ஆப்கானில் 400 உயிர்களைப் பறித்த பாகிஸ்தான்... இனி பழிவாங்குதலே வழி.. தலிபான்கன் ஆக்ரோஷம்..!

பாகிஸ்தானின் வான்வழித் தாக்குதல்களும், அதற்குப் பதிலடி கொடுப்போம் என்ற தலிபான்களின் எச்சரிக்கையும் அந்தப் பிராந்தியத்தில் பெரும் அமைதியின்மையை ஏற்படுத்தியுள்ளது.

Image Credit : x

காபூல் தாக்குதலும் பேரழிவும்

தெற்காசியாவின் புவிசார் அரசியலில் ஆப்கானிஸ்தானுக்கும் பாகிஸ்தானுக்கும் இடையிலான உறவு எப்போதும் ஒரு சிக்கலான போக்கையே கொண்டிருந்தது. ஆனால், கடந்த சில நாட்களாக இரு நாடுகளுக்கும் இடையே நிலவி வரும் மோதல் போக்கு, அதன் உச்சக்கட்டத்தை எட்டியுள்ளது. சமீபத்தில் காபூலில் நடத்தப்பட்ட தாக்குதல்கள், இரு நாடுகளுக்கு இடையே இருந்த குறைந்தபட்ச ராஜதந்திர உறவுகளையும் தகர்த்தெறிந்துள்ளது.

சமீபத்தில் திங்கட்கிழமை இரவு, ஆப்கானிஸ்தானின் தலைநகரான காபூலில் உள்ள ஒரு போதைப்பொருள் மறுவாழ்வு மையத்தை இலக்கு வைத்து பாகிஸ்தான் இராணுவம் வான்வழித் தாக்குதல்களை நடத்தியது. இந்தத் தாக்குதல் மிகவும் கொடூரமானது, ஏனெனில் இது ஒரு மருத்துவக் கட்டமைப்பை நேரடியாகக் குறிவைத்தது. தாக்குதல் நடந்த சமயத்தில் சுமார் 2,000 பேர் அந்த மையத்தில் இருந்ததாகத் தெரிகிறது. இதில் 400-க்கும் மேற்பட்டோர் உயிரிழந்துள்ளனர்.

250-க்கும் மேற்பட்டோர் படுகாயமடைந்துள்ளனர். மருத்துவமனை தரைமட்டமானதாலும், தீப்பிடித்ததாலும் பலியானவர்களின் எண்ணிக்கை மேலும் அதிகரிக்கக்கூடும் என அஞ்சப்படுகிறது. போதைப்பொருள் மறுவாழ்வு மையம் மட்டுமல்லாது, அதன் சுற்றியுள்ள பல பகுதிகளையும் பாகிஸ்தான் படைகள் தாக்கியுள்ளன.

Image Credit : X

தலிபான்களின் கடும் எச்சரிக்கை

இந்தக் கொடூரமான தாக்குதலுக்குப் பிறகு, தலிபான் அரசாங்கம் பாகிஸ்தானுக்கு எதிராக மிகக் கடுமையான நிலைப்பாட்டை எடுத்துள்ளது. தலிபான் செய்தித் தொடர்பாளர் ஜபிஹுல்லா முஜாஹித், "பாகிஸ்தானுடன் பேச்சுவார்த்தை நடத்தும் காலம் முடிந்துவிட்டது" என்று அதிகாரப்பூர்வமாக அறிவித்துள்ளார்.

ராஜதந்திர ரீதியிலான தீர்வுகள் இனி வேலை செய்யாது என்றும், பாகிஸ்தானின் இந்த அத்துமீறலுக்குத் தகுந்த பதிலடி கொடுக்கப்படும் என்றும் அவர் உறுதியளித்துள்ளார். "நாங்கள் இனி பழிவாங்கவே விரும்புவோம்" என்ற தலிபான்களின் அறிவிப்பு, எல்லைப் பகுதியில் ஒரு முழு அளவிலான போருக்கான அறிகுறியாகவே பார்க்கப்படுகிறது.

Image Credit : Asianet News

மோதலின் பின்னணி

பிப்ரவரி 21 அன்று நடந்த ஒரு தாக்குதலைத் தொடர்ந்து, இரு நாடுகளுக்கும் இடையே பதற்றம் அதிகரிக்கத் தொடங்கியது. கடந்த ஒரு மாத காலத்தில் நிலைமை மிக வேகமாக மோசமடைந்துள்ளது. ஒரு மாத காலத்திற்குள் இரு நாடுகளும் மாறி மாறி எல்லைப் பகுதிகளில் தாக்குதல்களை நடத்தியுள்ளன. இந்தத் தொடர் தாக்குதல்களால் எல்லையோரப் பகுதிகளில் வசிக்கும் ஆயிரக்கணக்கான மக்கள் தங்கள் வீடுகளை விட்டு வெளியேறி அகதிகளாக தஞ்சம் புகுந்துள்ளனர். இராணுவ வீரர்கள் மட்டுமின்றி, பெருமளவிலான பொதுமக்களும் இந்த மோதலில் பலியாகியுள்ளனர்.

Image Credit : X/Aftikhar_A2

போராக வெடிக்கும் அபாயம்

பாகிஸ்தானின் வான்வழித் தாக்குதல்களும், அதற்குப் பதிலடி கொடுப்போம் என்ற தலிபான்களின் எச்சரிக்கையும் அந்தப் பிராந்தியத்தில் பெரும் அமைதியின்மையை ஏற்படுத்தியுள்ளது. சர்வதேச சமூகம் தலையிட்டு அமைதியை நிலைநாட்டத் தவறினால், இது இரு நாடுகளுக்கு இடையிலான பெரும் போராக வெடிக்கும் அபாயம் உள்ளது. போதைப்பொருள் மறுவாழ்வு மையம் போன்ற மனிதாபிமான உதவி மையங்கள் மீதான தாக்குதல், போர்க்குற்றமாகவே கருதப்படுகிறது.