ஒற்றை காலால் உடற்பயிற்சி செய்யும் கேன் வில்லியம்சன் குணமடைய விராட் கோலி வாழ்த்து!

காலில் அடிபட்ட நிலையில் ஐபிஎல் தொடரிலிருந்து விலகிய நியூசிலாந்தை சேர்ந்த கேன் வில்லியம்சன் ஒற்றை காலால் ஜிம்மில் உடற்பயிற்சி மேற்கொண்டு வரும் நிலையில், விரைவில் குணமடையுங்கள் சகோதரரே என்று விராட் கோலி வாழ்த்து தெரிவித்துள்ளார்.

கேன் வில்லியம்சன்

ஐபிஎல் 2023 கிரிக்கெட் திருவிழாவின் 16ஆவது சீசன் பிரம்மாண்டமாக தொடங்கப்பட்டுள்ளது. இந்த சீசனின் முதல் போட்டியில் நடப்பு சாம்பியன் குஜராத் டைட்டன்ஸ் அணியும், சென்னை சூப்பர் கிங்ஸ் அணியும் மோதின. முதலில் ஆடிய சென்னை சூப்பர் கிங்ஸ் அணி 20 ஓவர்கள் முடிவில்  7 விக்கெட் இழப்பிற்கு 175 ரன்கள் எடுத்தது.

இதில், ருத்துராஜ் கெய்க்வாட் மட்டும் அதிரடியாக ஆடி 92 ரன்கள் சேர்த்தார். போட்டியின் 12.3 ஆவது ஓவரை ஜோஷுவா லிட்டில் வீசினார். எதிர்முனையில் கெய்க்வாட் பேட்டிங் செய்தார். 

அப்போது அவர் பந்தை சிக்சருக்கு விளாச பவுண்டரி லைனில் நின்று கொண்டிருந்த வில்லியம்சன் தாவி பந்தை கேட்ச் பிடிக்க முயற்சி செய்து வலது காலை அழுத்தமாக ஊன்றிய நிலையில், கீழே விழுந்தார். 

இதில், அவரது வலது காலின் முழங்கால் பகுதியில் பலத்த காயம் ஏற்பட்டது. சிக்ஸர் தடுக்கப்பட்ட போதிலும், பந்து பவுண்டரி லைனை தொடவே, பவுண்டரி கொடுக்கப்பட்டது. வலியால் துடித்த கேன் வில்லியம்சனை மருத்துவர்கள் பரிசோதனை செய்தனர். அதன் பிறகு அவர் பேட்டிங் ஆட வரவேயில்லை. வீரர்கள் அமர்ந்திருக்கும் சீட்டில் அமர்ந்து வேடிக்கை பார்த்தார். 

இந்தப் போட்டியில் குஜராத் டைட்டன்ஸ் அணி 5 விக்கெட் வித்தியாசத்தில் வெற்றி பெற்றது. இந்த நிலையில், காயம் காரணமாக இந்த சீசனிலிருந்து கேன் வில்லியம்சன் விலகினார். இதையடுத்து அவர் ஜிம்மில் ஒரு காலால் பயிற்சி மேற்கொண்ட புகைப்படங்களை தனது இன்ஸ்டாகிராம் பக்கத்தில் பதிவிட்டுள்ளார். அதில், எனது புதிய வீட்டில் சுற்றிக் கொண்டிருக்கிறேன் என்று குறிப்பிட்டுள்ளார். இந்தப் புகைப்படங்கள் தற்போது சமூக வலைதளங்களில் வைரலாகி வருகிறது.

இந்த நிலையில், ராயல் சேலஞ்சர்ஸ் பெங்களூரு வீரர் விராட் கோலி டுவிட்டரில் வாழ்த்து தெரிவித்துள்ளார். இது குறித்து அவர் கூறியிருப்பதாவது: விரைவில் குணமடையுங்கள் சகோதரரே என்று டுவிட்டரில் குறிப்பிட்டுள்ளார்.