IND vs AUS: வெறித்தனமான பவுலிங்.. அக்தர் சாதனையை ஊதித் தள்ளிய மிட்செல் ஸ்டார்க்!

இந்தியா-ஆஸ்திரேலியா ஒருநாள் போட்டியில், மிட்செல் ஸ்டார்க் வீசிய பந்து 176.5 கி.மீ வேகத்தில் பதிவானது. இது ஷோயிப் அக்தரின் உலக சாதனையை முறியடித்ததா என்ற விவாதத்தை ஏற்படுத்தியுள்ளது.

Image Credit : X

மிட்செல் ஸ்டார்க் அதிவேகப் பந்துவீச்சு சாதனை!

இந்தியா-ஆஸ்திரேலியா இடையேயான முதலாவது ஒருநாள் கிரிக்கெட் போட்டியில், ஆஸ்திரேலிய அணியின் வேகப்பந்து வீச்சாளர் மிட்செல் ஸ்டார்க் வீசிய ஒரு பந்து 176.5 கிலோமீட்டர் வேகத்தில் பதிவானது, இது உலக கிரிக்கெட்டில் ஒரு புதிய சாதனை படைத்திருக்கலாம் என்ற ஆச்சரியத்தையும், குழப்பத்தையும் ஏற்படுத்தியுள்ளது.

Image Credit : Getty

26 ஓவர் போட்டி

ஆஸ்திரேலியாவுக்குச் சுற்றுப்பயணம் செய்துள்ள சுப்மன் கில் தலைமையிலான இந்திய அணி இன்று பெர்த்தில் முதல் ஒருநாள் போட்டியில் விளையாடியது. மழையின் காரணமாக இப்போட்டி 26 ஓவர்களாக குறைக்கப்பட்டது. முதலில் பேட்டிங் செய்த இந்திய அணி, ரோகித் சர்மா (8), விராட் கோலி (0), கில் (10) போன்றோர் ஏமாற்றமளிக்க, 26 ஓவர்கள் முடிவில் 9 விக்கெட் இழப்புக்கு 136 ரன்கள் எடுத்தது.

இதையடுத்து, டக்வொர்த் லூயிஸ் முறைப்படி ஆஸ்திரேலிய அணிக்கு 131 ரன்கள் இலக்கு நிர்ணயிக்கப்பட்டது. ஆஸ்திரேலியா 21.1 ஓவர்களிலேயே 3 விக்கெட் இழப்புக்கு இலக்கை எட்டி, 7 விக்கெட்டுகள் வித்தியாசத்தில் அசத்தலான வெற்றியைப் பதிவுசெய்தது. இந்த வெற்றியின் மூலம் ஆஸ்திரேலியா தொடரில் 1-0 என்ற கணக்கில் முன்னிலை பெற்றுள்ளது. இரண்டாவது ஒருநாள் போட்டி வரும் 23-ஆம் தேதி அடிலெய்டில் நடைபெற உள்ளது.

Image Credit : X/ Johns.

வேகத்தில் வியப்பூட்டிய ஸ்டார்க்

இந்த போட்டியின் முதல் ஓவரிலேயே, ஆஸ்திரேலிய வேகப்பந்து வீச்சாளர் மிட்செல் ஸ்டார்க், இந்திய அணியின் தொடக்க ஆட்டக்காரர் ரோஹித் சர்மாவுக்கு எதிராக வீசிய பந்தின் வேகம், கிரிக்கெட் ரசிகர்களை அதிர்ச்சியடைய வைத்தது.

வேக கண்காணிப்புக் கருவி (Speed Gun) அந்தப் பந்தின் வேகத்தை 176.5 கிலோமீட்டர் என்று பதிவு செய்தது. பொதுவாக, ஸ்டார்க் 140 முதல் 150 கி.மீ வேகத்தில் பந்துவீசுபவர் என்ற நிலையில், இந்த அதிவேகப் பதிவு ரசிகர்களிடையே பெரும் பரபரப்பை ஏற்படுத்தியது.

Image Credit : Asianet News

சாதனை முறியடிக்கப்பட்டதா?

சர்வதேச கிரிக்கெட் வரலாற்றில் அதிவேகப் பந்துவீச்சாளர் என்ற சாதனையை பாகிஸ்தானின் ஷோயிப் அக்தர் (161.3 கி.மீ) வைத்திருக்கிறார். ஸ்டார்க் வீசிய இந்தப் பந்து உண்மையாகவே 176.5 கி.மீ வேகத்தில் சென்றிருந்தால், அது அக்தரின் 22 ஆண்டுகால சாதனையைத் தகர்த்திருக்கும்.

இருப்பினும், பந்துவீச்சின் வேகம் வழக்கத்தைவிட அதிகமாகப் பதிவானதால், இது தொழில்நுட்பக் கோளாறு காரணமாக இருக்கலாம் என கிரிக்கெட் நிபுணர்கள் சந்தேகம் எழுப்பியுள்ளனர். பந்தின் உண்மையான வேகம் குறித்து தெளிவான தகவல் இல்லை என்றாலும், ஸ்டார்க் தனது வேகப்பந்துவீச்சால் இந்திய பேட்ஸ்மேன்களைத் திணறடித்தார்.

வேகக் கண்காணிப்புக் கருவியின் பிழையே இதற்குக் காரணம் என்று பல நிபுணர்கள் கருத்து தெரிவித்துள்ளபோதும், இந்த அதிவேகப் பதிவு சமூக ஊடகங்களில் வைரலாகி கிரிக்கெட் உலகில் விவாதப்பொருளாக மாறியுள்ளது.