பல வருஷமா இருக்கும் அந்த பலவீனத்தை சரி செய்யலைனா இந்திய அணி டி20 உலக கோப்பையை ஜெயிக்க முடியாது - கவாஸ்கர்

டி20 உலக கோப்பை நெருங்கும் நிலையில், இந்திய அணியின் பலவீனம் குறித்து சுனில் கவாஸ்கர் கருத்து கூறியுள்ளார். 

டி20 உலக கோப்பை நெருங்கும் நிலையில், அதற்காக அனைத்து அணிகளும் தீவிரமாக தயாராகிவருகின்றன. ரோஹித் சர்மா தலைமையிலான இந்திய அணியும் டி20 உலக கோப்பைக்காக தீவிரமாக தயாராகிவருகிறது. டி20 உலக கோப்பை நெருங்கும் நிலையில், இந்திய அணியின் பெரிய பலவீனமே டெத் பவுலிங் தான் என்று சுனில் கவாஸ்கர் கருத்து கூறியுள்ளார்.

டி20 உலக கோப்பைக்கான இந்திய அணியில் பும்ரா, புவனேஷ்வர் குமார், ஹர்ஷல் படேல் ஆகியோர் ஃபாஸ்ட் பவுலர்களாக எடுக்கப்பட்டுள்ளனர். பும்ராவின் ஃபிட்னெஸ் கவலையளிக்கும் நிலையில், புவனேஷ்வர் குமார் மற்றும் ஹர்ஷல் படேல் ஆகிய இருவரும் ரன்களை வாரி வழங்குவது பின்னடைவாக அமைந்துள்ளது.

பவர்ப்ளேயில் புதிய பந்தில் அருமையாக ஸ்விங் செய்து வீசக்கூடிய புவனேஷ்வர் குமார், பொதுவாகவே அவ்வளவு சிறந்த டெத் பவுலர் கிடையாது. ஆசிய கோப்பையில் பாகிஸ்தானுக்கு எதிரான சூப்பர் 4 சுற்று போட்டியில் 19வது ஓவரில் 19 ரன்களையும், இலங்கைக்கு எதிரான போட்டியில் 19வது ஓவரில் 14 ரன்களையும் வாரி வழங்கிய நிலையில், ஆஸ்திரேலியாவிற்கு எதிரான முதல் டி20 போட்டியின் 19வது ஓவரில் 16 ரன்களை வழங்கினார். டெத் ஓவர்களில் சீனியர் பவுலரான புவனேஷ்வர் குமார் அதிக ரன்களை வழங்கிவருவது கவலையான விஷயம்.

இந்திய அணியின் டெத் பவுலர்கள் பும்ராவும் ஹர்ஷல் படேலும் தான். ஆனால் ஹர்ஷல் படேலும் அதிக ரன்களை வழங்குகிறார். அதனால் பும்ரா மீது அதிக சுமை இறங்க வாய்ப்புள்ளது. பும்ராவின் ஃபிட்னெஸை பராமரிப்பதும் முக்கியம்.

இந்நிலையில், இதுகுறித்து பேசியுள்ள சுனில் கவாஸ்கர், இந்திய அணியின் பெரிய பலவீனமே முதலில் பேட்டிங்  ஆடிவிட்டு 2வது இன்னிங்ஸில் இலக்கை கட்டுப்படுத்துவதுதான். இந்திய அணி இலக்கை விரட்டும்போது வெற்றிபெறுகிறது. ஆனால் 2வதாக பந்துவீசினால் தோற்றுப்போகிறது. இது இப்போதைய பிரச்னை இல்லை. கடந்த சில ஆண்டுகளாகவே இந்த பிரச்னை உள்ளது. அதற்கு தீர்வு காண வேண்டும்.

பும்ரா இந்திய அணியின் முக்கியமான வீரர். அவரது ஃபிட்னெஸ் முக்கியம். டி20 உலக கோப்பையில் அனைத்து போட்டிகளிலும் ஆடுமளவிற்கு அவர் ஃபிட்டாக இருக்கவேண்டும். இந்திய அணி இலக்கை நிர்ணயித்து ஜெயிக்க வேண்டுமென்றால் 16-20 ஓவர்களை நன்றாக வீசியாக வேண்டும் என்று கவாஸ்கர் கருத்து கூறியுள்ளார்.asia