Branded Train: இந்தியாவில் இதுதான் முதல்முறை.. ரயிலுக்கே பிராண்ட் பெயரா?
Branded Train: இந்த மாற்றம் ரயிலின் இயக்கம் அல்லது உரிமையை பாதிக்காது. இது இந்திய ரயில்வேயின் புதிய விளம்பர வருவாய் உத்தியாகும். ரயிலின் நிர்வாகம் இந்திய ரயில்வே கேட்டரிங் மற்றும் சுற்றுலா கழகத்தின் (IRCTC) வசமே தொடரும்.
ரயில் பிராண்டிங்
லக்னோ மற்றும் புதுடெல்லி இடையே இயக்கப்படும் தேஜஸ் எக்ஸ்பிரஸ் ரயில், இனி வழக்கமான பெயருடன் ‘ஸ்ப்ரைட் தேஜஸ் எக்ஸ்பிரஸ்’ என்ற பெயரிலும் அழைக்கப்படும். கிடைத்துள்ள தகவல்களின்படி, ஸ்ப்ரைட் நிறுவனத்திற்கு இந்த ரயிலில் குறிப்பிட்ட காலத்திற்கான விளம்பரம் மற்றும் பெயரிடல் உரிமைகள் வழங்கப்பட்டுள்ளன. ஆகஸ்ட் 19 முதல் ரயில் நிலைய அறிவிப்புகள் மற்றும் பயணிகள் தொடர்பான சில இடங்களில் இந்த புதிய பெயர் பயன்படுத்தப்படலாம் என கூறப்படுகிறது.
இதன் மூலம் ரயிலின் பெயருடன் ஒரு பிரபலமான வணிக நிறுவனத்தின் பெயர் இணைக்கப்படுவது பயணிகள் மத்தியில் கவனத்தை ஈர்த்துள்ளது. ஆனால் இங்கு முக்கியமாக புரிந்துகொள்ள வேண்டிய விஷயம் ஒன்று உள்ளது. ஸ்ப்ரைட் நிறுவனம் இந்த ரயிலை இயக்கப் போவதில்லை. ரயிலின் இயக்கம், பயணிகள் சேவை, பாதுகாப்பு நடைமுறைகள் மற்றும் ரயில்வே தொடர்பான வழக்கமான செயல்பாடுகள் தொடர்ந்து அதே முறையில் நடைபெறும். ஸ்ப்ரைட் நிறுவனத்திற்கு வழங்கப்பட்டிருப்பது விளம்பரம் மற்றும் பெயருடன் தொடர்புடைய வணிக உரிமைகள் மட்டுமே.
தேஜஸ் எக்ஸ்பிரஸ் புதிய பெயர்
இதன் ஒரு பகுதியாக ரயிலின் வெளிப்புறம் மற்றும் அனுமதிக்கப்பட்ட விளம்பரப் பகுதிகளில் ஸ்ப்ரைட் தொடர்பான விளம்பர வடிவமைப்புகள் இடம்பெறலாம். எனவே ‘ஸ்ப்ரைட் தேஜஸ் எக்ஸ்பிரஸ்’ என்பது புதிய தனியார் ரயில் என்பது அர்த்தமில்லை. மேலும் லக்னோ-டெல்லி தேஜஸ் எக்ஸ்பிரஸை முழுமையாக தனியார் ரயில் என்று அழைப்பதும் சரியான விளக்கம் அல்ல. இந்த ரயில் சேவையை இந்திய ரயில்வே கேட்டரிங் மற்றும் சுற்றுலா கழகம் நிர்வகித்து வருகிறது.
அதே நேரத்தில் ரயில் இயக்கப்படும் தண்டவாளங்கள், நிலையங்கள், சமிக்ஞை அமைப்புகள் உள்ளிட்ட அடிப்படை ரயில்வே கட்டமைப்புகள் இந்திய ரயில்வேயின் கட்டுப்பாட்டிலேயே உள்ளன. எனவே ரயிலின் பெயரில் ஒரு வணிக நிறுவனத்தின் பெயர் சேர்க்கப்படுவதால், ரயிலின் உரிமை அல்லது முழுமையான இயக்க உரிமை அந்த நிறுவனத்துக்கு வழங்கப்பட்டுவிட்டது என்று கருதக்கூடாது. லக்னோடெல்லி தேஜஸ் எக்ஸ்பிரஸ் கடந்த 2019ஆம் ஆண்டு அறிமுகப்படுத்தப்பட்டது. பயணிகளுக்கு வசதியான அதிவேகப் பயண அனுபவத்தை வழங்கும் நோக்கத்துடன் அறிமுகமான இந்த ரயில், முழுமையான குளிர்சாதன வசதி கொண்ட பெட்டிகள், உணவு மற்றும் பல்வேறு பயணிகள் சேவைகளால் கவனம் பெற்றது.
FD vs SIP: ரூ.10 லட்சம் எஃப்டி vs மாதம் ரூ.10,000 எஸ்ஐபி.. 15 ஆண்டில் எது அதிக பணம் தரும்?
ஸ்ப்ரைட் தேஜஸ் எக்ஸ்பிரஸ்
இதன் நிர்வாகத்தை இந்திய ரயில்வே கேட்டரிங் மற்றும் சுற்றுலா கழகம் மேற்கொள்வதால், வழக்கமான இந்திய ரயில்வே சேவைகளுடன் சில செயல்பாட்டு அம்சங்களில் வேறுபாடு காணப்படுகிறது. இருப்பினும் ரயில் பாதுகாப்பு மற்றும் இயக்கக் கட்டுப்பாடுகள் தொடர்பான நடைமுறைகள் வழக்கம்போல தொடர்கின்றன. ரயில்களின் விளம்பர வருவாயை அதிகரிக்க புதிய வழிகளை உருவாக்கும் முயற்சியாக இந்த பெயரிடல் ஒப்பந்தம் பார்க்கப்படுகிறது.
ஏற்கனவே ரயில்கள் மற்றும் ரயில் நிலையங்களில் பல்வேறு நிறுவனங்களின் விளம்பரங்கள் இடம்பெற்று வரும் நிலையில், ரயிலின் பெயருடன் ஒரு வணிக நிறுவனத்தின் பெயரை இணைக்கும் புதிய முயற்சியாக உள்ளது. இந்த நடவடிக்கையை சிலர் புதிய விளம்பர உத்தியாக வரவேற்கும் நிலையில், ரயில்களின் பாரம்பரிய பெயர்களில் வணிகப் பெயர்களை இணைப்பது குறித்து சிலர் கேள்விகளையும் எழுப்பி வருகின்றனர். எப்படியிருந்தாலும், ஆகஸ்ட் 19 முதல் ‘ஸ்ப்ரைட் தேஜஸ் எக்ஸ்பிரஸ்’ என்ற பெயர் பயன்பாட்டுக்கு வருவது இந்திய ரயில்வேயின் விளம்பர முயற்சிகளில் கவனம் பெறக்கூடிய புதிய அத்தியாயமாக அமைய உள்ளது.
