Mummy Bread : 5000 ஆண்டுகளுக்கு முந்தைய மம்மியிலிருந்து செய்யப்பட்ட ரொட்டி!
Mummy Bread : 1991-ம் ஆண்டு ஆல்ப்ஸ் மலைப்பகுதியில் கண்டெடுக்கப்பட்ட 5,000 ஆண்டுகளுக்கு முந்தைய பனி மனிதன் 'ஓட்ஸி' (Ötzi the Iceman) உடலிலிருந்து எடுக்கப்பட்ட ஈஸ்ட் மூலம், விஞ்ஞானிகள் சுவையான 'சவர்டோ' (Sourdough) வகை ரொட்டியைத் தயாரித்துள்ளனர்.
யார் இந்த ஓட்ஸி?
5,300 ஆண்டுகளுக்கு முன்பு வாழ்ந்த ஓட்ஸி, இத்தாலி-ஆஸ்திரிய எல்லைக்கு அருகில் உள்ள ஆல்ப்ஸ் மலைப்பகுதியின் பனிப்பாறைகளில் புதையுண்டு கண்டெடுக்கப்பட்டார். வரலாற்று ஆய்வாளர்களுக்கு இவர் ஒரு பொக்கிஷம். அவரது உடல்நிலை, கடைசி உணவு, ஏன் அவரது உடலில் 61 பச்சை குத்தல்கள் இருந்தன என்பது வரை பல ரகசியங்களை இந்த மம்மி உலகுக்குச் சொல்லிக்கொண்டிருக்கிறது.
மம்மியில் கிடைத்த அதிசயம்
ஐரோப்பிய மம்மி ஆய்வு நிறுவனத்தைச் (Institute for Mummy Studies at Eurac Research) சேர்ந்த விஞ்ஞானிகள், ஓட்ஸியின் உடலில் உள்ள நுண்ணுயிரிகளை ஆய்வு செய்தனர். -6 டிகிரி செல்சியஸ் குளிரிலும், பல ஆயிரம் ஆண்டுகளாக எப்படி நுண்ணுயிரிகள் உயிர்ப்புடன் இருக்கின்றன என்பதுதான் அவர்களின் முக்கிய கேள்வியாக இருந்தது. இந்த ஆய்வின் போதுதான், அந்த குளிரைத் தாங்கி வளரக்கூடிய நான்கு வகையான ஈஸ்ட் இனங்கள் கண்டறியப்பட்டன.
ரொட்டி தயாரித்த அனுபவம்
இந்த ஈஸ்ட்டைப் பயன்படுத்தி விஞ்ஞானிகள் சவர்டோ ரொட்டி தயாரிக்கும் முயற்சியில் இறங்கினர். இது குறித்து மைக்ரோபயாலஜிஸ்ட் முகமது சர்கான் கூறுகையில், "எங்கள் முதல் முயற்சி இது என்பதால், ஆரம்பத்தில் சவாலாக இருந்தது. ஆனால், இறுதியில் சாதாரண ஈஸ்ட்டைப் போலவே 24 மணி நேரத்திற்குள் மாவு நன்கு உப்பி, ரொட்டி தயாரிப்பதற்கான சரியான பதத்திற்கு வந்தது," என்று நெகிழ்ச்சியுடன் தெரிவித்துள்ளார்.
அடுத்த இலக்கு: பீர் தயாரிப்பு
வெறும் ரொட்டியுடன் நிறுத்திவிடாமல், இந்த வரலாற்றுச் சிறப்புமிக்க ஈஸ்ட் மூலம் பீர் தயாரிக்கவும் திட்டமிட்டுள்ளனர். இதற்காக ஜெர்மனியின் புகழ்பெற்ற 'வெயென்ஸ்டெஃபான்' (Weihenstephan) மதுபான ஆலை நிபுணர்களுடன் அவர்கள் ஆலோசனைகளை நடத்தி வருகின்றனர்.
இந்த ஈஸ்ட்டின் சிறப்பு என்ன?
பொதுவாக ஈஸ்ட் வெப்பமான சூழலில் தான் நன்கு செயல்படும். ஆனால், ஓட்ஸியின் உடலில் கண்டறியப்பட்ட ஈஸ்ட்கள் கடும் குளிரிலும் செயல்படக்கூடியவை. இதனால், குளிர்சாதனப் பெட்டிகளில் வைக்கப்படும் உணவுகளைத் தயாரிப்பதற்கும், ஆற்றலைச் சேமிப்பதற்கும் இந்த வகை ஈஸ்ட் எதிர்காலத்தில் பெரும் உதவியாக இருக்கும் என்று ஆராய்ச்சியாளர்கள் கருதுகின்றனர்.
எப்படியிருந்தாலும், 5,000 ஆண்டுகள் பழமையான ஒரு மம்மியின் உடலில் இருந்து எடுக்கப்பட்ட ஈஸ்ட் மூலம் தயாரிக்கப்பட்ட ரொட்டியைச் சாப்பிடுவது, காலப் பயணத்தை ஒரு வாய் உணவில் அனுபவிப்பது போன்றதுதான்!
