RBFLOAT: விண்வெளியில் ஏலியன்களின் மிகப் பிரகாசமான ரேடியோ சிக்னல்!
விண்வெளியில் இருந்து வரும் மர்மமான மற்றும் சக்திவாய்ந்த ரேடியோ அலைகள், "அதிவேக ரேடியோ வெடிப்புகள்" (FRB) என அழைக்கப்படுகின்றன. சமீபத்தில் கண்டறியப்பட்ட மிகப் பிரகாசமான அதிவேக ரேடியோ வெடிப்புக்கு RBFLOAT என்று பெயரிடப்பட்டுள்ளது.
RBFLOAT - சக்திவாய்ந்த ரேடியோ அலைகள்
விண்வெளியில் இருந்து வரும் மர்மமான மற்றும் சக்திவாய்ந்த ரேடியோ அலைகள், "அதிவேக ரேடியோ வெடிப்புகள்" (Fast Radio Bursts - FRB) என அழைக்கப்படுகின்றன. இந்த நிகழ்வு, பல மில்லி விநாடிகள் மட்டுமே நீடிக்கும். ஆனால், சூரியன் பல நாட்களில் வெளியிடும் ஆற்றலுக்கு சமமான ஆற்றலை ஒரு நொடியில் இந்த அலைகள் வெளியிடும். இதுவரை கண்டறியப்பட்ட அதிவேக ரேடியோ வெடிப்புகளிலேயே மிக பிரகாசமானது ஒன்றை சர்வதேச விஞ்ஞானிகள் குழு கண்டறிந்துள்ளது.
சமீபத்தில் கண்டறியப்பட்ட இந்த அலைக்கு "RBFLOAT" (Radio Brightest Flash Of All Time) என்று பெயரிடப்பட்டுள்ளது. இந்த ரேடியோ அலைகள், சுமார் 130 மில்லியன் ஒளி ஆண்டுகள் தொலைவில் உள்ள "உர்சா மேஜர்" (Ursa Major) விண்மீன் மண்டலத்தில் உள்ள NGC 4141 என்ற சுருள் விண்மீன் திரளில் இருந்து வந்திருப்பது கண்டறியப்பட்டுள்ளது. இந்த அலை, எந்த ஒரு ரேடியோ அலை மூலத்தையும் விட அதிக பிரகாசமாக இருந்தது.
கனடாவின் CHIME தொலைநோக்கி
"கனடியன் ஹைட்ரஜன் இன்டென்சிட்டி மேப்பிங் எக்ஸ்பெரிமென்ட்" (CHIME) எனப்படும் தொலைநோக்கியும், அதனுடன் புதிதாக இணைக்கப்பட்ட "அவுட்ரிகர்கள்" என்ற துணை அமைப்புகளும் இந்த கண்டுபிடிப்பிற்கு உதவியுள்ளன. இந்த அமைப்பு, ரேடியோ வெடிப்புகளின் இடத்தை மிகத் துல்லியமாகக் கண்டறிய உதவுகிறது. இந்த ரேடியோ வெடிப்பு, NGC 4141 விண்மீன் திரளின் விளிம்பில், புதிய நட்சத்திரங்கள் உருவாகும் பகுதிக்கு சற்று அப்பால் இருந்து வந்ததாகத் தெரியவந்துள்ளது.
'மேக்னட்டர்' என்ற நியூட்ரான் நட்சத்திரம்
இந்த கண்டுபிடிப்பு குறித்த ஆராய்ச்சியில் ஈடுபட்ட எம்.ஐ.டி இயற்பியல் பேராசிரியர் கியோஷி மசூய் கூறுகையில், "இந்த ரேடியோ வெடிப்பு நமக்கு மிக அருகில் இருப்பதால், அதை துல்லியமாக ஆய்வு செய்ய ஒரு வாய்ப்பு கிடைத்துள்ளது. இந்த அலை, சற்று பழமையான 'மேக்னட்டர்' என்ற நியூட்ரான் நட்சத்திரத்தில் இருந்து வந்திருக்கலாம்," என்று தெரிவித்தார்.
மேக்னட்டர் என்பது மிக அதிக காந்தப்புலம் கொண்ட நியூட்ரான் நட்சத்திரம் ஆகும். இந்த அலைகள் நட்சத்திரங்கள் உருவாகும் பகுதியில் இருந்து சற்று தொலைவில் இருப்பதால், அது சற்று பழமையான மேக்னட்டராக இருக்கலாம் எனக் கூறப்படுகிறது.
RBFLOAT அரிய அதிவேக ரேடியோ வெடிப்பு
சில அதிவேக ரேடியோ வெடிப்புகள் மீண்டும் மீண்டும் ஏற்படும். ஆனால், RBFLOAT ஒரு முறை மட்டுமே ஏற்பட்டுள்ள ஒரு நிகழ்வு என ஆராய்ச்சியாளர்கள் உறுதிப்படுத்தியுள்ளனர். கடந்த ஆறு வருட CHIME தரவுகளை ஆய்வு செய்தபோது, அந்த பகுதியில் இருந்து இதற்கு முன்பு எந்த ரேடியோ வெடிப்பும் கண்டறியப்படவில்லை.
இந்த கண்டுபிடிப்பு, அதிவேக ரேடியோ வெடிப்புகளின் மர்மத்தை அறிந்துகொள்ள ஒரு புதிய வழியைத் திறந்துள்ளது. இந்த அலைகள் விண்வெளியில் எப்படிப் பயணிக்கின்றன என்பதை ஆய்வு செய்வதன் மூலம், விஞ்ஞானிகள் விண்மீன்களுக்கு இடையேயான ஊடகம், காந்தப்புலங்கள் மற்றும் அடிப்படை இயற்பியல் பற்றிய பல தகவல்களை அறிந்து கொள்ளலாம்.
