2 டெஸ்டுலெயும் ஒரே ஆளு தான்: ஆஸ்திரேலியா டோட்டல் காலி!

ஆஸ்திரேலியாவுக்கு எதிரான இரண்டு டெஸ்ட் போட்டிகளிலும் இந்திய சுழற்பந்து வீச்சாளர் ரவீந்திர ஜடேஜா ஆட்டநாயகன் விருது பெற்றுள்ளார். 

ரவீந்திர ஜடேஜா

இந்தியா வந்த ஆஸ்திரேலியா அணி 4 டெஸ்ட் போட்டிகள் கொண்ட பார்டர் கவாஸ்கர் டிராபி தொடரிலும், 3 ஒரு நாள் போட்டிகள் கொண்ட தொடரிலும் பங்கேற்கிறது. முதல்கட்டமாக இரு அணிகளுக்கு இடையிலான முதல் போட்டி நாக்பூர் மைதானத்தில் நடந்தது.

இதில், இந்தியா இன்னிங்ஸ் மற்றும் 132 ரன்கள் வித்தியாசத்தில் வெற்றி வாகை சூடியது. இந்த டெஸ்ட் போட்டியில் முதல் இன்னிங்ஸில் ரவீந்திர ஜடேஜா 5 விக்கெட் மற்றும் 70 ரன்களும், 2ஆவது இன்னிங்ஸில் 2 விக்கெட்டும் கைப்பற்றினார். இதன் மூலமாக ரவீந்திர ஜடேஜா ஆட்டநாயகன் விருது பெற்றார்.

இதைத் தொடர்ந்து இரு அணிகளுக்கு இடையிலான 2ஆவது டெஸ்ட் போட்டி கடந்த 17 ஆம் தேதி டெல்லியில் தொடங்கியது. இதில், டாஸ் வென்ற ஆஸ்திரேலியா முதலில் ஆடி 263 ரன்கள் குவித்தது. இதில் ஜடேஜா 3 விக்கெட்டுகளும், அஸ்வின் 3 விக்கெட்டுகளும், ஷமி 4 விக்கெட்டுகளும் கைப்பற்றினர். இதை தொடர்ந்து இந்திய அணி பேட்டிங் செய்தது.

இந்திய அணியில் ரோகித் சர்மா 32, விராட் கோலி 44, அக்‌ஷர் படேல் 74 ரன்கள் சேர்க்க இந்தியா 262 ரன்கள் எடுத்தது. ஒரு கட்டத்தில் 139 ரன்களுக்கு 7 விக்கெட் இழந்த இந்திய அணியில் 8ஆவது விக்கெட்டிற்கு ரவிச்சந்திரன் அஸ்வின் மற்றும் ரவீந்திர ஜடேஜா ஜோடி 114 ரன்கள் வரையில் எடுத்தது. அஸ்வின் 37 ரன்கள் எடுத்து ஆட்டமிழந்தார்.

இதைத் தொடர்ந்து ஆஸ்திரேலியா தனது 2ஆவது இன்னிங்ஸை ஆடியது. இதில், டிரேவிஸ் ஹெட் மற்றும் லபுஷேன் ஆகியோர் நிலைத்து நின்று ஆடி ரன்கள் சேர்த்தனர். எனினும், டிரேவிஸ் ஹெட் 43 ரன்னிலும், லபுஷேன் 35 ரன்களும் எடுத்து ஆடடமிழந்தனர்.

மற்ற வீரர்கள் சொற்ப ரன்களில் ஆட்டமிழக்க ஆஸ்திரேலியா அனைத்து விக்கெட்டுகளையும் இழந்து 113 ரன்கள் மட்டுமே எடுத்தது. இதில் ரவீந்திர ஜடேஜா 12.1 ஓவர்கள் வரை வீசி ஒரேயொரு மெய்டன் மட்டுமே போட்டு 7 விக்கெட்டுகள் கைப்பற்றி ஆஸ்திரேலியாவை சரித்துள்ளார். அஸ்வின் 3 விக்கெட்டுகள் கைப்பற்ற ஆஸ்திரேலியா 113 ரன்களுக்கு எல்லா விக்கெட்டுகளையும் இழந்தது.

எளிய இலக்கை நோக்கிய விளையாடிய இந்திய அணிக்கு தொடர்ந்து சொதப்பி வரும் கேஎல் ராகுல் இந்த முறையும் ஒரு ரன்னில் ஆட்டமிழந்து வெளியேறினார். ரோகித் சர்மாவும் 31 ரன்கள் சேர்த்து ரன் அவுட்டில் வெளியேறினார். இவருக்கு அடுத்தபடியாக விராட் கோலி 20 ரன்கள் சேர்த்து ஸ்டெம்பிங்கில் ஆட்டமிழந்தார். இறுதியாக ஷ்ரேயாஸ் ஐயர் 12 ரன்களில் வெளியேற இந்திய அணி 4 விக்கெட் இழப்பிற்கு 118 ரன்கள் எடுத்து 6 விக்கெட் வித்தியாசத்தில் வெற்றி பெற்றது.

இதில், விக்கெட் கீப்பர் ஸ்ரீகர் பரத் 23 ரன்னுடனும், சட்டீஸ்வர் புஜாரா 31 ரன்னுடனும் ஆட்டமிழக்காமல் இருந்தனர். இந்தப் போட்டியில் முதல் இன்னிங்ஸில் 3 விக்கெட்டுகளும், 2ஆவது இன்னிங்ஸில் 7 விக்கெட்டுகளும் கைப்பற்றிய ரவீந்திர ஜடேஜா ஆட்டநாயன் விருது பெற்றுள்ளார்.

ஏற்கனவே முதல் டெஸ்ட் போட்டியில் ரவீந்திர ஜடேஜா தான் ஆட்டநாயகன் விருது பெற்றார். தற்போது 2ஆவது போட்டியிலும் ரவீந்திர ஜடேஜா தான் ஆட்டநாயகன் விருது பெற்றுள்ளார் என்பது குறிப்பிடத்தக்கது. ஆஸ்திரேலியாவிற்கு எதிராக டெல்லியில் நடந்துவரும் 2வது டெஸ்ட் போட்டியில் 3 விக்கெட் வீழ்த்திய ரவீந்திர ஜடேஜா அபாரமான சாதனையை படைத்துள்ளார்.

இந்த போட்டியில் கவாஜா, கம்மின்ஸ், டாட் மர்ஃபி ஆகிய மூவரையும் ஜடேஜா வீழ்த்தினார். இதில் கவாஜாவின் விக்கெட்டை வீழ்த்தியதன் மூலம், டெஸ்ட் கிரிக்கெட்டில் 250 விக்கெட் என்ற மைல்கல்லை ஜடேஜா எட்டினார். அதன்பின்னர் தான் கம்மின்ஸ் மற்றும் மர்ஃபியின் விக்கெட்டுகளை வீழ்த்தினார். 

இதன்மூலம் டெஸ்ட் கிரிக்கெட்டில் 250 விக்கெட் மற்றும் 2500 ரன்கள் என்ற மைல்கல்லை எட்டிய லெஜண்ட் ஆல்ரவுண்டர்களின் பட்டியலில் இணைந்தார் ஜடேஜா. மேலும் இந்த மைல்கல்லை 62 டெஸ்ட் போட்டிகளில் எட்டியுள்ள ஜடேஜா, இந்த மைல்கல்லை விரைவாக எட்டிய 2வது வீரர் என்ற சாதனையையும் படைத்தார்.  அதுமட்டுமின்றி அதிக முறை ஆட்டநாயகன் விருது பெற்ற வீரர்களில் ரவீந்திர ஜடேஜாவும் இடம் பெற்றுள்ளார்.

சச்சின் டெண்டுல்கர் - 14
அனில் கும்ப்ளே - 10
விராட் கோலி - 9
ரவிச்சந்திரன் அஸ்வின் - 9
ரவீந்திர ஜடேஜா - 9

டெஸ்ட் தொடரில் ஆஸ்திரேலியாவுக்கு எதிராக அதிக முறை ஆட்டநாயகன் விருது பெற்றவர்களில் ஜடேஜாவும் இடம் பெற்றுள்ளார்.

சச்சின் டெண்டுல்கர் - 5
சட்டீஸ்வர் - புஜாரா - 4
ரவீந்திர ஜடேஜா - 4