International Yoga Day 2022 : உங்கள் உடலை வலிமையாக்கும் எளிய யோகாசனங்கள் இதோ !

International Yoga Day 2022 : நாள்தோறும் சரியான உடற்பயிற்சிகளை மேற்கொள்ளும்போது உடலில் இருக்கும் மெட்டபாலிசம் நோய் எதிர்ப்பு சக்தியை அதிகரிப்பதுடன், சுவாசப் பிரச்சனைகளையும் தீர்க்க உதவும்.

விருக்ஷாசனம் செய்தால் மனதை ஒருநிலைப்படுத்த முடியும். விருக்ஷாசனம் என்றால், மரம் போன்ற தோற்றம் என்று பொருள். இந்த ஆசனத்தை செய்ய, முதலில் நேராக நிற்கவும். பின்னர் உங்கள் கைகளை மேலே நகர்த்தி உள்ளங்கைகளை ஒன்றாக இணைக்கவும். ஒரு காலில் சமநிலையை பராமரிக்கும் போது, மற்றொரு காலை எடுத்து நிற்கும் காலின் தொடைக்கு அருகில் கொண்டு வந்து நிற்கவும். சில விநாடிகள் இதே நிலையை பின்பற்றி நீராக நிற்க வேண்டும். இந்த ஆசனத்தின்போது, சாதாரணமாக மூச்சுவிட வேண்டும். இதனை காலை அல்லது மாலை நேரத்தில் செய்யலாம்.

புஜங்கா என்றால் சம்ஸ்கிருத மொழியில் ராஜநாகம். இது யோகாசனங்களில் முதுகுத்தண்டை பலப்படுத்தும் ஒரு ஆசனமாகும். இந்த ஆசனத்தை செய்ய வயிறுப்பகுதி தரையில் படுமாறு படுக்கவும். பின்னர் கைகளை தரையில் ஊன்றி கால்களை நேராக நீட்டவும். ராஜநாகம் படம் எடுப்பதைப்போல கைகளை மடக்கி உடலை நேராக வைத்து சுவாசிக்கவும். வயிற்று பகுதி தரையில் நன்றாக படும்படி இதனை செய்ய வேண்டும். இந்த ஆசனம் முழு உடலையும் பலப்படுத்தும் மற்றும் முதுகெலும்பை நெகிழ்வாகவும், ஆரோக்கியமாகவும் வைத்திருக்க உதவுகிறது.

உத்திதா திரிகோனாசனா என்பது தடாசனம் போன்று நின்றுக்கொண்டு, மூன்று அடி இடைவெளியில் கால்களை அகற்றி வைத்துக்கொள்ளுங்கள். கைகள் இரண்டையும் இரு பக்கமாக நேராக நீட்டியவாறு, இரண்டு கால்களும் 90 டிகிரி கோணத்தில் இருப்பதுபோல் வலப்பக்கமாக சாய வேண்டும். மேல் இருக்கும் கையும், நிலத்தை தொடும் கையும் ஒரே நேர்கோட்டில் இருக்குமாறு பார்த்துக்கொள்ளுங்கள். உடலை வளைக்கும்போது கால்கள் நேராக இருக்க வேண்டும். பலன்: முதுகெலும்பு இயக்கத்தை அதிகரிக்கிறது. முதுகுவலியைக் குறைக்கிறது. இரைப்பை அழற்சி, செரிமான பிரச்சனைகள் மற்றும் அமிலத்தன்மை ஆகியவற்றைக் குறைக்கும்.

உத்கடசனா என்பது தடாசனம் போல் முதலில் நின்று கொள்ள வேண்டும். பின்னர் நாற்காலியில் அமருவதுபோல் முழங்காலை மடக்கி செயற்கையாக உட்கார வேண்டும். அப்போது, பாதங்களில் நிற்காமல் உடல் எடை முழுவதும் கால் விரல்களில் இருக்குமாறு நிற்க வேண்டும். உள்ளங்கைகள் ஒன்றையொன்று பார்த்துக்கொள்ளுமாறு மேலே உயர்த்திக்கொள்ளுங்கள். பலன்: கால், கை, முதுகு, இடுப்பு பகுதிகளில் இருக்கும் இறுக்கமான தன்மை குறைந்து இலகுவாகும். வயதானவர்கள் செய்வதற்கு சற்று கடினமாக இருக்கலாம். இளம் மற்றும் நடுத்தர வயதினர் முயற்சிக்கலாம்.