150 வயசு வரை வாழலாம்.. 'ஸோம்பி' செல்களை அழித்து ஆயுளை நீட்டிக்கும் சீன மாத்திரை!
சீனாவின் லோன்வி பயோசயன்சஸ் நிறுவனம், திராட்சை விதை சத்திலிருந்து ஒரு மாத்திரையை உருவாக்கியுள்ளது. இந்த மாத்திரை 'ஸோம்பி செல்களை' அழிப்பதன் மூலம் மனித ஆயுளை 150 ஆண்டுகள் வரை நீட்டிக்க முடியும் என்று கூறுகிறது.
150 ஆண்டுகள் ஆயுள்
சீனாவின் ஷென்சென் நகரைச் சேர்ந்த லோன்வி பயோசயன்சஸ் (Lonvi Biosciences) என்ற நிறுவனம், திராட்சை விதை சத்தில் இருந்து தயாரிக்கப்பட்ட ஒரு மாத்திரையை அறிமுகப்படுத்தியுள்ளது. இந்தக் காப்ஸ்யூல் மாத்திரை மனிதர்களின் ஆயுளை 150 ஆண்டுகள் வரை நீட்டிக்க முடியும் என்று அந்நிறுவனம் கூறியுள்ளது.
ரஷ்ய செய்தி நிறுவனமான RBC-யின் அறிக்கையின்படி, "150 ஆண்டுகள் வரை வாழ்வது என்பது நிச்சயமாக யதார்த்தமானதுதான். இன்னும் சில ஆண்டுகளில், இது ஒரு நிஜமாக மாறும்." என லோன்வி பயோசயன்சஸ் நிறுவனத்தின் தலைமைத் தொழில்நுட்ப அதிகாரி லியூ கிங்ஹுவா (Liu Qinghua) கூறியுள்ளார்.
எலிகளின் ஆயுள் அதிகரிப்பு
இந்த மருந்துப் பொருளை அளிக்கப்பட்ட ஆய்வக எலிகள், ஒட்டுமொத்தமாக 9.4% அதிக காலம் வாழ்ந்தன. சிகிச்சை தொடங்கிய முதல் நாளிலிருந்து கணக்கிட்டால், அவை 64.2% அதிக காலம் வாழ்ந்தன என்று நிறுவனம் தெரிவித்துள்ளது.
இந்த மாத்திரைகள், திராட்சை விதைகளில் இருந்து பிரித்தெடுக்கப்பட்ட ஒரு மூலக்கூறான புரோசயனிடின் சி1 (PCC1)-ஐச் செறிவூட்டுகின்றன. ஷாங்காயில் நடத்தப்பட்ட முந்தைய ஆய்வுகள் இந்த PCC1 மூலக்கூறு, கொறித்துண்ணிகளின் (rodents) ஆயுட்காலத்தை அதிகரிப்பதுடன் தொடர்புடையது என்று கண்டறிந்தன.
லோன்வி பயோசயன்சஸ் நிறுவனம், இந்தச் சேர்மம் “ஸோம்பி செல்கள்” (Zombie Cells) எனப்படும் வயதான செல்களை அழிக்கிறது என்று கூறுகிறது. இந்த ஸோம்பி செல்கள் பிரிவதை நிறுத்திய போதிலும், தொடர்ந்து உடலில் அழற்சியைத் (inflammation) தூண்டும் செல்கள் ஆகும். அதே நேரத்தில், இந்த மாத்திரை ஆரோக்கியமான திசுக்களைப் பாதுகாக்கிறது என்றும் நிறுவனம் தெரிவித்துள்ளது.
100 வயதுக்கு மேல் வாழலாம்
நிறுவனத்தின் தலைமை நிர்வாக அதிகாரி இப் ஸு (Ip Zhu), “இது மற்றொரு சாதாரண மாத்திரை அல்ல” என்று தெரிவித்துள்ளார்.
ஆரோக்கியமான வாழ்க்கை முறை மற்றும் முறையான மருத்துவ சிகிச்சையுடன் இந்தக் காப்ஸ்யூல்களை எடுத்துக் கொண்டால், மக்கள் 100 வயதுக்கு மேலும், ஒருவேளை 120 வயது வரையிலும் வாழ முடியும் என்று நிறுவனத்தின் விஞ்ஞானிகள் வாதிடுகின்றனர்.
ஷாங்காய் குழு PCC1 பற்றிய கண்டுபிடிப்புகளை வெளியிட்ட சிறிது காலத்திலேயே, 2022-ஆம் ஆண்டில் லோன்வி பயோசயன்சஸ் தனது முக்கிய ஆய்வகத்தைத் திறந்தது. உயிரியல் அறிவியலில் (geroscience) முன்னேற்றம் மிக வேகமாக இருப்பதால், "மரணத்தை ஒத்திப்போடுவது" சாத்தியமாகலாம் என்று இப் ஸு கருதுகிறார். மேலும், "ஐந்து முதல் பத்து ஆண்டுகளுக்குள், புற்றுநோயால் யாரும் பாதிக்கப்பட மாட்டார்கள்" என்றும் அவர் நம்பிக்கை தெரிவித்துள்ளார்.
உலகத் தலைவர்கள் ஆர்வம்
சீன அரசு, செயற்கை நுண்ணறிவு மற்றும் உயிரித் தொழில்நுட்பத்துடன் சேர்த்து, ஆயுள் நீட்டிப்பு ஆராய்ச்சியைத் தேசிய முன்னுரிமையாக அறிவித்துள்ளது.
ரஷ்ய அதிபர் விளாடிமிர் புடினை சீன அதிபர் ஜி ஜின்பிங், மக்கள் "விரைவில் 150 ஆண்டுகள் வரை வாழக்கூடும்" என்று கூறினார். புதின் மேம்பட்ட உறுப்பு மாற்று முறைகள் "அழியாமையைக்" (immortality) கொண்டுவரக்கூடும் என்று கூறியதாகவும் RBC மற்றும் TASS செய்தி நிறுவனங்கள் தெரிவித்தன.
இந்த PCC1 காப்ஸ்யூல் மனிதர்களுக்கு அளிக்கும் பலன்கள், எலிகளில் காணப்பட்ட அதே பலன்களுடன் பொருந்துமா என்பது இன்னும் நிரூபிக்கப்படவில்லை. இருப்பினும், நிறுவனத்தின் இந்த துணிச்சலான அறிவிப்பு உலக அளவில் கவனத்தை ஈர்த்துள்ளது.