ஜிஎஸ்டி 2.0: இந்தியாவின் அடுத்த தலைமுறைக்கான சீர்திருத்தம்: பிரதமர் மோடி பெருமிதம்
ஜிஎஸ்டி 2.0 சீர்திருத்தங்கள் அடுத்த தலைமுறைக்கானவை என பிரதமர் மோடி தெரிவித்துள்ளார். இது மக்களுக்கு, குறிப்பாக ஏழைகள் மற்றும் நடுத்தர வர்க்கத்தினருக்கு நன்மைகளை வழங்கும் எனவும் கூறியுள்ளார்.
ஜிஎஸ்டி 2.0 சீர்திருத்தம்
இந்தியாவின் பொருளாதாரத்தை வலுப்படுத்த அடுத்த தலைமுறைக்கான சீர்திருத்தங்கள் தேவை என்று பிரதமர் நரேந்திர மோடி தெரிவித்துள்ளார். ஜிஎஸ்டி (சரக்கு மற்றும் சேவை வரி) சீர்திருத்தங்கள், இந்தியாவை தன்னிறைவு பெற்ற நாடாக மாற்றுவதில் ஒரு முக்கியமான நடவடிக்கை என்று அவர் கூறியுள்ளார். இந்த ஆண்டு தீபாவளி மற்றும் நவராத்திரிக்கு இது இரட்டை மகிழ்ச்சியாக இருக்கும் எனவும் பிரதமர் குறிப்பிட்டுள்ளார்.
நவராத்திரியில் தொடக்கம்
எளிமையாக்கப்பட்ட ஜிஎஸ்டி விதிகள், நவராத்திரியின் முதல் நாளான செப்டம்பர் 22 முதல் அமலுக்கு வரும் என பிரதமர் மோடி அறிவித்துள்ளார். “ஜிஎஸ்டி இப்போது இன்னும் எளிதாகிவிட்டது. செப்டம்பர் 22-ஆம் தேதி, நவராத்திரியின் முதல் நாள், இந்த அடுத்த தலைமுறைக்கான சீர்திருத்தங்கள் அமல்படுத்தப்படும்,” என்று அவர் கூறியுள்ளார்.
மக்களுக்கு இரட்டை மகிழ்ச்சி
கடந்த 8 ஆண்டுகளுக்கு முன், ஜிஎஸ்டி அமல்படுத்தப்பட்டபோது, அது சுதந்திர இந்தியாவின் மிகப்பெரிய பொருளாதார சீர்திருத்தங்களில் ஒன்றாக அமைந்தது. இப்போது, "ஜிஎஸ்டி 2.0" என்ற சீர்திருத்தங்கள் அடுத்த தலைமுறைக்கானவை. இது நாட்டுக்கு ஆதரவு மற்றும் வளர்ச்சியின் இரட்டை டோஸ் ஆக இருக்கும். இந்த புதிய சீர்திருத்தங்கள், நாட்டில் உள்ள ஒவ்வொரு குடும்பத்திற்கும், குறிப்பாக ஏழைகள், நடுத்தர வர்க்கத்தினர், பெண்கள், மாணவர்கள் மற்றும் இளைஞர்களுக்கு பெரிய நன்மைகளை வழங்கும் என்று பிரதமர் மோடி தெரிவித்துள்ளார்.
ஆயுள் காப்பீட்டுக்கு வரி நீக்கம்
ஜிஎஸ்டி கவுன்சிலால் ஒப்புதல் அளிக்கப்பட்ட புதிய சீர்திருத்தங்களில், உடல்நலம் மற்றும் காப்பீட்டுத் துறையில் மக்களுக்கு பெரிய நிவாரணம் அளிக்கப்பட்டுள்ளது. தனிநபர்களின் மருத்துவம் மற்றும் ஆயுள் காப்பீட்டுக்கான ஜிஎஸ்டி முழுமையாக நீக்கப்பட்டு, அவை பூஜ்ஜிய வரி வரம்பிற்குள் கொண்டு வரப்பட்டுள்ளன. இதனால், இந்த சேவைகள் அதிக மக்களுக்கு மலிவான விலையில் கிடைக்கும்.
மருத்துவப் பொருட்களுக்கு வரி குறைப்பு
இதுமட்டுமின்றி, பல அத்தியாவசிய மருத்துவப் பொருட்களுக்கான ஜிஎஸ்டி 12% இலிருந்து 5% ஆக குறைக்கப்பட்டுள்ளது. இதில் தெர்மாமீட்டர், மருத்துவ தர ஆக்ஸிஜன், அனைத்து நோய் கண்டறியும் கருவிகள், குளுக்கோமீட்டர்கள் மற்றும் டெஸ்ட் ஸ்ட்ரிப்ஸ், அத்துடன் திருத்தக் கண்ணாடிகள் போன்ற பொருட்கள் அடங்கும். இந்த வரி குறைப்பால், அத்தியாவசிய மருத்துவப் பொருட்களின் விலை குறையும் என எதிர்பார்க்கப்படுகிறது.
