Kim Jong Un Death Rumours: கிம் ஜாங் உன் உயிரிழப்பா? வடகொரியா வெளியிட்ட போட்டோக்கள் எழுப்பும் சந்தேகங்கள்!

Kim Jong Un Death Rumours: வடகொரிய அதிபர் கிம் ஜாங் உன் மூளை ரத்தக்கசிவால் இறந்துவிட்டதாக ஒரு செய்தி தீயாய் பரவி வருகிறது. இதற்கு முற்றுப்புள்ளி வைக்கும் விதமாக சில புகைப்படங்கள் வெளியாகியுள்ளன. இந்த மரண வதந்தியின் பின்னணி என்ன?

Image Credit : X

கிம் ஜாங் உன் இறந்து விட்டாரா?

வடகொரிய அதிபர் கிம் ஜாங் உன் பற்றி அடிக்கடி ஏதாவது ஒரு வதந்தி பரவுவது வழக்கமான ஒன்றுதான். கடந்த சில நாட்களாகவே அவர் எந்தவொரு பொது நிகழ்ச்சியிலும், அரசு விழாக்களிலும் கலந்து கொள்ளவில்லை. இதற்கிடையே, அவருக்கு திடீரென மூளை ரத்தக்கசிவு (Cerebral haemorrhage) ஏற்பட்டு மயங்கி விழுந்ததாகவும், உடனடியாக மருத்துவமனையில் அனுமதிக்கப்பட்டும் அவர் சிகிச்சை பலனின்றி உயிரிழந்துவிட்டதாகவும் ஒரு செய்தி பரவியது.

சோஷியல் மீடியாவில் 'RIP Kim Jong Un' என பலரும் பதிவிடத் தொடங்கினர். கடந்த இரண்டு நாட்களாக இந்த செய்தி காட்டுத்தீ போல பரவிய நிலையில், கிம் ஜாங் உன் உயிருடன் இருப்பதை உறுதிப்படுத்தும் புகைப்படங்களை வடகொரியா தற்போது வெளியிட்டுள்ளது. வடகொரியாவின் அதிகாரப்பூர்வ செய்தி நிறுவனமான சென்ட்ரல் நியூஸ் ஏஜென்சி (KCNA) இந்த புகைப்படங்களை வெளியிட்டுள்ளது.

Image Credit : X

புகைப்படங்களை வெளியிட்ட வடகொரியா

திங்கள்கிழமை (அக். 19) வடகொரியாவில் நடந்த ஒரு பெரிய கண்காட்சி மற்றும் விற்பனை மையத்தை கிம் ஜாங் உன் பார்வையிட்டதாக அந்த செய்தி நிறுவனம் தெரிவித்துள்ளது. சோஷியல் மீடியாவில் அவரது மரண செய்தி தீவிரமாக பரவியதாலேயே, இந்த புகைப்படங்கள் அவசரமாக வெளியிடப்பட்டுள்ளன. இதன் மூலம், கிம் ஜாங் உன் மரணம் குறித்து பரவும் செய்திகள் முற்றிலும் பொய் என வடகொரியா விளக்கம் அளித்துள்ளது.

Image Credit : X

தேதியை கேள்வி எழுப்பும் நெட்டிசன்கள்

மரண வதந்திக்கு முற்றுப்புள்ளி வைக்க புகைப்படங்கள் வெளியிடப்பட்டாலும், அது மேலும் பல குழப்பங்களைத்தான் ஏற்படுத்தியுள்ளது. இந்த புகைப்படங்கள் எந்த தேதியில், எங்கு எடுக்கப்பட்டது என்ற எந்த தகவலும் அதில் இல்லை.

இதனால், இது பழைய புகைப்படங்கள் என்ற வாதம் வலுத்து வருகிறது. கிம் ஜாங் உன் நேரடியாக மக்கள் முன் தோன்ற வேண்டும், அதைவிட்டுவிட்டு இப்படி புகைப்படங்களையோ வீடியோக்களையோ வெளியிடுவது சரியான விளக்கமாக இருக்காது என சோஷியல் மீடியாவில் பலரும் கருத்து தெரிவித்து வருகின்றனர்.

Image Credit : X

மரண வதந்தி பரவியது எப்படி?

சீனாவின் ஜனநாயகக் கட்சித் தலைவர் ஷி வான்ஜுன் (Xie Wanjun) தனது உரையின் போது, வடகொரிய அதிபர் கிம் ஜாங் உன் இறந்துவிட்டதாகக் கூறினார். அதிகார மாற்றத்தின் போது ஏற்படக்கூடிய ஆபத்துகள் மற்றும் கிளர்ச்சிகளைத் தடுக்க சீனா 9,000 ராணுவ வீரர்களை வடகொரியாவுக்கு அனுப்பியுள்ளதாகவும் அவர் தெரிவித்தார். பெய்ஜிங்கில் இருந்து சிறப்பு மருத்துவர்கள் குழு வடகொரியா சென்று கிம் ஜாங் உன்னுக்கு சிகிச்சை அளித்ததாகவும், ஆனால் தீவிர மூளை ரத்தக்கசிவு காரணமாக அவர் இறந்துவிட்டதாகவும் அவர் கூறியிருந்தார்.

''மேல் சிகிச்சைக்காக கிம் ஜாங் உன் சீனாவின் பெய்ஜிங்கில் உள்ள மருத்துவமனைக்கு கொண்டு வரப்பட்டார். ஆனால் அவர் அங்கு சிகிச்சை பலனின்றி உயிரிழந்தார். வடகொரிய அரசின் உத்தரவின்படி, கிம் ஜாங் உன் குறித்த எந்த தகவலும் வெளியே சொல்லப்படவில்லை. அவரது உடல் ரகசியமாக வடகொரியாவுக்கு அனுப்பி வைக்கப்பட்டது'' என ஷி வான்ஜுன் தெரிவித்தார். இவருடைய இந்த பேச்சால்தான் கிம் ஜாங் உன் மரண செய்தி உலகெங்கும் பரவியது என்பது குறிப்பிடத்தக்கது.