கோலியின் கிரிக்கெட் மீதான பசி, கடினமான சூழல், போராட்டத்திற்கு பிறகு கிடைத்த வெற்றி - ரோகித் சர்மா கருத்து!

விராட் கோலி-ரோகித் சர்மா: இந்திய அணியின் முன்னாள் கேப்டன் விராட் கோலியைப் பற்றி தற்போதைய கேப்டன் ரோகித் சர்மா தெரிவித்த கருத்துகள் வைரலாகி வருகின்றன. சர்வதேச கிரிக்கெட்டில் இந்த இருவரும் இந்திய அணிக்கு பல வெற்றிகளையும், மறக்க முடியாத தருணங்களையும் வழங்கியுள்ளனர்.   

விராட் கோலி, ரோகித் சர்மா

இந்திய ஜாம்பவான் வீரர் விராட் கோலி சர்வதேச கிரிக்கெட்டில் 16 ஆண்டுகளை நிறைவு செய்துள்ளார். 2008 ஆகஸ்ட் 18 ஆம் தேதி டம்புல்லாவில் இலங்கைக்கு எதிரான முதல் ஒருநாள் போட்டியில் இந்திய அணிக்காக அவர் அறிமுகமானார். இருப்பினும், தனது முதல் போட்டியில் பெரிய ஸ்கோரை எடுக்காத கோலி 22 பந்துகளில் 12 ரன்களுக்கு ஆட்டமிழந்தார். இதில் ஒரு பவுண்டரி அடங்கும். ஆனால், இப்போது கிங் கோலி உலக கிரிக்கெட்டில் ஒரு சிறந்த வீரராகத் தொடர்கிறார்.

சர்வதேச கிரிக்கெட்டில் 16 ஆண்டுகளை நிறைவு செய்துள்ள கோலிக்கு இந்திய கேப்டன் ரோகித் சர்மா பாராட்டு தெரிவித்துள்ளார். கோலியின் கிரிக்கெட் ஆர்வமும், பசியும் ஒப்பற்றது என்று அவர் குறிப்பிட்டுள்ளார். மைதானத்தில் மிகவும் சுறுசுறுப்பாக இருக்கும் கிங் கோலி, மட்டையாலும், பீல்டிங்கிலும் மட்டுமல்ல, தனது நடத்தையாலும் கிரிக்கெட் ரசிகர்களை கவர்ந்திழுக்கிறார். வீரர்களுக்கு சிறந்த ஆற்றலை அளிக்க அவர் முயற்சி செய்கிறார். மைதானத்தில் அணியின் வெற்றிக்காக இப்படி நடந்து கொள்ளும் ஒரு சில வீரர்களில் ஒருவர் என்று கூறி கோலியை ரோகித் பாராட்டியுள்ளார். அவரது போராட்டம் அபாரமானது என்றும் அவர் தெரிவித்துள்ளார். 

"கோலியின் கிரிக்கெட் பசி, ஆர்வம் எல்லாம் நமக்கெல்லாம் தெரியும். நீங்கள் அவரைப் பார்க்கும் ஒவ்வொரு முறையும், அவர் எப்போதும் வித்தியாசமான எனர்ஜியுடன் வெளியே வருவார். அவர் அணிக்கு பல விஷயங்களைக் கொண்டு வருகிறார். வீரர்களுக்கு ஆற்றலை அளிக்கிறார். இந்திய அணிக்காக அவர் ஆடிய இன்னிங்ஸ்கள் எப்போதும் மறக்க முடியாதவை" என்று ஸ்டார் ஸ்போர்ட்ஸிடம் ரோகித் சர்மா கூறினார்.

Rohit Sharma and Virat Kohli

அப்படிப்பட்ட ஆட்டம் எங்கே கிடைக்கும் என்று குறிப்பிட்ட ரோகித் சர்மா.. பல போராட்டங்கள், கடினமான சூழ்நிலைகளை எதிர்கொள்வதன் மூலம் இதுபோன்ற இன்னிங்ஸ்கள் வரும் என்று கோலியின் ஆட்டத்தை சுட்டிக்காட்டினார். தனது சிறந்ததை கொடுக்க எப்போதும் முயற்சி செய்து கொண்டே இருப்பார் என்றும், கோலியைப் பார்க்கும் ஒவ்வொரு முறையும் அவரது ஆட்டம் வேறு ஒரு நிலையில் இருப்பது போல் தெரிகிறது என்றும் ரோகித் கூறினார். 

விராட் கோலி-ரோகித் சர்மா

டெல்லியைச் சேர்ந்த விராட் கோலி 16 ஆண்டுகால சர்வதேச கிரிக்கெட் வாழ்க்கையை நிறைவு செய்துள்ள நிலையில், பல சாதனைகளை முறியடித்துள்ளார். 2024 ஆம் ஆண்டு நடைபெற்ற டி20 உலகக் கோப்பை வெற்றியுடன் தனது டி20I வாழ்க்கைக்கு விடைபெற்றார். தற்போது இந்திய ஒருநாள் மற்றும் டெஸ்ட் அணியில் தொடர்ந்து விளையாடி வருகிறார். 35 வயதான கோலி, ஒருநாள் கிரிக்கெட்டில் ஜாம்பவான் வீரர் சச்சின் டெண்டுல்கரின் 49 சதங்கள் என்ற சாதனையை முறியடித்துள்ளார். மும்பையில் நடைபெற்ற 2023 உலகக் கோப்பை அரையிறுதிப் போட்டியில் நியூசிலாந்துக்கு எதிராக தனது 50வது ஒருநாள் சதத்தை பதிவு செய்தார்.