ரோகித் சர்மாவுக்கு அடுத்த ஷாக்; சாம்பியன்ஸ் டிராபியில் கேப்டனாகும் ஹர்திக் பாண்ட்யா? பரபரப்பு தகவல்!

ரோகித் சர்மா நீக்கம்

ஆஸ்திரேலியாவுக்கு எதிரான டெஸ்ட் தொடரில் படுமோசமாக விளையாடி வரும் இந்திய அணி 2 1 என்ற கணக்கில் பின் தங்கியுள்ளது. இந்த தொடர் முழுவதும் படுமோசமாக பேட்டிங் செய்த ரோகித் சர்மா 6 சராசரியுடன் வெறும் 31 ரன்கள் மட்டுமே எடுத்தார். இதேபோல் கேப்டன்சியிலும் கடுமையாக சொதப்பினார். இதனால் சிட்னியில் நடக்கும் 5வது டெஸ்ட் போட்டிக்கான இந்திய அணியில் இருந்து ரோகித் சர்மா நீக்கப்பட்டுள்ளார்.
 

சாம்பியன்ஸ் டிராபியில் ஹர்திக் கேப்டன்?

ரோகித் சர்மாவை பிசிசிஐ அதிரடியாக நீக்கியது என ஒரு தரப்பினரும், இல்லை தானே முன்வந்து கடைசி டெஸ்ட் போட்டியில் இருந்து ரோகித் சர்மா ஒதுங்கினார் என மற்றொரு தரப்பினரும் கருத்துகளை தெரிவித்து வருகின்றனர்.

இந்நிலையில், ரோகித் சர்மா ஆஸ்திரேலியா தொடர் முடிந்தவுடன் டெஸ்ட் கிரிக்கெட்டில் இருந்து ஓய்வு பெற்று விடுவார் என தகவல்கள் பரவும் நிலையில், ஓடிஐ கிரிக்கெட்டில் இருந்தும் அவரது கேப்டன்சியை பறிக்க பிசிசிஐ திட்டமிட்டுள்ளதாக தகவல் வெளியாகி இருக்கிறது.

பும்ரா கையில் இந்தியாவின் வெற்றி; நாளை பந்துவீசுவரா? காயத்தின் நிலை என்ன?

கேப்டன்சியில் ரோகித்தின் பலவீனம் 

அதாவது அடுத்த மாதம் தொடங்கும் சாம்பியன்ஸ் டிராபியில் ரோகித் சர்மாவை ஓரம்கட்டி விட்டு இந்திய அணியின் ஆல்ரவுண்டர் ஹர்திக் பாண்ட்யாவை கேப்டனாக நியமிக்க பிசிசிஐ முடிவு செய்துள்ளதாக தகவல்கள் கூறுகின்றன. நியூசிலாந்துக்கு எதிரான டெஸ்ட் தொடரிலும், ஆஸ்திரேலியாவுக்கு எதிரான டெஸ்ட் தொடரிலும் அணி இக்கட்டான நிலையில் இருந்த நேரத்தில் ரோகித் சர்மா நெருக்கடியை சமாளிக்க முடியாமல் கடும் அழுத்தத்தில் வீழ்ந்தார்.

பீல்டிங் செட் செய்வதிலும், பவுலர்களுக்கு ஓவர்கள் ரொட்டேட் செய்வதிலும் தடுமாறினார். சாம்பியன்ஸ் டிராபியிலும் இதே நிலை தொடர்ந்தால் இந்த அணி கோப்பையை மறந்து விட வேண்டியதுதான் என பிசிசிஐ நினைக்கிறது.

டெஸ்ட் கிரிக்கெட், ஓடிஐ கிரிக்கெட் வேறு வேறு பார்மட் என்றாலும் கேப்டன்சி செய்யும் விதம் ஒன்றுதான் என பிசிசிஐ கருதுகிறது. இதனால் கேப்டன்சியில் பலவீனாக உள்ள ரோகித் சர்மாவை கழட்டி விட முடிவு செய்துள்ளதாக கூறப்படுகிறது.

ஹர்திக் பாண்ட்யா தேர்வு ஏன்?

அதே வேளையில் ஹர்திக் பாண்ட்யா இந்திய டி20 அணியையும், ஐபிஎல்லில் குஜராத் அணியையும் நெருக்கடியான நேரத்தில் மிகவும் கூலாக சிறப்பாக வழிநடத்தியுள்ளார். கேப்டன்சி அனுபவம் நன்றாக இருப்பதால் 50 ஓவர் போட்டிகளுக்கு அணியை வழிநடத்த ஹர்திக் பாண்ட்யா சரியான தேர்வாக இருப்பார் என பிசிசிஐ நினைப்பதகாவும் தகவல்கள் உலா வருகின்றன. 

சில போட்டிகளில் இந்திய அணியை வழிநடத்திய சுப்மன் கில்லுக்கு கேப்டன்சியில் போதிய அனுபவம் இல்லை. இப்போது டி20 போட்டிகளில் இந்திய அணியை வழிநடத்தும் சூர்யகுமார் யாதவ் ஓடிஐ பார்மட்டில் ரன்கள் அடிக்கத் திணறுவதால் இவர்களின் அடுத்த இடத்தில் பிசிசிஐயின் கண்ணில்படுவது ஹர்திக் பாண்ட்யா தான். 

இந்த தகவல் உறுதியாகி சாம்பியன்ஸ் டிராபியில் ஹர்திக் கேப்டனாக செயல்பட்டால் அந்த தொடர் முடிந்தவுடன் ரோகித் சர்மா ஓடிஐ கிரிக்கெட்டில் இருந்தும் விடைபெறுவர் என தகவல்கள் கூறுகின்றன. ஆனால் ''கிரிக்கெட்டில் இருந்து ஓய்வு பெற போவதில்லை. கடைசி டெஸ்ட் போட்டியில் இருந்து தான் நான் விலகியுள்ளேன்'' என்று ரோகித் சர்மா இன்று விளக்கம் அளித்துள்ளது குறிப்பிடத்தக்கது.

மனைவியை பிரியும் யுஸ்வேந்திரா சாஹல்? இன்ஸ்டாவில் அன்ஃபாலோ செய்ததால் சர்ச்சை!