- Home
- Lifestyle
- Jeans: சாயம் போகாமல், கிழிந்து போகாமல் ஜீன்ஸ் பல வருஷம் உழைக்கணுமா? இந்த டிரிக்ஸ் பாலோ பண்ணுங்க!
Jeans: சாயம் போகாமல், கிழிந்து போகாமல் ஜீன்ஸ் பல வருஷம் உழைக்கணுமா? இந்த டிரிக்ஸ் பாலோ பண்ணுங்க!
Jeans Maintenance Tips: ஜீன்ஸ் பேண்ட் சீக்கிரம் பழசாகிவிடுகிறதா? அடிக்கடி துவைப்பதை தவிர்ப்பது முதல் சரியான முறையில் உலர்த்துவது வரை ஜீன்ஸ் நீண்ட காலம் பாதுகாக்கும் எளிய வழிமுறைகளை பார்க்கலாம்.
ஜீன்ஸ் பல வருஷம் உழைக்க சூப்பர் டிப்ஸ்
அலுவலகம், கல்லூரி, நண்பர்களுடனான அவுட்டிங் என எங்கு சென்றாலும் பலரின் முதல் சாய்ஸ் ஜீன்ஸ் பேண்ட் தான். ஆனால் ஆசை ஆசையாக வாங்கிய டெனிம் ஆடைகள் சில மாதங்களிலேயே நிறம் மங்கிப் பழசாகிவிடுவது பலருக்கும் நடக்கும். ஜீன்ஸ் பேண்ட் பராமரிப்பு என்பது பெரிய ராக்கெட் சயின்ஸ் இல்லை. துவைக்கும் முறையிலும் உலர்த்தும் விதத்திலும் சில சின்ன மாற்றங்களைச் செய்தாலே அவை பல வருடங்களுக்கு உழைக்கும்.
ஒவ்வொரு முறை அணிந்த பிறகும் ஜீன்ஸை வாஷிங் மெஷினில் போட வேண்டிய அவசியமே இல்லை. வியர்வை, துர்நாற்றம் அல்லது அதிக அழுக்கு இருந்தால் மட்டுமே முழுமையாகத் துவைக்க வேண்டும். மற்றபடி காற்றோட்டமான இடத்தில் உலர வைத்தாலே போதுமானது. லேசான கறை பட்டிருந்தால், அந்த இடத்தை மட்டும் ஈரத்துணியால் மெதுவாகத் துடைத்து எடுப்பதே சிறந்த வழி.
வாஷிங் மெஷினில் ஜீன்ஸ் துவைக்கும்போது...
கறையைப் போக்குகிறேன் என கடினமான பிரஷ் கொண்டு தேய்த்தால் அந்த இடத்தில் மட்டும் சாயம் வெளுத்துவிடும் என்பதைச் சொல்லவும் வேண்டுமா? எனவே, கறைகளை அகற்றுவதில் எப்போதும் மென்மையான அணுகுமுறையே தேவை. தினசரி பயன்பாட்டுக்கு ஒரே ஆடையைத் தொடர்ந்து அணியாமல், மாற்று ஜீன்ஸ் வைத்திருப்பது தேய்மானத்தைக் கணிசமாகக் குறைக்கும்.
மெஷினில் போடுவதற்கு முன் பேண்டை உட்புறமாகத் திருப்பிப் போடுவது மிக முக்கியமான முதல் படி. ஜிப் மற்றும் பட்டன்களைச் சரியாக மூடிவிட்டுத் துவைத்தால், மற்ற துணிகளோடு உரசிக் கிழிவதைத் தவிர்க்கலாம். ஜீன்ஸுடன் கனமான ஆடைகள் அல்லது ஜிப் வைத்த பிற துணிகளைச் சேர்த்துத் துவைப்பதும் உராய்வை அதிகரிக்கும்.
அயர்ன் பண்ணும்போது இப்படி செய்யுங்க
சுடுநீருக்குப் பதிலாகக் குளிர்ந்த நீரைப் பயன்படுத்துவது டெனிம் துணி சுருங்குவதைத் தடுப்பதுடன், சாயம் போவதையும் கட்டுப்படுத்தும். அதிகப்படியான சோப்புத் தூள் அல்லது கடினமான ப்ளீச்சிங் திரவங்களைத் தவிர்த்து, மென்மையான சலவைப் பொருட்களை அளவோடு பயன்படுத்துங்கள். நீண்ட நேரம் தண்ணீரில் ஊறவைப்பதும், அதிக வேகத்தில் மெஷினைச் சுழல விடுவதும் துணியின் ஆயுளைக் குறைத்துவிடும்.
புதிய ஜீன்ஸிலிருந்து சாயம் போகாமல் இருக்க வினிகர், உப்பு கலந்த நீரில் ஊறவைக்கும் பழக்கம் பலரிடம் உள்ளது. ஆனால், இது எல்லா வகையான டெனிம் துணிகளுக்கும் வேலை செய்யும் என்பதற்கு எந்த உறுதியான ஆதாரமும் இல்லை. சாயம் போகும் எனத் தெரிந்தால், முதல் சில முறை அதை மற்ற வெளிர் நிற ஆடைகளிலிருந்து தனியாகத் துவைப்பதே பாதுகாப்பானது.
உலர்த்தும் முறையும் முக்கியம்
வாஷிங் மெஷினில் உள்ள டம்பிள் ட்ரையர் அதிக வெப்பத்தை வெளியிடும் என்பதால், அதை ஜீன்ஸ் துணிகளுக்குப் பயன்படுத்துவதைத் தவிர்க்கலாம். அதிகப்படியான தண்ணீரை மெதுவாகப் பிழிந்துவிட்டு, நேரடி வெயில் படாத நிழலான காற்றோட்டமான இடத்தில் காயவைக்க வேண்டும். வெயிலில் காயப்போட்டால் கருப்பு, அடர் நீல நிற பேண்ட்கள் சீக்கிரமே வெளுத்துவிடும் வாய்ப்பு அதிகம்.
முழுமையாக காய்ந்த பிறகு மட்டுமே மடித்து அலமாரியில் வைக்க வேண்டும். ஈரப்பதத்தோடு வைத்தால் ஒருவித துர்நாற்றம் வீசத் தொடங்கிவிடும். நீண்ட நாட்களாகப் பயன்படுத்தாத ஜீன்ஸை அவ்வப்போது வெளியே எடுத்து காற்றோட்டமான இடத்தில் வைப்பது துணியின் தரத்தைப் பாதுகாக்கும். தேவையில்லாமல் அதிக வெப்பத்தில் அயர்ன் செய்வதைத் தவிர்த்து, லேபிளில் உள்ளபடி சரியான வெப்பநிலையைப் பின்பற்றுங்கள்.
தையல் பிரிந்திருந்தால்...
பேண்டின் முழங்கால் பகுதி, பாக்கெட்டுகள் மற்றும் தொடைப் பகுதிகளில் அதிக தேய்மானம் உள்ளதா என்பதை அடிக்கடி கவனிக்க வேண்டும். சிறிய அளவில் தையல் பிரிந்திருந்தால் அதை ஆரம்பத்திலேயே சரிசெய்துவிடுவது கிழிசல் பெரிதாவதைத் தடுக்கும். விலையுயர்ந்த பராமரிப்புப் பொருட்கள் இல்லாமல், இந்தச் சின்னச் சின்ன விஷயங்களைக் கடைப்பிடித்தாலே உங்கள் ஜீன்ஸ் நீண்ட காலத்திற்குப் புதியது போலவே இருக்கும்.
ஏஷ்யாநெட் தமிழ் நியூஸின் லைஃப்ஸ்டைல் பிரிவு, வாசகர்களுக்கு வாழ்க்கை முறை, உறவுகள் மற்றும் நடைமுறை வாழ்க்கை குறித்து வளமான தகவல்களை வழங்குகிறது. இதில் ஆரோக்கிய ஆலோசனைகள், உணவு மற்றும் ஊட்டச்சத்து குறிப்புகள், ஃபாஷன் டிரெண்ட்ஸ் மற்றும் தினசரி வாழ்க்கையை மேம்படுத்தும் சிந்தனையூட்டும் கருத்துகள் அடங்கும்.
