தம்பி கொஞ்சம் அடக்கி வாசிங்க; இல்லைனா அடி வாங்கிருவீங்க..! ஸ்மித்துக்கு கவாஸ்கர் எச்சரிக்கை

ஃபாஸ்ட் பவுலிங்கிற்கு சாதகமான ஆடுகளங்களை கொண்ட ஆஸ்திரேலியாவில் ஆதிக்கம் செலுத்துமளவிற்கான சிறந்த ஃபாஸ்ட் பவுலிங்கை இந்திய அணி கொண்டுள்ளது. பும்ரா, ஷமி, இஷாந்த் சர்மா, உமேஷ் யாதவ் என பெரும் படையே உள்ளது. 

ஸ்மித்தை நியூசிலாந்தின் நீல் வாக்னர் ஒரே தொடரில் 4 முறை ஷார்ட் பிட்ச் பந்தில் வீழ்த்த, மற்ற அணிகளும் அவருக்கெதிராக அந்த உத்தியை கையாண்டன. ஸ்மித்தின் பலவீனமாக ஷார்ட் பிட்ச் பந்துகள் திகழ்வதாக அனைவரும் கருதும் நிலையில், தனக்கு எதிராக ஷார்ட் பிட்ச் பந்துகளை வீசி வாக்னர் வெற்றிகண்ட அளவிற்கு, மற்ற அணிகளின் ஷார்ட் பிட்ச் பந்து பருப்பு தன்னிடம் வேகவில்லை எனவும், இந்தியாவுக்கு எதிராக ஷார்ட் பிட்ச் பந்துகளையும் பவுன்ஸர்களையும் எதிர்கொள்ள தான் தயார் எனவும் ஸ்மித் தெரிவித்திருந்தார்.

இந்நிலையில், இதுகுறித்து பேசியுள்ள இந்திய அணியின் முன்னாள் ஜாம்பவான் கவாஸ்கர்,  எந்த பேட்ஸ்மேனுமே ஷார்ட் பாலுக்கு தயாராக இருக்க முடியாது. ஒரு நல்ல ஷார்ட் பிட்ச் பந்து எப்பேர்ப்பட்ட பேட்ஸ்மேனுக்கும் மிகப்பெரிய தொல்லையாக இருக்கும். எனவே யாருமே ஷார்ட் பிட்ச் பந்துக்கு நான் தயார் என்று சொல்ல முடியாது. அதுவும் பவுன்ஸர்களை அருமையாக வீசக்கூடிய முகமது ஷமி மாதிரியான பவுலர், திட்டமிட்டபடி சரியாக பவுன்ஸர் வீசினால் அதை எதிர்கொள்வது எந்த பேட்ஸ்மேனுக்குமே கடினம். 

ஷமி அவ்வளவு பெரிய உயரமெல்லாம் இல்லை. ஆனால் அவரது பவுன்ஸர் பேட்ஸ்மேனின் தோள்பட்டை மற்றும் தலைக்கு வரும். அதை ஆடுவது கடினம். ஷமி சரியான ரிதமில் இருந்தால், அவரது பவுலிங்கை ஆடுவது மிகக்கடினம் என்று கவாஸ்கர் தெரிவித்தார்.