Kumkumam making : வீட்டிலேயே குங்குமம் செய்வது எப்படி? மஞ்சள் தூளில் இதை மட்டும் சேர்த்தால் போதும்!

Kumkum making: கடையில் வாங்கும் குங்குமத்திற்கு பதிலாக வீட்டிலேயே மஞ்சளை வைத்து பாரம்பரிய முறையில் குங்குமம் தயாரிக்கலாம். மஞ்சள், எலுமிச்சை, சுண்ணாம்பு உள்ளிட்ட பொருட்களை பயன்படுத்தும் முறைகள், நிறம் மாற்றத்தின் காரணம் குறித்து தெரிந்துக்கொள்ளுங்கள்

Image Credit : pinterest

வீட்டிலேயே குங்குமம் செய்வது எப்படி?

கோயில் வழிபாடு முதல் வீட்டு பூஜை வரை, நெற்றியில் வைக்கப்படும் குங்குமத்திற்கு தனி முக்கியத்துவம் உண்டு. இந்திய பாரம்பரியத்தில் முக்கியமான ஆன்மிகப் பொருளாகக் கருதப்படுகிறது. திருமணம், பூஜை, கோயில் வழிபாடு உள்ளிட்ட பல்வேறு நிகழ்வுகளில் பயன்படுத்தப்படுகிறது.

கடைகளில் பல வகையான குங்குமங்கள் கிடைத்தாலும், வீட்டிலேயே எளிய முறையில் குங்குமம் தயாரிக்கலாம் என்பது பலருக்கும் தெரியாது. குறிப்பாக மஞ்சள் தூளை அடிப்படையாக வைத்து பாரம்பரியமாக சில முறைகளில் குங்குமம் தயாரிக்கப்படுகிறது. வீட்டிலேயே குங்குமம் தயாரிக்க விரும்புபவர்கள் தெரிந்து கொள்ள வேண்டிய முறைகள் என்னென்ன? தகவல்களையும் இந்த தொகுப்பில் பார்க்கலாம்.

பாரம்பரியமாக குங்குமம் தயாரிப்பில் மஞ்சள் முக்கியப் பொருளாக பயன்படுத்தப்படுகிறது. வீட்டில் தயாரிக்கும்போது பயன்படுத்தப்படும் பொருட்களின் அளவு, கலக்கும் முறை, உலர்த்தும் முறை ஆகியவை நிறத்தையும் தன்மையையும் மாற்றக்கூடும்.

Image Credit : pinterest

மஞ்சளில் தயிர், எலுமிச்சைச் சாறு சேர்த்து குங்குமம் தயாரிப்பது

மஞ்சள் தூளை ஒரு பாத்திரத்தில் எடுத்துக் கொண்டு, அதில் சிறிதளவு தயிர் சேர்த்து நன்றாகக் கலக்க வேண்டும். கட்டிகள் இல்லாமல் நன்றாகக் கலந்து கொள்ளவும். இதில் சிறிதளவு எலுமிச்சைச் சாற்றை சேர்க்கவும்.

கலவை மிகவும் ஈரமாக இல்லாமல், கெட்டியான பதத்தில் இருக்க வேண்டும். இதை சுத்தமான தட்டில் மெல்லியதாகப் பரப்பி நன்றாக உலர்த்தவும். உலர்ந்த பிறகு மிக்சியில் அரைத்துக் காற்று போகாத கண்ணாடி பாட்டிலில் சேமித்து வைக்கலாம்.

Image Credit : pinterest

மஞ்சளில் சுண்ணாம்பு, எனுமிச்சை சாறு சேர்த்து குங்குமம் தயாரிப்பது

சிறிய கிண்ணத்தில் மஞ்சள் தூளை எடுத்துக் கொள்ளவும். அதில் ஒரு சிறிய சிட்டிகை சுண்ணாம்பை மட்டும் சேர்க்கவும். இரண்டையும் நன்றாகக் கலந்து, பின்னர் சிறிது சிறிதாக தண்ணீர் அல்லது எனுமிச்சை சாறு தெளித்து பிசையவும்.

கலவை நன்றாக கலந்து வந்ததும், அதன் நிறம் மஞ்சளிலிருந்து சிவப்பு நிறத்திற்கு மாறத் தொடங்கும். இந்தக் கலவையை நன்றாக உலர்த்தி, ஈரப்பதம் இல்லாத நிலையில் சிறிய காற்றுப்புகாத டப்பாவில் சேமிக்கலாம்.

மஞ்சளில் உள்ள curcumin என்ற நிறமி அமில-கார தன்மைக்கு ஏற்ப நிறம் மாறக்கூடியது. சுண்ணாம்பு காரத்தன்மை கொண்டிருப்பதால், மஞ்சளுடன் கலக்கும்போது மஞ்சள் நிறம் சிவப்பு நிறத்துக்கு மாறக்கூடும்.

Image Credit : pinterest

கவனத்தில் கொள்ள வேண்டியவை

• சுண்ணாம்பு அதிகமாகப் பயன்படுத்துவது சருமத்திற்கு எரிச்சல், வறட்சி அல்லது தீக்காயம் போன்ற பாதிப்புகளை ஏற்படுத்தக்கூடும். அதிக அளவு சுண்ணாம்பு சேர்க்கக் கூடாது.
• கட்டுமானப் பணிகளில் பயன்படுத்தப்படும் சுண்ணாம்பை பயன்படுத்தக் கூடாது.
• வீட்டில் தயாரிக்கும் குங்குமத்தை நெற்றியில் பயன்படுத்துவதற்கு முன் சிறிய பகுதியில் சோதித்து பார்ப்பது பாதுகாப்பானது.
• கண்கள், உதடுகள் அல்லது காயம் உள்ள பகுதிகளில் படாமல் பார்த்துக் கொள்ள வேண்டும்.
• அரிப்பு, எரிச்சல் அல்லது சிவத்தல் ஏற்பட்டால் உடனடியாக பயன்படுத்துவதை நிறுத்த வேண்டும்.

Image Credit : pinterest

மஞ்சளில் சோடா உப்பு சேர்த்து குங்குமம் தயாரிப்பது

முதலில் ஒரு சிறிய பாத்திரத்தில் தேவையான அளவு மஞ்சள் தூளை எடுத்துக் கொள்ளுங்கள். அதில் ஒரு சிறிய சிட்டிகை சோடா உப்பை சேர்த்து நன்றாகக் கலக்கவும். பின்னர் சிறிதளவு தண்ணீரைச் சேர்த்து பிசைந்து, கலவை நன்றாக ஒன்றாகும் வரை கலந்து கொள்ள வேண்டும். அப்போது மஞ்சள் தூளின் நிறம் மாறி செம்மஞ்சள் அல்லது சிவப்பு நிறத்திற்கு மாறத் தொடங்கும்.

இந்தக் கலவையை ஒரு சுத்தமான தட்டில் பரப்பி நன்றாக உலர்த்திக் கொள்ளுங்கள். முழுமையாக உலர்ந்த பிறகு, கட்டிகள் இருந்தால் அவற்றை நன்றாகப் பொடியாக்கி, காற்றுப்புகாத சுத்தமான டப்பாவில் சேமித்து வைத்துக் கொள்ளலாம்.

Image Credit : pinterest

குங்கும வாசனைக்கு

குங்குமத்திற்கு மென்மையான தன்மையும் இனிய மணமும் வேண்டும் என்றால், தயாரிக்கும் முறைக்கு ஏற்ப சிறிதளவு வெண்ணெய் மற்றும் வாசனைத் திரவியத்தையும் சேர்த்துக் கொள்ளலாம்.

கலவை தயாரான பிறகு, தேவையான அளவு வெண்ணெயைச் சிறிது சிறிதாக சேர்த்து நன்றாகக் கலந்து கொள்ளலாம். இது குங்குமப் பொடியின் தன்மையை மென்மையாக்க உதவும். அதேபோல், விருப்பத்திற்கேற்ப மிகக் குறைந்த அளவு வாசனைத் திரவியத்தை சேர்த்து கலந்து கொள்ளலாம்.

பின்னர் கலவையை நன்றாக உலர்த்தி, கட்டிகள் இருந்தால் பொடியாக்கி, சுத்தமான காற்றுப்புகாத டப்பாவில் சேமித்து வைத்துக் கொள்ளலாம். இதனால் வீட்டிலேயே தயாரிக்கும் குங்குமத்திற்கு விரும்பிய மணமும் தன்மையும் கிடைக்கும்.