LIC Hindi Language Imposition: ஒன்று சேர்ந்த முதல்வர் ஸ்டாலின், எடப்பாடி பழனிசாமி! எந்த விஷயத்தில் தெரியுமா?

லைஃப் இன்சூரன்ஸ் கார்ப்பரேஷன் ஆஃப் இந்தியா ( எல்ஐசி ) என்பது மும்பையை தலைமையிடமாகக் கொண்ட ஒரு இந்திய பன்னாட்டு பொதுத்துறை ஆயுள் காப்பீட்டு நிறுவனமாகும் . இது இந்தியாவின் மிகப்பெரிய காப்பீட்டு நிறுவனமாகும். இந்நிலையில் எல்ஐசியின் இணையதளம் ஆங்கிலத்தில் இருந்து வந்த நிலையில், இன்று காலை முகப்பு முழுமையாக இந்தி மொழிக்கு மாற்றப்பட்டது. மொழி என்பதை குறிக்கும் என்ற ஆப்ஷனை கிளிக் செய்து அதில் ஆங்கிலத்தை தேர்வு செய்தால் மட்டும்தான் ஆங்கில பக்கத்திற்கு செல்லும் வகையில் வடிவமைக்கப்பட்டிருந்தது. மொழித் தேர்வு ஆப்ஷன் கூட இந்தியில்தான் இருந்தது.

இந்நிலையில், எல்ஐசி இணையதளம் இந்தி மொழியில் மாற்றப்பட்டது பெரும் சர்ச்சையை ஏற்படுத்திய நிலையில், பாலிசிதாரர்கள் பலர் சமூக வலைதளத்தில் கருத்துகளை பதிவிட்டு வந்தனர். இதற்கு முதல்வர் மு.க.ஸ்டாலின், எதிர்க்கட்சி தலைவர் எடப்பாடி பழனிசாமி ஆகியோர் ஒன்று சேர்ந்து மத்திய அரசை கடுமையாக விமர்சித்து கண்டனம் தெரிவித்துள்ளனர். 

இதுதொடர்பாக முதல்வர் மு.க.ஸ்டாலின் வெளியிட்டுள்ள எக்ஸ் தளத்தில்: எல்ஐசி இணையதளம் இந்தி திணிப்புக்கான பிரச்சார கருவியாக பயன்படுத்தப்படுகிறது. ஆங்கிலத்திற்கு மாற்றினாலும் இந்திலேயே தோன்றுகிறது. இது இந்தியாவின் பன்முகத்தன்மையை மிதித்து, பலவந்தமாக கலாச்சார மற்றும் மொழி திணிக்கும் செயல். எந்த தைரியத்தில் எல்ஐசி இப்படி பெருபான்மை இந்திய  மக்களுக்கு துரோகம் இழைக்கிறது? தவிர வேறில்லை. எல்ஐசி அனைத்து இந்தியர்களின் ஆதரவுடன் வளர்ந்தது. அதன் பங்களிப்பாளர்களில் பெரும்பான்மையினரைக் காட்டிக்கொடுக்க எவ்வளவு தைரியம்? இந்த மொழியியல் கொடுங்கோன்மையை உடனடியாக திரும்ப பெற வேண்டும் என்று கூறியுள்ளார். 

அதேபோல் அதிமுக பொதுச்செயலாளர் எடப்பாடி பழனிசாமி வெளியிட்டுள்ள எக்ஸ் தளத்தில்: பொதுத்துறை நிறுவனமான LIC இந்தியாவின் இணையதளத்தில் இயல்பு நிலை மொழியாக (Default Language) இந்தி மாற்றப்பட்டிருக்கிறது. இந்தி மொழி தெரியாத மக்களுக்கு தற்போது LIC-யின் இணையதளம் பயன்படுத்த முடியாத அளவிற்கு உள்ளது. இணையதளத்தின் மொழி மாற்றும் விருப்பமும் இந்தி மொழியிலேயே இருப்பதால் அதனை கண்டுபிடிக்க முடியாத நிலை உள்ளது.

எங்கு, எதில் எப்படி இந்தியை திணிக்கலாம் என்ற முனைப்பிலேயே மத்திய அரசு செயல்படுவது கண்டனத்திற்குரியது. மொழி, பண்பாடு, அமைப்பு, அரசியல் என எல்லாவற்றிலும் பன்முகத்தன்மை கொண்ட இந்தியாவில், ஒற்றைத்தன்மையை திணிப்பது நாட்டின் சமநிலையை பாதிக்கும் செயல். அது ஏற்புடையதல்ல. அனைத்து மக்களும் பயன்படுத்தும் வகையில் இணையதளத்தின் இயல்புநிலை மொழியை ஆங்கிலத்திற்கு மாற்றவும், இந்தி மொழியைத் திணிக்கும் எந்த நடவடிக்கையிலும் ஈடுபடவேண்டாம் எனவும் மத்திய அரசை வலியுறுத்துகிறேன் என தெரிவித்துள்ளார். இதனிடையே கடும் கண்டனம் எழுந்து வந்த நிலையில் எல்ஐசி நிறுவனத்தின் இணையதளத்தில் தற்போது மீண்டும் ஆங்கிலத்தில் மாற்றம் செய்யப்பட்டுள்ளது.