TN Politics: முதல்வர் விஜய்யின் டெல்லி பயணம்; ஜோதிடர் ராதன் பண்டிட்டை சுற்றி வெடித்த சர்ச்சை! உண்மை என்ன?

TN Politics: முதல்வர் விஜய் பிரதமர் மோடியை சந்தித்தபோது விஜய்யின் தனிப்பட்ட ஆலோசகரும், ஜோதிடருமான ரிக்கி ராதன் பண்டிட் வெற்றிவேல் டெல்லி பயணத்தில் உடன் இருந்ததாக தகவல் வெளியாகி உள்ளது.

Image Credit : x

பிரதமர் மோடியை சந்தித்த விஜய்

தமிழக முதல்வர் விஜய் பதவியேற்ற பிறகு நேற்று முதன்முறையாக டெல்லி சென்று பிரதமர் மோடியை சந்தித்து பேசினார். அரசு விழாக்களில் தமிழ்த்தாய் வாழ்த்து பாட தெளிவான வழிகாட்டுதல் வழங்க வேண்டும். மேகதாது அணை கட்டும் கர்நாடக அரசின் முயற்சியை தடுத்து நிறுத்த வேண்டும். இலங்கை கடற்படையால் கைது செய்யப்படும் தமிழக மீனவர்கள் பிரச்சனைகளுக்கு தீர்வு காண வேண்டும் மற்றும் தமிழக நிதி தொடர்பான கோரிக்கைகளை பிரதமரிடம் விஜய் முன்வைத்தார். மேலும் மத்திய நிதி அமைச்சர் நிர்மலா சீதாராமனையும் விஜய் சந்தித்து பேசினார்.

Image Credit : Asianet News

டெல்லி பயணத்தில் ரிக்கி ராதன் பண்டிட் வெற்றிவேல்

இந்த நிலையில், விஜய் பிரதமர் மோடியை சந்தித்தபோது விஜய்யின் தனிப்பட்ட ஆலோசகரும், ஜோதிடருமான ரிக்கி ராதன் பண்டிட் வெற்றிவேல் என்பவரும் டெல்லி பயணத்தில் தோன்றியதாக சில ஆங்கில மற்றும் உள்ளூர் ஊடகங்களில் செய்திகள் வெளியாகி வந்தன. நாட்டின் பிரதமரை ஒரு மாநிலத்தின் முதலமைச்சர் சந்திக்கும் போது கடுமையான அரசு நெறிமுறைகளும் பாதுகாப்பும் பின்பற்றப்படும். பிரதமர் - முதல்வர் சந்திப்பின் போது ஜோதிடர் ராதன் பண்டிட் உடன் இருக்கவில்லை என்பதே உண்மையாகும். விஜய் முதல்வரான பிறகு ஜோதிடர் ராதன் பண்டிட்டை சுற்றி பல்வேறு சர்ச்சைகள் வெளியாகி வருகின்றன.

Image Credit : CM Vijay FB

அரசு பதவி வழங்கிய விஜய்

அதாவது சில நாட்களுக்கு முன்பு ரிக்கி ராதன் பண்டிட் வெற்றிவேல் த‌மிழக முதல்வரின் (அரசியல்) சிறப்புப் பணி அதிகாரியாக (OSD) நியமிக்கப்பட்டார். ரிக்கி ராதன் பண்டிட் வெற்றிவேல் தவெக தேர்தல் வெற்றியை துல்லியமாக கணித்தவர் என ஊடகங்களில் பேசப்பட்டது. நீண்ட நாட்களாக தன்னுடன் இருக்கும் அவருக்கு விஜய் அரசு பதவி வழங்கினார்.

கடும் எதிர்ப்பால் வாபஸ்

ஜோதிடருக்கு அரசு பதவி வழங்கிய முதல்வர் விஜய்க்கு இடதுசாரிகள், விசிகவை சேர்ந்தவர்கள் கண்டனம் தெரிவித்தனர். ''முதல்வர் விஜய்க்கு ஜோதிடத்தில் மீது நம்பிக்கை இருக்கலாம். அது அவரது தனிப்பட்ட உரிமை. ஆனால் அரசு பதவிகளில் அரசியலமைப்பு சட்டத்தை மீறி ஜோதிடரை எப்படி நியமிக்கலாம்'' என அவர்கள் விஜய்க்கு கேள்விகளை எழுப்பினர். மேலும் திமுக, அதிமுக உள்ளிட்ட எதிர்க்கட்சிகளும் தவெக அரசுக்கு கண்டனம் தெரிவித்து இருந்தன.

பல்வேறு தரப்பில் இருந்தும் எழுந்த கடும் கண்டனத்தால் நியமிக்கப்பட்ட 24 மணி நேரத்தில் ஜோதிடர் ராதன் பண்டிட்டின் நியமன ஆணையை முதலமைச்சர் விஜய் அதிரடியாக ரத்து செய்து உத்தரவிட்டார். இது குறித்து கருத்து தெரிவித்த ரிக்கி ராதன் பண்டிட் வெற்றிவேல் இதில் தனக்கு எந்த வருத்தமும் இல்லை. விஜய் எனது மகன் போன்றவர் என்று கூறினார்.