Blood River: தண்ணி இல்ல, ரத்தம் ஓடுற ஆறு நம்ம நாட்டுல எங்க இருக்கு தெரியுமா?

Blood River: இந்தியாவில் ஒரு ஆறு இருக்கிறது. அதன் பெயரே கேட்க சற்று வித்தியாசமாக இருக்கும். சில காலங்களில் அதன் நீர் சிவப்பு மற்றும் ஆரஞ்சு நிறங்களில் காட்சியளிப்பதால், இது “ரத்த நதி” என்று அழைக்கப்படுகிறது.

Image Credit : chat GPt

இந்தியாவின் ரத்த ஆறு

நம்ம நாட்டுல நீங்க எத்தனையோ நதிகளைப் பார்த்திருப்பீங்க. ஆனா, எப்போதாவது ரத்த நிறத்துல ஓடுற ஒரு நதியைப் பார்த்திருக்கீங்களா? அடர்ந்த காடுகள், பனிமூட்டமான மலைகளுக்கு நடுவே, பருவநிலைக்கு ஏற்ப சிவப்பு, ஆரஞ்சு நிறங்கள்ல ரத்தம் போலவே ஓடும் ஒரு நதி இருக்கு. அதன் பெயர் லோஹித். அருணாச்சல பிரதேசத்தில் பாயும் இந்த நதியை 'ரத்த நதி' (River of Blood) என்றும் அழைக்கிறார்கள். இந்த ஆற்றுத் தண்ணீர் ஏன் இப்படி சிவப்பு நிறத்தில் இருக்கிறது? இதன் பின்னணிக் காரணத்தை இப்போது பார்க்கலாம்.

Image Credit : chat GPt

இந்த நதி எங்கே பாய்கிறது?

லோஹித் நதி, கிழக்கு திபெத்தில் உள்ள ஜாயல் சூ மலைத்தொடரில் உருவாகிறது. அருணாச்சல பிரதேசத்தின் அஞ்சாவ் மாவட்டம் வழியாக இந்தியாவிற்குள் நுழைந்து, சுமார் 200 கிலோமீட்டர் தூரம் அடர்ந்த காடுகள் மற்றும் ஆழமான பள்ளத்தாக்குகள் வழியே பாய்கிறது. கடைசியாக, இந்த நதி பிரம்மபுத்திரா ஆற்றுடன் கலக்கிறது. இந்த நதியை 'ரத்த நதி' என்று அழைப்பதற்கு இரண்டு காரணங்கள் சொல்லப்படுகின்றன.

அறிவியல் காரணம்: லோஹித் பள்ளத்தாக்கு மற்றும் மிஷ்மி மலைகளில் 'லேட்டரைட்' எனப்படும் இரும்புச்சத்து நிறைந்த செம்மண் அதிகமாக உள்ளது. மழைக்காலத்தில் இந்த மண் ஆற்று நீரில் கலப்பதால், தண்ணீர் துருப்பிடித்த சிவப்பு அல்லது ரத்த நிறத்திற்கு மாறுகிறது.

புராணக் கதை: மகாவிஷ்ணுவின் அவதாரமான பரசுராமர், தன் தந்தை ஜமதக்னியின் கட்டளைப்படி தாய் ரேணுகா தேவியின் தலையைத் துண்டித்தார். அந்தப் பாவத்தைப் போக்க, பரசுராமர் இந்த நதியில் நீராடியதாகவும், அப்போது அவரது தாயின் ரத்தம் கலந்து இந்த நதி சிவப்பாக மாறியதாகவும் ஒரு நம்பிக்கை உள்ளது. இங்குள்ள பரசுராம் குண்ட், வடகிழக்கு இந்தியாவின் மிக முக்கியமான இந்து புனிதத் தலங்களில் ஒன்றாகும். ஒவ்வொரு ஆண்டும் மகர சங்கராந்தி அன்று ஆயிரக்கணக்கான பக்தர்கள் இங்கு புனித நீராட வருகிறார்கள்.

Image Credit : chat GPt

வாழ்வில் ஒருமுறையாவது பார்க்க வேண்டிய இடம்..

இந்தியாவிலேயே முதல் சூரிய உதயத்தைக் காணும் இடம் இந்த லோஹித் நதிப் படுகையில் உள்ள டோங் கிராமம்தான். நாட்டின் முதல் சூரியக் கதிர் இந்த ரத்த நிறத் தண்ணீரில் படும்போது, நதி தங்கம் போல ஜொலிக்கும். இந்த ஆற்றின் ஓசை பல மைல்களுக்குக் கேட்கும் அளவுக்கு இதன் வேகம் பயங்கரமாக இருக்கும். இந்த நதிக்கரையில் மட்டுமே கிடைக்கும் 'மிஷ்மி தீதா' என்ற அரிய மூலிகை, இது தங்கத்தை விட மதிப்புமிக்கது. உலகில் வேறு எங்கும் கிடைக்காத இந்த மூலிகை, பல நோய்களைத் தீர்க்கும் என நம்பப்படுகிறது.

தேஜுவிலிருந்து இந்தியாவின் கடைசி எல்லைக் கிராமமான வாலோங் வரை, லோஹித் நதியை ஒட்டிச் செல்லும் சாலைப் பயணம் ஒரு அற்புதமான அனுபவம். ஒருபுறம் வானை முட்டும் பச்சை மலைகள், மறுபுறம் நூற்றுக்கணக்கான அடி ஆழத்தில் பாயும் சிவப்பு நதி, பனிமூட்டம் என இந்த வழியில் பயணிப்பது மேகங்களில் மிதப்பது போல இருக்கும். இங்குள்ள பழங்குடியினர் மூங்கில் மற்றும் இரும்புக் கம்பிகளால் கட்டிய கிலோமீட்டர் நீள தொங்கு பாலங்களில் நடந்து, கீழே ஓடும் ஆற்றைப் பார்ப்பது ஒரு மறக்க முடியாத சாகச அனுபவம்.