கின்னஸ் சாதனை படைத்த மோடி! 'பரிக்ஷா பே சர்ச்சா' நிகழ்ச்சிக்கு 3.5 கோடி மாணவர்கள் பேர் பதிவு!

பிரதமர் மோடியின் 'பரிக்ஷா பே சர்ச்சா' நிகழ்ச்சி, ஒரே மாதத்தில் அதிக எண்ணிக்கையிலானோர் பதிவு செய்ததற்காக கின்னஸ் உலக சாதனை படைத்துள்ளது. 3.53 கோடிக்கும் அதிகமான பதிவுகள் MyGov தளத்தில் பெறப்பட்டுள்ளது.

Image Credit : X-BJP

'பரிக்ஷா பே சர்ச்சா' நிகழ்ச்சி

மாணவர்கள், ஆசிரியர்கள் மற்றும் பெற்றோர்களுடன் பிரதமர் நரேந்திர மோடி கலந்துரையாடும் 'பரிக்ஷா பே சர்ச்சா' (Pariksha Pe Charcha) நிகழ்ச்சி, இந்த ஆண்டு புதிய கின்னஸ் உலக சாதனையை நிகழ்த்தியுள்ளது. ஒரே மாதத்தில் அதிக எண்ணிக்கையிலானோர் ஒரு பொது ஈடுபாட்டுத் தளத்தில் பதிவு செய்ததற்காக இந்தச் சாதனை அங்கீகரிக்கப்பட்டுள்ளது.

தேர்வு நேரத்தை மன அழுத்தம் மற்றும் பதற்றம் நிறைந்த காலமாகக் கருதாமல், அதை மகிழ்ச்சியான கற்றல் மற்றும் ஊக்கமளிக்கும் காலமாக மாற்றும் நோக்கத்துடன், கடந்த 2018-ஆம் ஆண்டு முதல் இந்த நிகழ்ச்சி நடத்தப்பட்டு வருகிறது. அதன் எட்டாவது பதிப்பான 'பரிக்ஷா பே சர்ச்சா 2025', உலகிலேயே மிகப்பெரிய மாணவர் ஈடுபாட்டு நிகழ்ச்சியாக உருவெடுத்துள்ளது.

Image Credit : social media

சாதனைக்கான காரணம்

'பரிக்ஷா பே சர்ச்சா 2025' நிகழ்ச்சியில் பங்கேற்பதற்காக, ஒரு மாத காலத்திற்குள் MyGov தளத்தில் 3.53 கோடிக்கும் அதிகமான சரியான பதிவுகள் பெறப்பட்டுள்ளன. இது 'ஒரு மாதத்தில் ஒரு குடிமக்கள் ஈடுபாட்டுத் தளத்தில் அதிக எண்ணிக்கையிலானோர் பதிவு செய்தல்' என்ற கின்னஸ் சாதனையைப் படைத்துள்ளது.

இந்த சாதனைக்கான அதிகாரப்பூர்வ சான்றிதழ், புதுடெல்லியில் நடைபெற்ற ஒரு நிகழ்ச்சியில், கின்னஸ் உலக சாதனை அதிகாரியான ரிஷி நாத் என்பவரால் வழங்கப்பட்டது. இதில் மத்திய கல்வி அமைச்சர் தர்மேந்திர பிரதான், மின்னணு மற்றும் தகவல் தொழில்நுட்பத் துறை அமைச்சர் அஷ்வினி வைஷ்ணவ், மின்னணு மற்றும் தகவல் தொழில்நுட்பத் துறை இணை அமைச்சர் ஜிதின் பிரசாதா மற்றும் கல்வி, ஐ.டி. அமைச்சகங்களின் மூத்த அதிகாரிகள் ஆகியோர் கலந்துகொண்டு, இந்த சாதனையைப் பாராட்டினர்.

Image Credit : social media

மத்திய அமைச்சர்களின் கருத்துக்கள்

மத்திய கல்வி அமைச்சர் தர்மேந்திர பிரதான் பேசுகையில், "தேர்வு தொடர்பான அழுத்தத்தை கற்றல் கொண்டாட்டமாக பிரதமர் மோடி மாற்றிவிட்டார். இந்த ஆண்டின் நிகழ்ச்சி, தொலைக்காட்சி, வானொலி மற்றும் ஆன்லைன் தளங்கள் என அனைத்திலும் 21 கோடிக்கும் அதிகமான பார்வையாளர்களை ஈர்த்துள்ளது" என்றார்.

அஷ்வினி வைஷ்ணவ் பேசுகையில், "இந்தச் சாதனை, மாணவர்கள் மத்தியில் பிரதமர் மோடியின் செய்திக்கு எந்த அளவுக்கு நம்பிக்கை இருக்கிறது என்பதைக் காட்டுகிறது. 'அமிர்தகாலத்தில்' வலிமையான மற்றும் நம்பிக்கையான இளம் தலைமுறையை உருவாக்குவதற்கு இந்த நிகழ்ச்சி உதவுகிறது" என்று தெரிவித்தார்.

Image Credit : our own

'பரிக்ஷா பே சர்ச்சா' எப்படி உதவுகிறது?

தேசியக் கல்விக் கொள்கை (NEP 2020) வலியுறுத்தும் மன அழுத்தமில்லாத மற்றும் மகிழ்ச்சியான கற்றல் என்ற கருத்தை 'பரிக்ஷா பே சர்ச்சா' நிகழ்ச்சி ஆதரிக்கிறது. இந்த நிகழ்ச்சியின் மூலம், மனப்பாடம் செய்வதற்குப் பதிலாக, சிந்தித்து, புரிந்து, உண்மையான சிக்கல்களுக்குத் தீர்வு காணும் திறன்களுக்கு முக்கியத்துவம் அளிக்கப்படுகிறது.

இந்த நிகழ்ச்சியில், பிரதமர் மோடி மாணவர்கள் எதிர்கொள்ளும் பல்வேறு பிரச்சனைகள் குறித்துப் பேசுகிறார். நேர மேலாண்மை, அதிக நேரம் மொபைல், டிவி பார்ப்பது, மன அழுத்தத்தை சமாளிப்பது, கவனச்சிதறலைத் தவிர்ப்பது, தன்னம்பிக்கையை வளர்த்துக்கொள்வது போன்றவை குறித்து ஆலோசனைகளை வழங்குகிறார்.