டெல்லியில் 27 ஆண்டுகளுக்கு பாஜக வெற்றி பெற்று சாதனை படைத்துள்ளது. அரவிந்த் கெஜ்ரிவாலின் ஆம் ஆத்மி கோட்டையை பாஜக கைப்பற்றியதற்கான 5 முக்கியமான காரணங்கள் குறித்து விரிவாக காணலாம்.
தலித் வாக்குகளை இழுத்தல்
ஆம் ஆத்மி இலவச மின்சாரம் மற்றும் நீர் திட்டங்களுக்காக டெல்லியின் ஏழைகளிடமிருந்து, குறிப்பாக குடிசைப் பகுதிகளில், அசைக்க முடியாத ஆதரவைப் பெற்றது. இருப்பினும், இந்த முறை, பாஜக ஒரு சக்திவாய்ந்த எதிர்-வியூகத்தை வழங்குவதன் மூலம் குறிப்பிடத்தக்க முன்னேற்றத்தை ஏற்படுத்தியது.
குடிசைவாசிகளுக்கு ஒரு பக்கா வீடு என்ற வாக்குறுதி மற்றும் தொடர்ந்து இலவச பயன்பாடுகளை உறுதி செய்தல் ஆகியவற்றுடன் இணைந்து, பாஜக ஆம் ஆத்மியின் கோட்டையை உடைக்க உதவியது. 2024 மக்களவைத் தேர்தலுக்குப் பிறகு தொடங்கிய தலித் வாக்காளர்களிடையே வளர்ந்து வரும் செல்வாக்கைப் பயன்படுத்தி, வரலாற்று ரீதியாக ஆம் ஆத்மி கட்சியுடன் இணைந்த 20 சதவீத தலித் வாக்குகளையும் பாஜக வெற்றிகரமாகப் பிரித்தது.
முஸ்லிம் வாக்காளர்கள்
டெல்லியின் 13 சதவீத முஸ்லிம் வாக்காளர்கள் பாரம்பரியமாக ஆம் ஆத்மி கட்சியை ஆதரித்து வருகின்றனர், குறிப்பாக அதிக முஸ்லிம் மக்கள் தொகை கொண்ட முக்கிய தொகுதிகளில் ஆம் ஆத்மிக்கு பெரும் செல்வாக்கு உள்ளது. ஆனாலும் இந்தத் தேர்தலில் 2020ம் ஆண்டு கலவரங்கள் நடந்த இடங்களான முஸ்தபாபாத் மற்றும் கரவால் நகர் போன்ற முஸ்லீம்கள் நிறைந்த பகுதிகளில் பாஜக வலுவான வெற்றிகளைப் பெற்றது. பாஜக வேட்பாளர்கள் மோகன் சிங் பிஷ்ட் மற்றும் கபில் மிஸ்ரா ஆகியோர் உறுதியான வெற்றிகளைப் பெற்றனர். இந்த முஸ்லீம் வாக்குகளும் பாஜகவின் வெற்றியை உறுதி செய்துள்ளன.
நடுத்தர வர்க்கத்தினரின் ஆதரவு
டெல்லியின் வாக்காளர்களில் கிட்டத்தட்ட 40 சதவீதத்தினரான நடுத்தர வர்க்கத்தினர். இவர்கள் இந்த முறை ஆம் ஆத்மி மீது கடும் அதிருப்தி கொண்டுள்ளனர். நகர உள்கட்டமைப்பு மோசமடைதல், அதிகரித்து வரும் காற்று மாசுபாடு, மோசமடைந்து வரும் யமுனை நதியின் நிலைமைகள், குழிகள் நிறைந்த சாலைகள், மோசமான குடிநீர் தரம் மற்றும் கட்டுப்படுத்தப்படாத குப்பை பிரச்சினைகள் ஆகியவற்றால் ஏற்பட்ட விரக்தி அவர்களை ஆம் ஆத்மி கட்சியிலிருந்து விலக்கியது. 8வது ஊதியக் கமிஷன் அறிவிப்பு மற்றும் ரூ.12.75 லட்சம் வரை வருமானம் ஈட்டுபவர்களுக்கு வரி நிவாரணம் ஆகியவை நடுத்தர வர்க்க வாக்காளர்களிடையே பாஜகவின் ஈர்ப்பை மேலும் அதிகரித்தன.
இலவச வாக்குறுதிகள்
2020ம் ஆண்டு தேர்தலில் ஆம் ஆத்மியின் இலவச வாக்குறுதிகளை எதிர்த்த பாஜக, இந்த முறை இலவசங்களை வாரி இறைத்தால்தான் ஆட்சியை பிடிக்க முடியும் என்பதை நன்கு புரிந்து கொண்டது. இதனால் அனைத்து இலவசத் திட்டங்களும் தொடரும் என்று வாக்காளர்களுக்கு உறுதியளித்த பாஜக, பெண்களுக்கு மாதத்திற்கு ரூ.2,500 வழங்குவதாக தெரிவித்தது. இந்த வாக்குறுதிகள் பெண் வாக்காளர்களை கவந்து இழுத்தன.
பிரதமர் மோடி அலை
ஆம் ஆத்மி கட்சிக்கு அரவிந்த் கெஜ்ரிவால் என்ற தெளிவான முதல்வர் முகம் இருந்தபோதிலும், பாஜக பிரதமர் நரேந்திர மோடியின் செல்வாக்கை மட்டுமே நம்பியிருந்தது. பாஜகவில் திட்டமிடப்பட்ட முதல்வர் வேட்பாளர் இல்லாத போதிலும், பிரதமர் மோடியின் பிரசாரம் வாக்காளர்களை சுண்டி இழுத்துள்ளது.
மாநிலத்தின் வளர்ச்சியை துரிதப்படுத்த மத்திய அரசுடன் இணைந்து செயல்படும் மாநில அரசை, இரட்டை எஞ்சின் அரசாங்கத்தை நீங்கள் அமைக்க வேண்டும் என்று மோடி டெல்லி வாக்காளர்களிடம் விடுத்த வேண்டுகோள் ஆழமாக எதிரொலித்தது. மேலும் கெஜ்ரிவாலுக்கு எதிரான ஆட்சி எதிர்ப்பை சரியாக பயன்படுத்திக் கொண்டு, உள்ளூர், தொகுதி சார்ந்த பிரசாரத்தை பாஜக மேற்கோண்டது.
