் சம்பவ இடத்திற்கு விரைந்து வந்தனர்.
போலி நம்பர் பிளேட்
ஆரம்பகட்ட விசாரணையில், கொள்ளையர்கள் ஒரு போலி நம்பர் பிளேட் கொண்ட வேனை பயன்படுத்தியது தெரியவந்துள்ளது. பின்னர் அவர்கள் பக்கத்து மாநிலமான மகாராஷ்டிராவின் பந்தர்பூர் நோக்கி தப்பிச் சென்றனர். அங்கு சோலாப்பூர் மாவட்டத்தில், அவர்கள் ஒரு விபத்தில் சிக்கி, உள்ளூர் மக்களுடன் தகராறில் ஈடுபட்டனர். பின்னர் கொள்ளையர்கள் அங்கிருந்து தப்பிச் சென்றனர் என்று போலீசார் தெரிவித்தனர்.
விஜயபுரா காவல்துறை கண்காணிப்பாளர் லக்ஷ்மண் நிம்பார்கி கூறுகையில், "குற்றவாளிகள் போலி நம்பர் பிளேட் கொண்ட ஈகோ வாகனத்தைப் பயன்படுத்தி இந்த குற்றத்தைச் செய்துள்ளனர். ஒரு இருசக்கர வாகனத்துடன் விபத்தில் சிக்கிய பிறகு, கொள்ளையடித்த பொருட்களுடன் அவர்கள் சம்பவ இடத்திலிருந்து தப்பிவிட்டனர்," என்றார்.
இந்த சம்பவம் தொடர்பாக வழக்கு பதிவு செய்யப்பட்டு, கர்நாடகா மற்றும் மகாராஷ்டிரா போலீசார் இணைந்து தேடுதல் வேட்டையில் ஈடுபட்டுள்ளனர்.