உலகின் மிகவும் சமத்துவமான சமூகங்களில் ஒன்றாக இந்தியா: உலக வங்கி அறிக்கை!
உலக வங்கியின் தரவுகளின்படி, வருமான சமத்துவத்தில் இந்தியா உலக அளவில் நான்காவது இடத்தைப் பிடித்துள்ளது. வறுமை ஒழிப்பு, நிதிச் சேவைகளுக்கான அணுகல் மற்றும் நேரடிப் பலன் பரிமாற்றங்கள் போன்ற அரசின் முயற்சிகள் இந்த முன்னேற்றத்திற்கு உந்துதலாக அமைந்துள்ளன.
சமத்துவமான சமூகங்கள்
உலக வங்கியின் சமீபத்திய தரவுகளின்படி, இந்தியா உலக அளவில் மிகவும் சமத்துவமான சமூகங்களில் ஒன்றாக உருவெடுத்துள்ளது. 25.5 என்ற ஜினி குறியீட்டுடன் (Gini Index), வருமான சமத்துவத்தில் உலக அளவில் நான்காவது இடத்தைப் பிடித்துள்ளது. ஸ்லோவாக் குடியரசு, ஸ்லோவேனியா மற்றும் பெலாரஸ் ஆகிய நாடுகளுக்கு அடுத்தபடியாக இந்தியா உள்ளது.
இந்தியாவின் முன்னேற்றம்
இது குறித்து சமூக நலத்துறை வெளியிட்ட அறிக்கையில், "இந்தியாவின் பொருளாதார வளர்ச்சி அதன் மக்கள் முழுவதும் பரவலாகப் பகிரப்படுகிறது என்பதை இது பிரதிபலிக்கிறது. இந்த வெற்றிக்குப் பின்னால், வறுமையைக் குறைத்தல், நிதி அணுகலை விரிவுபடுத்துதல் மற்றும் நலத்திட்ட உதவிகளை மிகவும் தேவைப்படுபவர்களுக்கு நேரடியாக வழங்குதல் ஆகிய கொள்கைகளில் ஒரு நிலையான கவனம் உள்ளது" என்று குறிப்பிடப்பட்டுள்ளது.
வருமான விநியோகத்தின் முக்கிய அளவீடான ஜினி குறியீட்டில், 0 முழுமையான சமத்துவத்தையும், 100 அதிகபட்ச ஏற்றத்தாழ்வையும் குறிக்கிறது. இந்தக் குறியீட்டில், சீனா (35.7), அமெரிக்கா (41.8) மற்றும் அனைத்து G7 மற்றும் G20 நாடுகளையும் விட இந்தியா முன்னணியில் உள்ளது. 2011 இல் 28.8 ஆக இருந்த இந்தியாவின் மதிப்பெண் தற்போது 25.5 ஆக மேம்பட்டுள்ளது, இது சமமான வளர்ச்சியில் நிலையான முன்னேற்றத்தைக் காட்டுகிறது.
வறுமை ஒழிப்பில் முக்கிய பங்கு
வறுமையைக் குறைப்பதில் நாட்டின் வலுவான செயல்பாடு, அதிக சமத்துவத்தை அடைவதில் முக்கிய பங்காற்றியுள்ளது. உலக வங்கியின் 2025 வசந்தகால வறுமை மற்றும் சமத்துவ அறிக்கை, 2011 மற்றும் 2023 க்கு இடையில் 17.1 கோடி இந்தியர்கள் தீவிர வறுமையிலிருந்து மீட்கப்பட்டதாகத் தெரிவிக்கிறது. ஒரு நாளைக்கு 2.15 டாலர் என்ற உலகளாவிய வறுமைக் கோட்டின் அடிப்படையில், இந்தக் காலகட்டத்தில் வறுமை விகிதம் 16.2 சதவீதத்திலிருந்து வெறும் 2.3 சதவீதமாகக் கணிசமாகக் குறைந்துள்ளது.
அரசுத் திட்டங்களின் தாக்கம்
இந்த மாற்றத்திற்கு அரசின் பல்வேறு முன்முயற்சிகள் அடிப்படையாக அமைந்துள்ளன. பிரதான் மந்திரி ஜன் தன் யோஜனா (PM Jan Dhan Yojana) போன்ற முதன்மையான திட்டங்கள், 55 கோடிக்கும் அதிகமான வங்கிக் கணக்குகளுடன் நிதிச் சேவைகளின் அணுகலை விரிவுபடுத்தியுள்ளன. இந்தியாவின் டிஜிட்டல் அடையாள அமைப்பான ஆதார், தற்போது 142 கோடிக்கும் அதிகமான தனிநபர்களை உள்ளடக்கியுள்ளது. நேரடிப் பலன் பரிமாற்றங்கள் (Direct Benefit Transfers) மூலம் நலத்திட்ட உதவிகளை வழங்குவதை இது எளிதாக்கியுள்ளது, இதன் மூலம் மார்ச் 2023 வரை ரூ. 3.48 லட்சம் கோடி சேமிக்கப்பட்டுள்ளது.
ஆயுஷ்மான் பாரத் திட்டம்
ஆயுஷ்மான் பாரத் (Ayushman Bharat) திட்டம் மூலம் சுகாதார சமத்துவம் மேம்படுத்தப்பட்டுள்ளது. இத்திட்டம் குடும்பங்களுக்கு ரூ. 5 லட்சம் சுகாதார காப்பீட்டை வழங்குகிறது, மேலும் 41 கோடிக்கும் அதிகமான அட்டைகள் வழங்கப்பட்டுள்ளன. ஸ்டாண்ட்-அப் இந்தியா (Stand-Up India) திட்டம் எஸ்சி/எஸ்டி மற்றும் பெண் தொழில்முனைவோருக்கு ஆதரவளிக்கிறது, அதே நேரத்தில் பி.எம். விஸ்வகர்மா யோஜனா (PM Vishwakarma Yojana) கலைஞர்களுக்கு கடன் மற்றும் பயிற்சியுடன் ஆதரவளிக்கிறது. இந்தியாவின் உணவுப் பாதுகாப்புத் திட்டமான பி.எம்.ஜி.கே.ஏ.ஒய் (PMGKAY), 80 கோடிக்கும் அதிகமான குடிமக்களுக்குப் பயனளித்துள்ளது என்றும் அந்த அறிக்கை கூடுதலாகத் தெரிவித்துள்ளது.
