சென்னையில் மினி பேருந்து.! எந்த எந்த வழித்தடத்தில் இயங்கப்போகிறது- ஆட்சியர் முக்கிய அறிவிப்பு

சென்னையில் மினி பேருந்துகளை இயக்குவதற்கான புதிய வழித்தடங்கள் கண்டறியப்பட்டுள்ளன. ஆர்வமுள்ளவர்கள் மார்ச் 10, 2025க்குள் விண்ணப்பிக்கலாம் என்று மாவட்ட ஆட்சியர் தெரிவித்துள்ளார்.

சென்னை மற்றும் சென்னையை ஒட்டியுள்ள (சென்னை வடக்கு மற்றும் தெற்கு மண்டலத்திற்கு உட்பட்ட) புறநகர் பகுதிகளில் மினி பேருந்து இயக்குவதற்கான புதிய வழித்தடங்கள் கண்டறியப்பட்டு அந்த வழித்தடங்களில் பொதுமக்களின் பயன்பாட்டிற்காக மினி பேருந்து இயக்குவதற்கு புதிய அனுமதி சீட்டு பெற விண்ணப்பிக்கலாம் என சென்னை மாவட்ட ஆட்சித்தலைவர் ரஷ்மி சித்தார்த் ஜகடே தெரிவித்துள்ளார்.

தமிழகத்தில் மினி பேருந்து

தமிழகத்தில் பல்வேறு மாவட்டங்களில் மினி பேருந்துகள் இயக்கப்படவுள்ளது, இது தொடர்பாக தமிழக அரசு அறிவிப்பு வெளியிட்டுள்ளது. இதன் படி ஒவ்வொரு மாவட்டத்திலும் எந்த எந்த இடங்களில் பேருந்துகள் இயக்கப்படவுள்ளது என்பது தொடர்பான வழிகாட்டு நெறிமுறை வெளியிடப்பட்டுள்ளது. இந்த நிலையில் சென்னை மாவட்ட ஆட்சியர் வெளியிட்டுள்ள அறிவிப்பில், சென்னை வடக்கு மண்டலத்திற்கு உட்பட்ட வட்டாரப் போக்குவரத்து அலுவலகம், சென்னை, வடகிழக்கில் புதியதாக 6 வழித்தடங்களும்,

சென்னையில் புதிய வழிதடத்தில் மினி பேருந்து

வட்டாரப் போக்குவரத்து அலுவலகம், சென்னை, வடக்கில் 7 வழித்தடங்களும், வட்டாரப் போக்குவரத்து அலுவலகம், அம்பத்தூரில் 9 வழித்தடங்களும், வட்டாரப் போக்குவரத்து அலுவலகம், பூவிருந்தவல்லியில் 9 வழித்தடங்களும், வட்டாரப் போக்குவரத்து அலுவலகம். செங்குன்றத்தில் 2 வழித்தடங்களும் ஆக மொத்தம் 33 வழித்தடங்கள் புதியதாக கண்டறியப்பட்டுள்ளது.

77 வழித்தடங்களில் மினி பேருந்து இயக்கம்

அதேபோன்று, சென்னை தெற்கு மண்டலத்திற்கு உட்பட்ட வட்டாரப் போக்குவரத்து அலுவலகம், சோழிங்கநல்லூரில் புதியதாக 11 வழித்தடங்களும், வட்டாரப் போக்குவரத்து அலுவலகம், சென்னை, தெற்கில் 6 வழித்தடங்களும், வட்டாரப் போக்குவரத்து அலுவலகம். சென்னை, தென்மேற்க்கில் 9 வழித்தடங்களும், வட்டாரப் போக்குவரத்து அலுவலகம், மீனம்பாக்கத்தில் 13 வழித்தடங்களும் ஆக மொத்தம் 39 வழித்தடங்கள் புதியதாக கண்டறியப்பட்டுள்ளது.

மேலும், புதியதாக கண்டறியப்பட்டுள்ள சென்னை வடக்கு மற்றும் தெற்கு மண்டலத்திலுள்ள 72 வழித்தடங்கள் தொடர்பான விவரங்களும் சென்னை மாவட்ட அரசிதழில் வெளியிடப்பட்டுள்ளது. 

விண்ணப்பிக்க அழைப்பு

மேற்கண்ட புதியதாக கண்டறியப்பட்டுள்ள 72 வழித்தடங்களில் மினி பேருந்துகளை இயக்க விரும்புவோர் குறிப்பிட்ட வழித்தட விவரங்களை குறிப்பிட்டு சம்மந்தப்பட்ட வட்டாரப் போக்குவரத்து அலுவலகத்தில் 10.03.2025-க்குள் விண்ணபிக்க விண்ணப்பங்கள் வரவேற்க்கப்படுகின்றன.

ஒரு வழித்தடத்திற்கு ஒன்றுக்கும் மேற்பட்ட விண்ணப்பங்கள் பெறப்படுமாயின் குலுக்கல் முறையில் ஒருவர் தேர்வு செய்யப்படுவார் என மாவட்ட ஆட்சித்தலைவர் ரஷ்மி சித்தார்த் ஜகடே தெரிவித்துள்ளார்.