அனல் பறந்த பாலமேடு ஜல்லிக்கட்டு.. குலுக்கல் முறையில் காரைத் தூக்கிய அஜித்! டிராக்டர் வென்ற குலமங்கலம் காளை!

மாட்டுப் பொங்கலை முன்னிட்டு பாலமேட்டில் நடந்த ஜல்லிக்கட்டு போட்டியில், பொந்துகம்பட்டி அஜித் மற்றும் பொதும்பு பிரபாகரன் தலா 16 காளைகளை அடக்கி சமநிலையில் இருந்தனர். குலுக்கல் முறையில் அஜித் முதல் பரிசான காரை வென்றார்.

Image Credit : Asianet News

பாலமேடு ஜல்லிக்கட்டு

மாட்டுப் பொங்கல் பண்டிகையை முன்னிட்டு, மதுரை மாவட்டம் பாலமேட்டில் இன்று நடைபெற்ற ஜல்லிக்கட்டுப் போட்டி விறுவிறுப்பாக நடந்து முடிந்தது. காலையில் துணை முதல்வர் உதயநிதி ஸ்டாலின் போட்டியைத் தொடங்கி வைத்தார். மாலை 6.30 மணி வரை விறுவிறுப்பாக நடைபெற்ற இந்த ஜல்லிக்கட்டு போட்டியில், காளைகளும் வீரர்களும் சரிசமமாக மோதிக்கொண்டனர்.

Image Credit : Asianet News

முதல் பரிசுக்கு குலுக்கல்

இன்றைய போட்டியில் மாடுபிடி வீரர்களுக்கு இடையே கடும் போட்டி நிலவியது. இறுதிவரை விறுவிறுப்பாகச் சென்ற ஆட்டத்தில், பொந்துகம்பட்டி அஜித் மற்றும் பொதும்பு பிரபாகரன் ஆகிய இருவருமே தலா 16 காளைகளை அடக்கி சமநிலையில் (Tie) இருந்தனர்.

இதனால், முதலிடத்தைத் தேர்ந்தெடுப்பதில் சிக்கல் ஏற்பட்டதையடுத்து, விழா கமிட்டியினர் குலுக்கல் முறையைப் பயன்படுத்த முடிவு செய்தனர். அதில்:

குலுக்கலில் வெற்றி பெற்ற பொந்துகம்பட்டி அஜித்திற்கு முதல் பரிசாக புதிய கார் வழங்கப்பட்டது. மயிரிழையில் முதலிடத்தைத் தவறவிட்ட பொதும்பு பிரபாகரனுக்கு இரண்டாம் பரிசாக பைக் வழங்கப்பட்டது.

Image Credit : Asianet News

சிறந்த காளை எது?

வீரர்களுக்கு இணையாகச் சீறிப்பாய்ந்து விளையாடிய காளைகளுக்கும் சிறப்புப் பரிசுகள் வழங்கப்பட்டன:

குலமங்கலம் ஶ்ரீதரன் என்பவரின் காளை 'சிறந்த காளை'யாகத் தேர்ந்தெடுக்கப்பட்டு, அதன் உரிமையாளருக்கு டிராக்டர் பரிசாக அளிக்கப்பட்டது.

கைக்குறிச்சி தமிழ்ச்செல்வனின் காளை இரண்டாம் இடத்தைப் பிடித்தது. அவருக்கு கன்றுக்குட்டியுடன் கூடிய நாட்டுப் பசு வழங்கப்பட்டது.

Image Credit : our own

சீறிப் பாய்ந்த காளைகள்

மொத்தம் 870 காளைகள் வாடிவாசல் வழியாக அவிழ்த்துவிடப்பட்டன. அவற்றை அடக்க 671 வீரர்கள் களமிறங்கினர்.

மது அருந்தியது மற்றும் உடல் எடை குறைவாக இருந்தது போன்ற காரணங்களுக்காக 24 வீரர்கள் போட்டியிலிருந்து நீக்கப்பட்டனர். பலத்த போலீஸ் பாதுகாப்புடன் நடைபெற்ற இந்தப் போட்டியில் காயமடைந்தவர்களுக்கு அங்கேயே மருத்துவ சிகிச்சைகளும் அளிக்கப்பட்டன.